5
Doka’g Hilabot to Kono’n Asawa Nu
1 Anak, pannalinga ka to kougsoban ku, woy dorodyow ka to pogpamminog to mgo igtuaro ku, 2 odyow no ogpalinggaat ka marodyow no pogdoromdom nu, woy og-ungud ka ogkagi to katagaanan. 3 Moomis pad to tonob ka mgo kinagian to boi no kono'n asawa nu, woy maurok pad to lana ka nangnangonon din, 4 di to kaugadyan mapoit pad sikandin to aporu, woy magaang pad sikandin to moirob no daruwa so gaang. 5 Ogdoog to kamatadyon ka poghipanow rin, woy ka daan din ogpakaparagas duon to lobonganan. 6 Kono din ogdoromdomon ka daan to koudyagan; nigsuwoysuwoy ka mgo daan din, di waro din matagoi. 7 No kuntoon, mgo anak ku no lukos, pamminogi a now; dokow ogsuwoy ligkat to innangon ku. 8 Pamariu ka to daan no marani to sikan no agkadyon no boi, woy doka’g dani to gomawan to baoy rin, 9 odyow no kono nu igkabogoy ka dadyagang nu duon to loin no otow woy ka mgo tuid nu duon to og-uang-uang koikow, 10 woy odyow no kono ogkokoon ka mgo kono’n duma nu puun to koikow no saapi, woy loin no otow ka ogkadatu puun to koikow no tarabau. 11 Ko ogkatapus on ka ukul nu ogdaow ka, no warad on dadyagang to lawa nu. 12 Ogsondit ka no kagi to “Manio to pig-usig ku ka pogsapad? Manio to pigsamilian to goinawa ku ka pogpatul-id? 13 Waro ku pamminoga ka nig-anad koddi, woy waro a nigpannalinga to mgo nigpadoromdom kanak. 14 Hantod to magaan ad ogkasiporan to taliwaro to tibon koot-otowan.”
15 Inom ka to woig ligkat to koikow ro no sakoruanan, woy ligkat to koikow ro no sobsob. 16 Manio to ogtu-aug ka sobsob nu duon to pagindaanan? Manio to ogtulibis ka woig nu duon to mgo limuranan to mgo otow? 17 Koikow ro porom sikan, woy kono igkopana-ad sikan to duma no otow. 18 Ogkaboligan porom ka sobsob nu, woy ogkarago ka ladyun porom to asawa no nigludyud koikow ligkat to baubato ka pad. 19 Hoo su mohubung sikandin unawa to punoy, woy dakol ka goinawa rin koikow – ogkabuung ka ladyun poron to sosoobon din, woy ungud ka ogkarago-dago porom to kandin no goinawa koikow. 20 Anak, manio to ogkarago-dago ka to boi no kono’n asawa nu? Manio to ogkop-kopan nu ka asawa to loin no lukos? 21 Hoo, su ogkitoon to Magboboot ka tibon mgo hinimuan to otow, woy ogmoog-moogan to Magboboot ka tibon mgo daan nu. 22 Ogkalit-agan ka maroot no otow pinabadyo to maroot no mgo hinimuan din, woy ogkabaku sikandin to sao din. 23 Ogkamatoy sikandin tongod su waro pogponod din, su nigsuwoysuwoy sikandin tongod to waro katagaanan din.