6
Moitongod to Pog-abin to Utang to Songo Otow
1 Anak, ko pig-abin nu ka utang to songo otow, ko nangulibot ka no ogbadyaran nu sikan, 2 ko nalit-agan ka to mgo ingkakagi nu, 3 no soini ka oghimuon nu, Anak. Poomot ka no ogpakalibuwas ka, su nadiraom kad on to pogboot to songo otow. Hondio ka to kandin woy pasaadsaad ka; poid-u-hoid-u ka to sikan no otow. 4 Doka'g himooy, woy doka'g pauguti ka mgo mata nu to pogpiung to hirogo. 5 Pallaguy ka, unawa to usa no ogpakasabuk to poggon-gon to nigpanitingon, woy unawa to manuk-manuk no ogpakasabuk to lit-ag to taagpanlit-ag.
Moitongod to Pogpamakut
6 Poguon no otow, pitowa nu ka makut. Doromdoma nu ka kandin no mgo hinimuan odyow no ogmougsob ka! 7 Waro taagsugu to makut, waro nigbabantoy, woy waro igbudyag, 8 di oglimuron din ka mgo ogkoonon din to guabung, woy ogpamuruton din ka koonon din to tinggaani. 9 Monu kaugoy no oghibat-hibat ka duon, poguon no otow? Kon-u ka og-onow ligkat to poghirogo nu? 10 Kagi nu to "Oghirogo a pad dagdagow, oghibat-hibat a pad, ogpangadyopkop a ro to doisok su oghimooy a." 11 Dokad di, oglopow ka igkawaroi nu unawa to bagani no oggopas.
Ka dorooti no Otow
12 Soini ka oghimuon to otow no dorooti woy waro puus: ungud og-uubat sikandin, 13 ogsingyas sikandin to pogpoitaga pinabadyo to mgo mata, mgo paa woy mgo boad din, 14 ogbabantaan sikandin to karootan no ogkoiniat to poggawoy, woy ungud ogwawangal sikandin. 15 No sikan ian no inogo ogkasaponan sikandin to igkobaybadyari; ogkagugus sikandin to sagboka ro no pogpoo-poo no konad ogkoulian. 16 Duon hon-om no igkabou to Magboboot, papitu no maligsom to pogpitow rin: 17 ka pogpitow no ogdoisok to duma, ka dilo no ungud og-ubat, mgo boad no ogpatuligis to langosa to otow no waro nakasao, 18 ka goinawa no ogbabantaan to maroot no oghimuon, mgo paa no matallong to pogparoog to karootan, 19 ka otow no ogpamaugot to ubat, woy ka otow no ungud ogwawangal taliwaro to mgo matal-taasuod.
Pogpamariu to Kono’n Asawa Nu.
20 Anak, pannalingaa nu ka mgo sugu to amoy nu, woy doka’g iniugi ka mgo udlin to inoy nu. 21Ibagkos nu ka innangon dan duon to goinawa nu, woy balioga nu sikan taman to katamanan. 22Ko oghipanow ka, ogtuonon ka to sikan. Ko oghirogo ka, ogbantadyan ka to sikan. Ko oggimuat ka, ogkagian ka to sikan. 23Hoo su, soini no mgo sugu sagboka no ilawan, woy kaadyag ka soini no mgo tuaro, woy ogpaka-aap koikow ka soini no mgo sapad duon to daan pohondio to koudyagan, 24woy ogpakapamariu koikow to boi no waro boot, ogkaasagan ka to mgo moomis no kinagian to boi no ogsuwoy-suwoy puun to iglukos din. 25Doka’g alig kandin duon to goinawa nu tongod su marodyow sikandin pitawon, woy doka’g pauguti no ogka-adyat ka tongod to marodyow no pogpitow rin koikow, 26su duon agkadyon no boi no oghulid to lukos to badyad to sagboka ro no pan, di ka asawa to loin no lukos og-agow to ukul nu. 27 Naan nu buwa no ogpaka-abon ka otow to hapuy no kono ogkatutung ka kinabo? 28 Naan nu no ogpakahipanow ka lukos to mgo baga no kono ogkatutung ka mgo paa rin? 29 Sikan dod ka lukos no oghulid to asawa to loin no otow; kono ogpakabutuas to logpad ka otow no oggon-gon to sikan no boi. 30 Kono oglomotan to mgo otow ka takawon no otow ko pigtakow rin do ka ogkoonon din su ogkabigtawan on to gutas. 31 Di agad to sikan, ko ogkarakop sikandin, ogbadyad sikandin to papitu no akob to pigtakow rin, agad ko ogkoubus ka tibon mgo kaaglagan to baoy rin. 32 Di waro marodyow no pogdoromdom to otow no oghulid to asawa to loin no otow. Ogguguson din do ka kandin no pog-ugpo. 33 Ogkabarasan sikandin woy ogkaawaan sikandin to kabantug woy kono ogkaawo ka igkasipod din taman to katamanan, 34 su ogkabou lagboy ka lukos ko ogpanalikud sikandin to asawa rin, woy kono ogkoid-u sikandin no ogsuli to pighimu to asawa rin. 35 Kono ogtinawo sikandin to husoy; ogligalon din ka igbotad agad ko monu karakol.