7
Ka Baubato no Nigsuwoy
1 Anak, pamminog ka to mgo kinagian ku, woy punpuna nu ka mgo sugu ku duon to goinawa nu. 2 Pannalingaa nu ka mgo sugu ku woy ogpalinggaat ka no manokal; ikannugun nu ka mgo igtuaro ku iing to indakoli to goinawa nu. 3 Ibagkos nu ka sikan duon to mgo komol nu, woy ibadlis nu duon to pusung nu. 4 Doromdoma nu no atoboi nu ka kougsoban, woy karumahan nu ka pogsabut. 5 Sikandan ka ogpakakaasag koikow puun to agkadyon no boi, ian ka ogsuwoy-suwoy no asawa no og-adyat koikow pinabadyo to mgo kinagian din.
6 Duon allow no nigpantow a duon to pantowanan ku, woy nigsosoilang a. 7Duon nakita ku taliwaro to mgo otow no waro katagaanan, sagboka no baubato no waro marodyow no pogdoromdom. 8Nighipanow sikandin duon to daan marani to baoy to agkadyon no boi, no nigpadoog to baoy rin. 9Katangkob on sikan, to pogbunsud to dooman. 10No to pogpitow ku duon boi no niglibuwas to baoy, iing to kinabo to agkadyon no boi ka insau-ub din no duon hinoos no tuud din. 11(Sagboka no boi sikandin no mabukao no ungud og-atu, woy kono og-ugpo sikandin to baoy rin; 12Songo ka kuo duon sikandin to pagindaanan, woy ko duon to mgo limuranan to mgo otow, no ungud ogtatagad duon to mgo babaakan.) 13Pigkopkopan to boi ka baubato woy pigharokan din sikandin woy nignangon ka boi to waro kasipod to 14"Duon saapu to mgo panubad to pogkasagboka kai to baoy ku kuntoon; hoo su pigtood ku ganna ka pangulibot ku duon to Magboboot. 15 No sikan ian no niglibuwas a odyow to pogtomu koikow; pigpamangho ku sikoikow woy nakitaan kud sikoikow! 16 Pighimpod kud ka hibatanan ku to mgo dorodyawi no manggad no puun to Ehiptu 17 woy pigsabukan ku pad to mgo poomut.? 18 Dii kad, woy ogkabuung ki to dakol no goinawa taman to kapawo; ogkarago-dago ki to poghulid! 19 Waro kai to baoy rin ka lukos; nighipanow sikandin to mariu no hipanowan. 20 Naponu to saapi ka kamudyut din poghipanow rin, woy kono ian og-uli sikandin taman to ogsandig ka buwan." 21 No sikan ian no pig-adyat to boi ka baubato odyow no ogpakasuwoy sikandin. Pig-adyat din sikandin pinabadyo to moomis no mgo kinagian din. 22 To waro poglianlian pigsundul to boi ka baubato unawa to baka no oghipanow pohondio to iowanan, woy unawa to usa no ogsagad dio to baatik 23 no ogkapilak ka atoy rin, woy unawa to manuk-manuk no og-agpas duon to lit-ag, no waro mataga sikandan no ogkamatoy naan sikandan.
24 No kuntoon, mgo anak, pamminogi a now; pannalinga kow to ogkagion ku. 25 Dokow ogpauguti ka goinawa now to pogsuwoy pohondio to mgo daan to sikan no boi, dokow ogdoog dio kandin. 26 Moon-ing ka otow no namua rin; songo puntuk to mgo otow ka pighimatadyan din. 27 Ka baoy rin ian ka mau-ag no daan pohondio to lobonganan, no ogtupang pohondio to mgo sinabong to kamatadyon.