8
Mgo Kinagian ni Kougsoban
1 Nig-umow si Kougsoban, woy nigmaagbot to pogkagi si Katagaanan. 2Nighasindog sikandin duon to mgo bub-bubungan to ilis to daan woy dio to babaakan. 3 Nig-umow sikandin topad to mgo gomawan no ogdoog to lunsud, duon to mgo lopowanan. 4 Kagi ni Kougsoban to "Og-umawon ku sikaniu no mgo otow; ogkagion ku to maagbot ka tibon mgo koot-otowan. 5 pamminog kow no mgo waro gindawanan odyow no kono kow ogkagawadyan, woy kaniu no kono ogdoromdom ogpakatinawo kow to pogsabut. 6 pamminog kow su duon marodyow no mgo ignangon ku; litos ka oglibuwas to bibig ku. 7 Tutuu ka ogkagion to bobo ku, su ogdomotan ku ka tibon karootan. 8 Mohusoy ka tibon mgo kinagian to bobo ku; waro ian no ogpakasuwoy no kono’n matul-id. 9 Ogpakapamaugot ka mgo otow no duon katagaanan no litos ka tibon mgo kinagian ku no waro makasuwoy. 10 Aama now ka igtuaro ku labow to saapi, woy ka katagaanan ku ampow to dorodyawi no bulawan, 11 su madmarodyow a to agad nokoy no mahalon no batu, woy waro ogkounawaan now kanak."
12 Ogparagas si Kougsoban to pogkagi to “Nig-ugpo a duma to marodyow no pogdoromdom, duon katagaanan ku woy marodyow no pogboot. 13 Ko ogkahallokan ta ka Magboboot ogdomotan ta ka karootan. Og-usigon ku ka pogparakol-dakol woy ka pogpagarol-garol, ka maroot no mgo hinimuan woy ka ogsuwoy no mgo kinagian. 14 Koddi ka duon marodyow no tambag woy poghusoy; koddi ka duon katagaanan woy kabogbogan. 15 Pinabadyo koddi oghari ka mgo hari, woy oghimu ka mgo igbudyag to litos no mgo udlin. 16 Pinabadyo koddi ogboboot ka marodyow no mgo datu, woy ka tibon mgo maddodyow no mgo igbudyag to kalibutan. 17 Dakol so goinawa ku to mgo otow no duon goinawa kanak, woy ogkitoon a to agad hontow no ogpamangho koddi. 18 Pinabadyo koddi duon saapi woy pogkabantug, duon matuarong no pogkadatu no ogpalinggaat. 19 Ka bogas ku madmarodyow to dorodyawi no bulawan, woy ka ogligkat kanak labow pad to saapi. 20 Oghipanow a to daan to pogkamatuarong, duon to mahusoy no mgo daan 21 no ogpambogadyan ku to saapi ka mgo otow no duon dakol no goinawa koddi, no ogkaponu ka mgo sabukanan dan to mgo kaaglagan.”
22 Ogparagas ogkagi si Kougsoban to “Pighimu a to Magboboot no an-anadyan no hinimuan din, to waro pad mabunsuri ka duma no mgo hinimuan din to dongan pad. 23 Pigsabuk a rin puun to binunsuran to dongan pad to waro pad pighimu ka kalibutan. 24 To waro pad mgo dagat woy mgo sobsob no ogtu-augan to dakol no woig, nohimu ad on taan. 25 To waro pad insabuk ka mgo dagdakol woy malmaintok no bubungan to mgo longod dan, nohimu ad on taan. 26 To waro pad pighimu rin ka tano woy ka mgo pinamua-an woy ka abug duon to kalibutan, duon ad. 27 To pogsabuk to Magboboot to langit duon to ampow, woy to pogbadlis din to patamanan to langit dio to ampow to mgo woig, duon ad. 28 To poghal-ag din to mgo kibol dio to ampow, woy to pogsabuk din to mgo sobsob to diraom, duon ad. 29 To poghimu rin to oatan to dagat odyow no kono oglampas ka mgo woig to sugu din, woy to pog-adyad-adyad din to mgo sungkaug to kalibutan, duon ad. 30 No sikoddi ka mapandoy no duma rin. Narodyowan a lagboy allow-allow, no narago a to pogduma kandin, 31 woy narago a to tibon kalibutan, woy narodyowan a to koot-otowan no pighimu rin.”
32 Nigkagi pad si Kougsoban to "No kuntoon, mgo anak ku, pamminogi a now; ogkaboligan ka otow no og-unug to mgo daan ku. 33 pamminoga now ka igtuaro ku odyow no ogmougsob kow; dokow ogbaagara. 34 Ogkaboligan ka otow no ogpamminog kanak no si Kougsoban, ogbabantoy sikandin allow-allow duon to mgo lokob ku, woy ogtagaran a rin duon to gomawan to baoy ku. 35 Hoo su agad hontow no ogpakakita kanak ogpakakita to koudyagan woy ogpakatinawo sikandin to karodyowan puun to Magboboot. 36 Di agad hontow no kono ogpakakita koddi oglogparan din ka kandin do no lawa; kamatadyon naan ka indakoli to goinawa to otow no ogdomot koddi.”