Panuaro 9

Ka Poghinggat ni Kougsoban woy ni Ka-angol

¹ Pighimu ni Kougsoban ka dorodyawi no baoy rin no duon papitu no suwoy. ² Pig-iow rin on ka mgo adyam din, woy pinogsoug din on ka binu rin; pighimpod din on ian ka koonanan din. ³ Inpa-aap din on ka mgo suguanon din no mgo boi odyow to pog-umow to poghinggat duon to matikang no mgo baoy to lunsud. ⁴ Kagi rin duon to mgo otow no waro marodyow no boot “Kai kow tibo no mgo waro gindawanan!” ⁵ “Dii kow, koona now ka koonon ku woy inuma now ka binu no pinogsoug kud on. ⁶ Ongkori now ka mgo daan now to waro gindawanan odyow no ogkoudyag kow; hipanow kow to mgo daan to pogsabut.” ⁷ Kagi pad ni Kougsoban to “Ogkatambaboan ka otow no ogtul-id to otow no taagsuy-at; woy ogpandooton ka otow no ogsapad to dorooti no otow. ⁸ Doka'g sapad to taagsuy-at no otow su og-usigon ka rin; di ko ogsaparan nu ka mougsob no otow, ogdakolon din ka goinawa rin koikow. ⁹ Tuona nu ka mougsob no otow woy ogkatimuan pad ka kougsoban din; nangnangoni nu ka matuarong no otow woy ogkatimuan pad ka katagaanan din.” ¹⁰ Ogparagas si Kougsoban to "Ka pogkahallok duon to Magboboot ian ka binunsuran to kougsoban, woy ka katagaanan to In-oog no Magboboot ian ka pogsabut. ¹¹ Hoo su pinabadyo koddi ogmoon-ing ka mgo allow nu, woy ogkatimuan ka mgo tuid to ukul nu. ¹² Ko ogmougsob ka, ogkadassagan ka to kougsoban nu; di ko ungud ka ro ogsuy-at, koikow ro ka ogkabaybadyaran.”

¹³ Mabukao no boi no si Ka-angol; kono ogkasaparan sikandin, woy waro katagaanan din. ¹⁴ Nigpinnuu sikandin duon to gomawan to baoy rin, duon to sagboka no pinnuuanan to ampow-ampow to lunsud. ¹⁵ Oghinggaton din ka mgo otow no ogligad; mgo otow no oghipanow to marodyow. ¹⁶ Kagi ni Kaangol duon to mgo otow no waro litos no boot to “Kai kow tibo no mgo waro katagaanan! ¹⁷ Hoo su moomis ka pigtakow no woig; woy managomnom ka koonon no ogkoonon to oghoos!” ¹⁸ Waro mataga naan ka mgo otow no ogkammatoy ka ogsood to baoy ni Ka-angol, woy ka pigpanhinggat din ian ka nigdoog to lobonganan.