10
Mgo Panuaro ni Solomon
1 Soini ka mgo pogpanuaro ni Solomon: Ogkarago ka amoy to mougsob no anak din, di ogmasakit ka goinawa to inoy to angol-angol no anak din.
2 Waro puus to karatuan no pigpurut pinabadyo to maroot no hinimuan, di ogpakapangabang to otow puun to kamatadyon ka pogkamatuarong din.
3 Kono ogpaugutan to Magboboot no oggutasan ka matuarong no otow, di ogbaabagan din ka noibogan to maroot no otow.
4 Ogkawaraan ka otow no kono ogpamakut, di ogkadatu ka otow no ogpoomot.
5 Mougsob no anak ka ogpunpun to mgo bogas to tinggaani, di makasisipod ka anak no oghidhirogo to tig-oogba.
6 Ogkaboligan ka matuarong no otow, di ogpatultuarong to pogkagi ka maroot no otow to poghoos to kabuuti rin.
7 Ogkaboligan ka mgo otow ko ogdoromdomon dan ka mgo matuarong no otow, di ogkamou do ka ngaran to mgo maddoot no mgo otow.
8 Ogtinawo to mgo sugu ka mougsob no otow, di ogkabaybadyaran ka angol-angol no otow no wangaon.
9 Kono ogkasasow ka otow no kono ogsuwoy-suwoy to litos no daan, di kono ogpakahoos ka otow no ogtiku-tiku to ogbadyaan din.
10 Ogmasakit ka goinawa to mgo otow ko ogkagawadyan sikandan, woy ogkabaybadyaran ka angol-angol no otow no wangaon.
11 Unawa to marodyow no sobsob no ogbogoy to koudyagan ka mgo kinagian to matuarong no otow, di ogpatultuarong to pogkagi ka maroot no otow to poghoos to kabuuti rin.
12 Ogpakapapukow to pog-ogot ka maroot no goinawa, di moon-ing ka mgo sao no ogkabunbunan to marodyow no goinawa.
13 Mougsob ka mgo kinagian to otow no ogkatou to pog-aam to marodyow, di ogkalamposan ka otow no kono ogkatou to pog-aam to marodyow.
14 Ogpunpunon to mougsob no otow ka katagaanan din, di magaan ogkaguak ka pog-ugpo to wangaon no otow.
15 Ogkakaasagan ka mgo datu pinabadyo to saapi dan, di waro ig-atang to mgo otow no nawaraan.
16 Koudyagan ian ka badyad to pogkamatuarong, di mgo logpad ian ka badyad to karootan.
17 Agad hontow no ogpannalinga to pogsapad ogpakatuon to duma to daan to koudyagan, di ka otow no kono ogpamminog to ignangon ogpakapasuwoy to duma pad no otow.
18 Ubaton ka otow no oghoos to pogdomot din, woy angol-angol ka otow no ogpatangkap to taosob.
19 Ogpakasao ka otow ko moon-ing on ka igkakagi, di mougsob ka otow no ogpo-onong-onong do to pogkagi.
20 Unawa to dorodyawi no plata ka mgo kinagian to matuarong no otow, di waro puus ka goinawa to maroot no otow.
21 Moon-ing ka ogkabuung puun to mgo kinagian to matuarong no otow, di ogkammatoy ka mgo otow no angol-angol su waro marodyow no doromdom dan.
22 Ogpakadatu ka pogbolig to Magboboot, woy waro igtimul din no igkobaybadyari.
23 Angol-angol ka otow no ogkarago to poghimu to karootan, di igkarago to ogpakasabut no otow ka kougsoban.
24 Ogkoumaan ka maroot no otow to noipongan din, di ogkabogadyan ka matuarong no otow to noiniatan din.
25 Ko ogligad on ka daldaa-ot, ogka-awo ka maroot no mgo otow, di ogpalinggaat ka mgo matuarong to waro katamanan.
26 Unawa to suka duon to mgo ngipon ta, woy unawa to obol duon to mata ta ka poguon no suguanon duon to nigsugu kandin.
27 Ogkatimuan ka ukul ta ko ogkahallok ki duon to Magboboot, di ogmaupoton ka ukul to maroot no mgo otow.
28 Ka karago ian ka ogko-im-imanan to mgo matuarong no otow, di kono ogkatood ka noim-imanan to mgo maroot no otow.
29 Ka daan to Magboboot ian ka madigon no aputanan to mgo matuarong, di ogkagugus dio ka nighimu to karootan.
30 Kono ogkabagnus ka mgo matuarong no otow, di kono ogpalinggaat ka mgo maroot duon to tano.
31 Kougsoban ka oglibuwas to bobo to matuarong no otow, di ka dilo no ogsuwoy-suwoy ogkatamporan.
32 Nataga ka matuarong no otow ko nokoy ka litos no ogkagion, di ogpasulsuwadyon ka ogkagion to maroot no otow.