11
1 Ogdomoton to Magboboot ka kono’n litos no timbangan, di ogkarago sikandin to maugot no kiluhan.
2 Ogkasiporan ka otow no ogparakol-dakol, di ogpokogludyud ka pogpasaad-saad woy ka kougsoban.
3 Kono ogpakatipas ka matuarong no otow su kono ogsuwoy-suwoy sikandin, di ogkaguak ka pog-ugpo to mgo otow no kono ogkasaligan tongod to kandan no poggawoy.
4 Waro puus to saapi to allow to poglogpad, di ogpakalipuwas to otow ka pogkamatuarong din.
5 Ka pogkamatuarong dan ian ka ogtul-id to daan to mgo otow no waro igkosawoy, di ka karootan dan ian ka ogpakapasaligkat to mgo maddoot no otow.
6 Ogpakabutuas ka marodyow no otow tongod to pogkamatuarong din, di ogkalit-agan ka kono ogkasaligan no otow tongod to maroot no mgo noibogan din.
7 Ko ogkamatoy ka maroot no otow, songo ogkamatoy ka noim-imanan din; warad on puus ka pigsaligan din no kabogbogan.
8 Ogkapangabangan ka matuarong no otow duon to koirapan, di ka maroot no otow atag ka oglopowan to sikan no igkobaybadyari.
9 Ogkagugus ka pog-ugpo to otow pinabadyo to kinagian to songo baoy rin no mariu to Magboboot, di pinabadyo to katagaanan dan ogkalipuwasan ka matuarong no otow.
10 Ko ogtulin ka matuarong no otow, ogkarago ka tibon mgo otow to lunsud, woy ko ogkamatoy ka maroot no otow, moon-ing ka ogkukuus.
11 Ogmabantug ka sagboka no lunsud ko ogkaboligan to matuarong no otow, di ogkagugus ka lunsud pinabadyo to bobo to dorooti no otow.
12 Waro marodyow no pogdoromdom to otow no ogtambabo to songo baoy rin, di ogpo-onong-onong do ka otow no duon marodyow no pogdoromdom.
13 Ogpuwasan to wangaon no otow ka ighoos no kinagian, di kono ignangon-nangon sikan to otow no ogkasaligan.
14 Ogkaro-og ka nasud ko waro marodyow no igtuaro, di ogpakaroog sikan ko moon-ing ka ogtambag.
15 Ogkabaybadyaran ka otow no ogpasalig to pogbadyad to utang to duma no otow, di waro igkosasow to otow no ogligal to pogpangulibot.
16 Ogkatimuan ka pog-ila to boi no maomu, di saapi do ka igkatimul to lukos no waro koid-u.
17 Ka otow no moid-uon to duma ogbulig to kandin do no pogkootow, di ka otow no waro koid-u to duma ogpang-umow to igkobaybadyari rin.
18 Waro puus to saapi no ogkatinawo to maroot no otow, di ka otow no og-orok to pogkamatuarong ogga-ani to dassag no kono ogka-awo.
19 Ogpakatinawo to koudyagan ka matuarong no otow, di ogdoog do to kamatadyon ka otow no ogsundul to karootan.
20 Og-usigon to Magboboot ka otow no ogpasuwoy-suwadyon ka goinawa, di igkarago din ka mgo otow no waro igkosawoy.
21 Ogkasaligan soini; kono ogpokohoos to logpad ka maroot no otow, di ogpakalibuwas ka matuarong no otow.
22 Iing to bulawan no galunggalung duon to irong to baboy ko duon mohubung no boi no waro marodyow no pogdoromdom.
23 Ka ogkoiniatan to matuarong no otow ogdoog to karodyowan, di ka og-im-imanan to maroot no otow ogdoog do to kabou to Magboboot.
24 Duon otow no mabogoy-bogoy, di ogdakol pad ka duon to kandin; duon dangob no otow no logoron, di ogkawaraan on sikandin atag.
25 Ogtulin ka otow no mabogoy-bogoy; ogkabuligan ka otow no ogbulig to duma.
26 Ogkatungadyawan to mgo otow ka otow no og-oog to bogas no dakol, di ogkaboligan ka otow no ogduad to sikan.
27 Ogpakakita to karodyowan ka otow no ogpamangho to karodyowan, di karootan ian ka oglopow to otow no ogpamangho to karootan.
28 Ogkapood ka otow no ogsandig duon to pogkadatu din, di ogkounawa to moilow no doun no kono ogkagangu ka otow no matuarong.
29 Waro ogkatinawo to otow no og-aap to igkobaybadyari duon to lunggunan din, woy ogkohimu no suguanon to mougsob no otow ka angol-angol no otow.
30 Koudyagan ian ka bogas to matuarong no otow, di kamatadyon ian ka bogas to mabuut no otow.
31 Ko tutuu ian no ogkasulian ka matuarong no otow kai to tano, labow pad ka otow no kono ogtuu to Magboboot woy ka otow no ogpakasao.