12
1 Ka otow no duon goinawa to katagaanan ogkarago ko ogsaparan sikandin, di waro marodyow no pogdoromdom to otow no ogkabou ko ogsaparan sikandin.
2 Ogpakatinawo to karodyowan puun to Magboboot ka otow no marodyow, di ogsao-on to Magboboot ka otow no ogbabantaan to maroot.
3 Kono ogpakapos-ok ka pog-ugpo to otow pinabadyo to karootan, di kono ogkabagnus ka pog-ugpo to otow no matuarong.
4 Igkabantug to lukos ka igboi no maungangon, di unawa to igkamou to mgo bokog to lukos ka igboi no oghimu to makasisipod.
5 Mahusoy ka ogbantaanon to mgo matuarong no otow, di ogpakagawoy ka tambag to maroot no otow.
6 Ogpakamatoy ka mgo kinagian to maroot no otow, di ogpakapangabang kandan ka kinagian to matuarong no otow.
7 Ogkaro-og ka maroot no mgo otow woy warad on sikandan, di kono ogka-antog ka lunggunan to matuarong no otow.
8 Ogkasadyo ka otow tongod to kougsoban din, di ogkasamilian ka otow no ogpasulsuwadyon ka pogdoromdom.
9 Madmarodyow ka kono ogkangaranan no otow no duon suguonon to otow no ogpatuu no mabantug sikandin dokad di waro ogkoonon din.
10 Agad ka adyam to matuarong no otow ogkabantadyan din to marodyow, di waro koid-u agad to dorodyawi no’g himuon to maroot no otow.
11 Dakol ka ogkakoon to otow no ogpoomot to pogkakamot, di waro marodyow no pogdoromdom to otow no ogsundul to waro puus no mgo daan.
12 Ogko-ibogan to maroot no otow ka ogkoutol pinabadyo to karootan, di ogmarodyow ka pog-ugpo to matuarong no otow.
13 Ogkalit-agan ka maroot no otow pinabadyo to masuwoy-suwoy no kinagian din, di ogpakamariu to koirapan ka matuarong no otow.
14 Ogkaantoy ka otow puun to bogas to marodyow no mgo kinagian din, unawa to ogkadassagan sikandin puun to pogpoomot to mgo boad din.
15 Naan to angol-angol no otow no litos ka kandin no daan, di ogpamminogon to mougsob no otow ka tambag to duma no mgo otow.
16 Ogpoitaga dadyon no nabou sikandin ka otow no waro marodyow no pogdoromdom, di ogbaagaron to otow no marodyow to pogdoromdom ko ogtambaboon sikandin.
17 Ogpoitaga to kamaugotan ka otow no ogkagi to litos, di oggawoy ka otow no ogpamaugot to ubat.
18 Ogkasakitan ka mgo otow pinabadyo to mgo kinagian to otow no kono ogdoromdom panoy, di ogkoulian ka igmasakit to goinawa pinabadyo to mgo kinagian to mougsob no otow.
19 Ogpalinggaat taman to katamanan ka otow no ogkagi to kamaugotan, di magaan ogkaawo ka otow no ogkagi to ubat.
20 Mgo gawoy ka duon to goinawa to mgo otow no ogbabantaan to karootan, di karago ka duon to goinawa to mgo otow no ogpatangkap to kahanong.
21 Waro karootan no oglopow duon to matuarong no otow, di ladyun oglopowan to koirapan ka dorooti no otow.
22 Og-usigon to Magboboot ka otow no ogkagi to ubat, di ogkarago sikandin to mgo otow no ogkagi to kamaugotan.
23 Kono ogpangagikagi ka otow no duon marodyow no pogdoromdom to tibo no natagaan din, di ogpoitaga ka angol-angol no otow to pogka-angol din.
24 Ogkohimu no igbudyag ka mapamakut no otow, di ogkohimu no uripon ka poguon no otow.
25 Ogmabogat ka goinawa to otow ko duon igkasasow rin, di ogma-agkap ka goinawa rin ko duon ogkagi to marodyow kandin.
26 Ogpoko-inagak to mgo duma rin ka matuarong no otow, di ogpakasaligkat kandan ka dorooti no otow.
27 Kono ogsugnu-on to poguon no otow ka pigpanitingon din, di ogtapiron to mapamakut no otow ka mgo kaaglagan din.
28 Duon koudyagan to daan to matuarong no otow, di ogdoog to kamatadyon ka daan to karootana.