24
Ka litos no tubad
1 -17. To binunsuran to soini kapitulu 24, nignangon ka kasulatan no pigsool ni David ka mgo sundau rin to tibon pandatuan din. Sao soini duon to Magboboot su nigpasabut no nigsalig sikandin to koon-ingan to mgo otow rin, woy konon duon to Magboboot. Tongod to sikan nigpa-aap ka Magboboot to logpad no mokohinhinaat no dau.
18 To sikan no allow, nighondio si Gad ki David woy nignangon sikandin to “Hondio ka duon to giokanan ni Arauna no kapunganan ni Yibus, woy himu ka to tubaranan to Magboboot dio.” 19 No nighondio si David sumao to sugu to Magboboot pinabadyo ki Gad. 20 To pogtonggak ni Arauna nakita rin ka hari woy ka mgo otow rin no nigpadoog kandin, niglibuwas sikandin no nig-unduk pohondio to tano to tangkaan to hari. 21 Nig-inso si Arauna to “Manio to nighondii ka igbudyag ku no hari kai to soini no suguanon din?” Nigtabak si David to “Nighondii a odyow to pogboli to giokanan nu odyow no ogpakahimu a to tubaranan duon to Magboboot odyow no oghagtong on ka dau duon to mgo otow.” 22 Nigkagi si Arauna ki David to “Ogpuruton do porom to igbudyag ku no hari ka agad nokoy no ogkoiniatan din no igtataruwoy. Duon mgo baka kai no ogkohimu no tutungonon no tubad, duon mgo kaaglagan to poggiok woy yugu to baka no ogkohimu no igtotomog. Igbogoy ku soini tibo koikow, hari.” 23 Woy nigparagas si Arauna to “Ogtinawoon ka porom to Magboboot no Igbudyag nu.” 24 Di nigtabak si David no hari ki Arauna to “Kono! Ogbadyaran ku ian sikoikow to tibo. Kono ogkohimu no duon igtataruwoy ku no mgo tutungonon no tubad duon to Magboboot no Igbudyag no waro ku igkabaybadyari.” No sikan ian no pigboli ni David ka giokanan woy ka mgo baka. Kalimmaan no malison no plata no saapi ka inbadyad din. 25 Nighimu si David to tubaranan to Magboboot dio, woy nigtubad sikandin to mgo tutungonon no mgo tubad woy mgo tubad to pogka-sagboka. No, pigtabak to Magboboot ka mgo inbudyu dan tongod to ugpaan dan ian no nighagtong on ka dau duon to Israil.