1 Samuel 1

1 Samuel

Ka pogko-otow ni Samuel

¹ No kuntoon, duon sagboka no lukos no matig Ramataim. Kapunganan sikandin ni Sup no nig-ugpo to kabubunganan to Ipraim. Ka ngaran to otow ian si Ilkana, no anak ni Yiroham, no anak ni Ilihu, no anak ni Tohu, no anak ni Sup no matig Ipraim. ² Daruwa ka mgo asawa ni Ilkana. Ka sagboka ian si Hanna woy ka dangob ian si Pinina. Duon mgo anak ni Pinina, di waro anak ni Hanna. ³ Kara tuid, nighondio soini no lukos ligkat to lunsud din odyow to pogsadyo woy pogtubad duon to Magboboot no Mabogbog to tibo dio to Silo. To sikan no mgo tuid, si Hopni woy si Pinihas no mgo anak ni Ili ian ka mgo taagpanubad dio. ⁴ Kara tuid to poglopow to allow to pogpanubad ni Ilkana, ogtaaran din to saapu ka asawa rin no si Pinina woy ka mgo anak din no mgo lukos woy mgo boi. ⁵ Di, dio to ki Hanna daruwa no akob ka intaad din su dakol so goinawa rin kandin woy su pigponod to Magboboot ka pogpanganak ni Hanna. ⁶ Woy tongod to pogsagpong to Magboboot to aanakan ni Hanna, nig-ungud nigdiampo si Pinina kandin odyow no ogkasakitan ka goinawa rin. ⁷ Nigparagas soini to moon-ing no mgo tuid. Kara poghondio ni Hanna to baoy to Magboboot, nigsuy-at si Pinina kandin taman to ogsinogow si Hanna woy konad ogkoon. ⁸ Ognangon ka iglukos din no si Ilkana kandin to “Hanna, manio to nigsinogow ka? Manio to kono ka ogkoon? Manio to nigmasakit ka goinawa nu? Waro ka buwa nigdoromdom no madmarodyow a pad to sampuu no anak no lukos porom koikow?”

⁹ To sagboka no tuid to sikan, to nigtakas on sikandan to pogkoon woy pog-inom dio to Silo, nighasindog si Hanna. No kuntoon, nigpinnuu si Ili no taagpanubad duon to pinnuuanan to longod to gomawan to baoy no panubaranan to Magboboot. ¹⁰ Ligkat to masakit lagboy no goinawa rin, nigsinsinogow si Hanna, woy nigpannanoy sikandin duon to Magboboot. ¹¹ Nigpangulibot sikandin duon to Magboboot no kagi “Magboboot no Igbudyag to tibo, ko ogpitawon nu ro porom ka igmasakit to goinawa to soini no suguanon nu no ogdoromdomon a nu, woy kono a nu ogbaagaron, no ogkabogadyan a nu to anak no lukos, igbogoy ku ka bato koikow, Magboboot, woy ogga-at sikandin koikow to tibon mgo allow to ukul din, woy kono ogkakagisan ka uu rin agad kon-u.” ¹² To pogpanabisabi ni Hanna duon to Magboboot, nigpipitow si Ili to bobo din. ¹³ Nigpanabisabi si Hanna duon to goinawa rin, woy nigwoil-woil ka mgo bibig din, di kono ogkarinog ka lagong din. Naan ni Ili no nalasing sikandin, ¹⁴ woy nigkagi sikandin ki Hanna to “Kon-u ka pad ogtakas to pog-inom-inom? Ongkori nud ka binu.” ¹⁵ Nigtabak si Hanna to “Kono’n maugot sikan, Anggam. Sagboka a no boi no duon dakol no igkasasow. Waro a nig-inom to binu woy ko beer. Nignangon-nangon a to Magboboot ko nokoy ka duon to diraom to goinawa ku. ¹⁶ Dokag doromdom no sagboka no maroot no boi soini no suguanon nu. Nigpanabisabi a kai ligkat to dakol no igmasakit to goinawa ku.” ¹⁷ Nigtabak si Ili to “Hipanow ka to maawang no goinawa, woy ogpaugutan porom to Magboboot ka pigbudyu nu kandin.” ¹⁸ Nigkagi si Hanna to “Ogkarodyowan ka porom to pogpitow to soini no suguanon nu.” No nighipanow si Hanna, nigkoon sikandin woy nigmaawang on so goinawa rin.

¹⁹ Masoom pad to pogkapawo, nig-onow sikandan no nigsadyo to tangkaan to Magboboot, woy nig-uli sikandan duon to Rama. Nighulid si Ilkana to asawa rin no si Hanna, woy pigdoromdom sikandin to Magboboot. ²⁰ No to kaugadyan, naboros si Hanna woy naka-anak sikandin to lukos. Pighingaranan din ka bato ki Samuel no kagi rin to “Hoo su pigbudyu ku sikandin to Magboboot.” ²¹ To sunud no tuid to poghondio ni Ilkana duma to lunggunan din odyow to pogpanubad to Magboboot woy odyow to pogtood to pangulibot din to Magboboot, ²² waro nigludyud si Hanna. Nigkagi sikandin duon to iglukos din to “Ko nalutas on ka bato, og-aapon ku sikandin woy igtaruwoy ku sikandin duon to Magboboot, woy dio sikandin og-ugpo taman to katamanan.” ²³ Nigtabak si Ilkana no asawa rin kandin to “Himua nu ko nokoy ka naan nu no marodyow. Palinggaat ka kai taman to nalutas nud sikandin. Di ogtooron porom to Magboboot ka ingkagi nu.” No sikan ian no nigpalinggaat ka boi woy nigpasusu sikandin to anak din taman to nalutas on. ²⁴ Takas to nalutas ka bato, pig-aap sikandin ni Hanna, agad to maintok pad sikandin duon to baoy to Magboboot dio to Silo. Songo nig-aap si Hanna to sagboka no lukosan no baka no tatou on no tuid ka kabudyagi rin, woy to sagboka no lata no harina woy songo sooranan no naponu to binu. ²⁵ Takas to inpanubad dan ka baka, pig-aap dan ka bato dio ki Ili, ²⁶ woy nignangon si Hanna kandin to “Unawa to manokal ka rod, Anggam, sikanak ian ka boi no nigtopad koikow kai no nigpanabisabi to Magboboot. ²⁷ Nigpamudyu a to Magboboot no ogka-bogadyan a to soini no bato, woy pigpaugutan to Magboboot ka inbudyu ku. ²⁸ No kuntoon igbogoy ku ka bato duon to Magboboot. Tagood to manokal pad sikandin, ian tagtuun to ukul din ka Magboboot.” Woy pigsadyo ni Samuelka Magboboot dio.