Ruth 4

Nig-asawa Si Ruth Ki Boas

¹ No kuntoon, nighondio si Boas to gomawan to lunsud woy nigpinnuu sikandin dio. To poglopow to karumahan din no songo ogpakabaukas no innangon din ki Ruth, nigkagi si Boas to “Dii kad, Suod, pinnuu ka.” Woy nigdani sikandin woy nigpinnuu sikandin. ² Piglimud ni Boas ka sampuu no budyag to sikan no lunsud, woy pignangonan din sikandan to “Pinnuu kow kai,” woy nigpinnuu sikandan. ³ No nigkagi si Boas duon to karumahan no ogpakabaukas to “Nig-uli si Naomi ligkat to Moab, woy kuntoon, ogbaligyoon din ka tano no ian tagtuun nokani si Ilimilik no suod ta. ⁴ Nigdoromdom a no marodyow ko ognangonan ku sikoikow, woy kai to tangkaan to soini no mgo otow no nigpinnuu kai woy kai to tangkaan to soini no mgo igbudyag to koot-otawan ku og-inso a koikow ko ogbolion nu. Ko oglokaton nu ka tano, no marodyow. Di ko kono ka, nangoni a nu, odyow no ogkataga a. Su sikoikow ro ian ka duon katondanan to poglokat to sikan, woy sikoddi ka igkorangob.”

Nigtabak ka otow to “Oglokaton ku.”

⁵ No nigkagi si Boas to “No, to allow no ogbolion nu ka tano ligkat ki Naomi woy ligkat ki Ruth no matig Moab, songo ogtinawoon nu ka bau to namatoy no lukos, odyow no igkaparagas nu ka ngaran to namatoy no otow duma to tano din.”

⁶ To pogdinog din to sikan, nigkagi ka karumahan no ogpakabaukas to “Ko maugot sikan, kono a naan ogpakalokat to tano, su naugpa ogmaintok ka ogkatinawo to mgo anak ku ko ogkamatoy a. Koikow ro ka oglokat su kono a.” ⁷ (No to dongan no mgo allow to Israil, odyow to pogpamaugot to poglokat to tano woy odyow no ogkahalin ka pogkatagtuun no konad ogkohutuk, ogluung ka sagboka no otow to sagboka no sandalyas din woy igbogoy rin to dangob no otow. Sikan ian ka daan dan nokani to Israil to pogpamaugot to pogbaligyo.) ⁸ No sikan ian, nigkagi ka karumahan no ogpakabaukas dio to ki Boas to “Koikow ro ka ogboli to sikan,” woy pigluung din ka sandalyas din.

⁹ No nigkagi si Boas to tangkaan to mgo igbudyag woy to tibon mgo otow no duon to “Kuntoon no allow, ogpakapamaugot kow no naboli kud ligkat ki Naomi ka tibon tano ni Ilimilik, ni Kilion woy ni Malon. ¹⁰ Songo natinawo ku si Ruth no matig Moab, no bau ni Malon, no ogkohimu on no asawa ku, odyow no kono ogka-awo ka ngaran din to lunggunan din, woy kono ogka-awo sikandin to mgo ngaran to lunsud ta. Sikaniu ka ogpakapamaugot!”

¹¹ No nigkagi ka mgo igbudyag woy ka tibo no duon to gomawan to lunsud to “Hoo, ogpakapamaugot koy. Ogkaboligan to Magboboot porom ka boi no ogsood to lunggunan nu, unawa to pogbolig din ki Rakil woy ki Lia nokani no ian ka puunan to tibon koot-otawan to Israil. Ogdakol ka ngaran nu to Iprata porom, woy ogkangaranan ka to Bitlihim. ¹² Pinabadyo to mgo kapunganan no igbogoy to Magboboot koikow pinabadyo to soini no bato pad no boi, ogkohimu porom no ka lunggunan nu og-unawa to lunggunan ni Piris no in-anak ni Tamar ki Juda nokani.”?

¹³ No sikan ian, no pigpurut ni Boas si Ruth, woy no asawa rin. No pighuliran din sikandin, woy pigpaugutan to Magboboot no ogkaboros si Ruth, woy naka-anak sikandin to lukos. ¹⁴ Nigkagi ka mgo boi to lunsud ki Naomi to “Ogsadyoon ta ka Magboboot, su waro ka rin baagara kuntoon no allow su pigbogadyan ka rin to karumahan no ogpakabaukas. Ogkangaranan ka soini no bato porom to tibon Israil! ¹⁵ Ilibong din ka goinawa nu, woy ogpakabantoy sikandin koikow to pogkabudyag nu. Hoo, su anak sikandin to amboi nu no madmarodyow koikow to papitu no anak no lukos porom.”

¹⁶ No pigpurut ni Naomi ka bato, piggiba rin, woy pig-udyamu rin. ¹⁷ Nigkagi ka mgo boi no nig-ugpo duon to “Duon man on anak no lukos ni Naomi.” Pighingaranan dan sikandin ki Obid. Sikandin ka no amoy ni Isai, no no amoy ni David.?

¹⁸ Soini naan ka mgo kapunganan ni Piris:

Si Piris ian ka amoy ni Hisron,

¹⁹ si Hisron ian ka amoy ni Ram,

woy si Ram ian ka amoy ni Amminadab.

²⁰ Si Amminadab ian ka amoy ni Nason,

woy si Nason ian ka amoy ni Salmon.

²¹ Si Salmon ian ka amoy ni Boas,

woy si Boas ian ka amoy ni Obid.

²² Si Obid ian ka amoy ni Isai,

woy si Isai ian ka amoy ni David.