Ruth 3

Si Ruth Woy Si Boas Dio To Giokanan

¹ Songo allow to sikan, nignangon si Naomi no anugang din ki Ruth to “Anak ku, kono buwa no marodyow ko ogpamangho a to lunggunan no litos koikow, odyow no duon ogbantoy koikow? ² Kono buwa no karumahan ta si Boas no ian igbudyag to mgo suguanon no boi no pigdumaan nu? Angkuwan to maukilom ogpapaadyap sikandin to sibada dio to giokanan. ³ No, parigus ka woy popohomut ka, woy isau-ub nu ka dorodyawi no mgo kinabo nu. No hondio ka to giokanan, di hoos ka pa odyow no kono ka rin ogkitoon taman to ogtakas sikandin to pogkoon woy to pog-inom. ⁴ Ko oghibat on sikandin, indani nu ko hondoi sikandin oghibat. No, hondio ka woy wakisa nu ka tol-ob to paa rin, woy hibat ka duon. Ognangon sikandin koikow ko nokoy ka oghimuon nu.”

⁵ Nigtabak si Ruth to “Oghimuon ku ka tibo no innangon nu.”

⁶ No sikan ian, nighondio si Ruth to giokanan woy pighimu rin ka tibo no innangon to anugang din kandin. ⁷ To nigtakas on si Boas to pogkoon woy to pog-inom, narago-dago sikandin, woy nighondio sikandin odyow to poghibat dio to koopusan to linimud no bogas to sibada. No nigdani si Ruth kandin no nighimuung lagboy. Pigwakis din ka tol-ob to mgo paa ni Boas, woy nighibat sikandin.

⁸ Taliwaro to kaukiloman, na-alimukowan si Boas to poghirogo din, woy nigbalikid sikandin woy no-inu-inu sikandin no duon boi no nighibat to longod to mgo paa rin.

⁹ Nig-inso sikandin to “Hontow ka?”

Nigtabak si Ruth to “Kanak ka suguanon nu no si Ruth. Tol-obi a nu to koopusan to uwoson nu, su sikoikow sagboka no karumahan noy no ogpakabaukas.”

¹⁰ Nigtabak si Boas to “Ogkaboligan ka to Magboboot porom, anak ku. Soini no pogpakita nu to koid-u to anugang nu dakol-dakol to nokohun-a. Waro ka niggapon to mgo baubato pad no mgo lukos, agad ko datu woy ko nawaraan sikandan. ¹¹ Woy kuntoon, anak ku, doka ogkahallok. Oghimuon ku ka tibo no inbudyu nu. Nataga ka tibon mgo otow dio to lunsud no matuarong ka no boi. ¹² Di, agad no maugot no marani a no karumahan now, duon sagboka no otow no madmarani pad koddi, no songo duon katondanan to pogbaukas. ¹³ Kai ka ro oghibat kuntoon no maukilom, woy asoom masoom ogpitawon ta ko ogkoiniat sikandin to pogbaukas. Ko ogkoiniat sikandin, no marodyow, sikandin ka ogbaukas. Di ko kono sikandin ogkoiniat, ogligdongan ku no unawa no manokal ka Magboboot, koddi ka ogbaukas. Kai ka ro oghibat taman to masoom.”

¹⁴ No nighibat si Ruth to longod to mgo paa ni Boas taman to masoom, di nig-onow sikandin to kono pad ogko-ilaan ka mgo langlanguan to mgo otow; woy nigkagi si Boas to “Doka ipoitaga no duon boi no nighibat to giokanan.” ¹⁵ Songo nigkagi sikandin to “Kai nu ka manggad no insampoy nu to pamanadyon nu, woy boata nu kai.” To pogtood ni Ruth to sikan, pigbus-ugan ni Boas to hon-om no gantang? no sibada, woy inpoutuk din sikan ki Ruth. No nig-uli sikandin? to lunsud.

¹⁶ To poglopow ni Ruth to anugang din, nig-inso si Naomi to “Honda, anak ku?” No nigsusugilon si Ruth to tibo no pighimu ni Boas tongod kandin, ¹⁷ woy nigparagas sikandin to “Pigbogadyan a rin to soini hon-om no gantang no sibada no kagi rin to ‘Doka og-uli to anugang nu no waro ogka-aap nu.’”

¹⁸ No nigkagi si Naomi to “Tagad ka ro, anak ku, woy ogpitawon nu ko nokoy ka oglopow. Su kono oghimooy ka otow taman to ogkatapid on soini tibo kuntoon no allow.”