2
No-ongkoran to mgo Otow Ka Magboboot
6 Takas to inpo-uli ni Josue ka mgo otow to Israil, nigmanhondio sikandan to pogtagtuun to tano, kara sagboka nighondio to kandin do no na-abin no tano. 7 Nigga-at ka mgo otow to Magboboot to tibon mgo tuid to manokal dod si Josue, woy songo tagood to manokal pad ka mgo igbudyag no nigmouri kandin no nakakita to tibon mgo ogko-in-inuan no mgo pighimu to Magboboot tongod to Israil. 8 Namatoy si Josue no anak ni Nun, no suguonon to Magboboot, to songo gatus woy sampuu on no tuid ka kabudyagi rin. 9 Inlobong dan ka lawa rin dio to tano no natagtuun din, dio to Timnat-Hiris, dio to kabubunganan to Ipraim, dio to baabagan to bubungan to Ga-as.
10 Takas to namatoy on ka tibon mgo otow to sikan no kapunganan, duon kapunganan no nigtulin no waro mokoila to Magboboot woy waro mataga ko nokoy ka pighimu rin tongod to Israil. 11 No nighimu ka mgo otow to Israil to maroot to pogpitow to Magboboot su nigga-at sikandan to mgo Baal.a 12 No-ongkoran dan ka Magboboot, no Igbudyag to mgo amoy ran, no nig-aap kandan ligkat to Ehiptu. Nigga-at woy nigsadyo sikandan to loin-loin no mgo tinuuhan to mgo koot-otawan no niglingut kandan. Pigpukow ran ka kabou to Magboboot, 13 su pig-ongkoran dan sikandin woy nigga-at sikandan to mgo Baal woy mgo Astarot.b 14 To kabou to Magboboot, inbogoy rin ka Israil duon to boad to mgo magluusud no nigman-agow to mgo kaaglagan dan. Induruad din sikandan duon to mgo usig dan no niglingut kandan, woy konad ogpakaroog sikandan. 15 Ko oglibuwas ka mgo otow to Israil odyow to pogmangadyow, og-atu ka boad to Magboboot kandan odyow no ogkaroog sikandan, unawa to inpangulibot to Magboboot kandan nokani. Nigmamasakit lagboy ka mgo goinawa ran.
16 Takas to sikan, nigtinuru ka Magboboot to mgo maghuhusoy, woy sikandan ka nigpangabang kandan ligkat to sikan no mgo magluusud. 17 Di agad to sikan, waro sikandan nigpamminog to mgo maghuhusoy ran, no pigduruad dan ka ngaran dan pinabadyo to pogga-at to loin no mgo tinuuhan. Waro sikandan nig-unawa to mgo kabuybudyagan dan, su magaan do sikandan nigsuwoy to daan no nahipanowan to mgo kabuybudyagan dan no ian ka daan to pogpannalinga to mgo sugu to Magboboot.
18 To kara pogtinuru to Magboboot to maghuhusoy tongod kandan, sikandin ian ka nighusoy kandan woy sikandin ka nigpangabang kandan ligkat to mgo usig dan tagood no manokal pad sikandin; hoo su duon koid-u to Magboboot kandan to nigpangiak sikandan tongod to mgo otow no nig-uang-uang woy nigbadyad-badyad kandan. 19 Di ko ogkamatoy on ka maghuhusoy, oglibong ka mgo otow to maddoot no mgo hinimuan dan no madmaroot pad to mgo pighimu to mgo kabuybudyagan dan, no nigga-at woy nigsadyo sikandan to duma no mgo tinuuhan. Nigligal sikandan to pog-ongkod to maddoot no mgo hinimuan dan no kono ogtakas. 20 Nokoy naan no nabou lagboy ka Magboboot to Israil woy nigkagi sikandin to “Tongod su nigsuwoy soini no koot-otawan to kasabutan no inbogoy ku to mgo kabuybudyagan dan, no waro sikandan nigpamminog kanak, 21 kono kud on ogdogilon to tangkaan dan ka mgo koot-otawan no nagaat to pogkamatoy ni Josue. 22 Oggamiton ku ka sikan no mgo koot-otawan odyow to pog-ol-oog to Israil, woy ogkitoon ku ko oghipanow sikandan to daan to Magboboot, no ogbabalion dan ka mgo sugu ku unawa to mgo kabuybudyagan dan.” 23 Pigpaugutan ian to Magboboot no nigpalinggaat ka sikan no mgo koot-otawan; waro din dogila to magaan no inbogoy duon to boad ni Josue.