3
Si Otniil
1 Duon mgo koot-otawan no ingaat to Magboboot odyow to pog-ol-oog to tibon mgo otow to Israil no waro makabadyo to mgo mangadyow duon to Canaan, 2 (pighimu rin soini odyow to pog-anad to pogmangadyow duon to mgo kapunganan to mgo otow to Israil no waro pad maka-ol-oog to pogmangadyow). 3 Ka nagaat no mgo koot-otawan ian ka lalima no mgo datu to mgo Filistihanon, ka tibon mgo kapunganan ni Canaan, ka mgo matig Sidon, woy ka mgo kapunganan ni Hib no nig-ugpo to mgo bubungan to Libanon ligkat to Bubungan to Baal-Hirmon taman to Libo-Hamat. 4 Nagaat sikandan odyow to pog-ol-oog to mgo otow to Israil odyow to pogpitow ko ogbabalion dan ka mgo sugu to Magboboot, no inbogoy rin to mgo kabuybudyagan dan pinabadyo ki Mosis. 5 Nig-ugpo ka mgo otow to Israil taliwaro to mgo kapunganan ni Canaan, ni Hit, ni Amor, ni Piris, ni Hib woy ni Yibus. 6 Pigpurut to mgo otow to Israil ka mgo anak no daaga to duma no mgo koot-otawan no og-asawoon dan, woy songo inbogoy ran ka mgo anak dan no daaga duon to mgo anak no lukos to loin no koot-otawan, woy pigga-at dan ka mgo tinuuhan dan. 7 Maroot ka pighimu to mgo otow to Israil duon to pogpitow to Magboboot; nalingawan dan ka Magboboot no Igbudyag dan woy pigga-at dan ka mgo Baal woy mgo Asiraa. 8 Niglogdog on ka kabou to Magboboot duon to Israil, woy induruad din sikandan duon ki Kusan-Risataim no Datu to Aram-Naharaimb. Nadiraom kandin ka mgo otow to Israil sood to wawau no tuid. 9 Di to pogpangiak dan duon to Magboboot, pigtinuru din ka sagboka no taagpangabang tongod kandan. Ka nigpangabang kandan ian si Otniil no anak ni Kinas no ian ka hari ni Kalib. 10 Piglona-an sikandin to Gimukud to Magboboot woy nohimu sikandin no maghuhusoy to Israil, woy pig-aap din ka koot-otawan to pogmangadyow. Pigpaugutan to Magboboot no ogkaroog ni Otniil si Kusan Risataim no Datu to Aram. 11 No, warad on mangadyow to tano sood to kohop-atan no tuid taman to kamatadyon ni Otniil no anak ni Kinas.
Si Ihud
12 Nighutuk man do ka koot-otawan to Israil to poghimu to maroot to pogpitow to Magboboot. Tongod to soini no pogsao dan, pigpaugutan to Magboboot no nadiraom ka Israil ki Iglon no Datu to Moab. 13 Nighinggat si Iglon to mgo kapunganan ni Bin Ammi woy ni Amalik to pogbulig kandin, woy nigmangadyow sikandan duon to Israil, woy naroog dan ka Lunsud to Mgo Palmira.c 14 Nadiraom ka mgo otow to Israil ki Iglon no Datu to Moab sood to sampuu woy wawau no tuid. 15 Nighutuk nigpangiak ka mgo otow to Israil duon to Magboboot, woy pigbogadyan din sikandan to otow no ogpangabang kandan. Ka otow ian si Ihud, sagboka no otow no gibang, no anak ni Gira no kapunganan ni Binyamin. Inpa-aap sikandin to mgo otow to Israil duon ki Iglon no Datu to Moab no duon igbogoy rin.
16 No kuntoon, nighimu si Ihud to moirob no daruwa ka gaang no songo maniku ka kaadyatan, woy inbagkos din to bubun din no kawanan no dio to diraom to kinabo din. 17 Inbogoy ni Ihud ka igbogoy duon ki Iglon no Datu to Moab, no sagboka no otow no maambog lagboy. 18 Takas to inbogoy rin on ka igbogoy, pigpohipanow rin ka mgo otow no nigtiang to sikan. 19 To dio sikandan to Gilgal no marani to mgo binas-basan no mgo batu, niglibong si Ihud woy nighondio sikandin no nigkagi to “Datu, duon kinagian no ignaas-naas ku koikow.” Nigkagi ka Datu to “Awo kow pa!” woy pig-ongkoran sikandan to tibon mgo suguonon. 20 No sikan ian, nigdani si Ihud ki Iglon no sagsagboka no nigpinnuu duon to sinabong no moumil duon to ampow to baoy rin, woy nigkagi si Ihud to “Duon poitaga ku ligkat to Magboboot duon to koikow.” Tagood no nighasindog ka Datu ligkat to pinnuuanan din, 21 pighuabut ni Ihud to gibang no boad din ka moirob din ligkat to kawanan no bubun din, woy pigdugsuan din ka gotok to Datu. 22 Nalagkos ka subong no nigsood to gotok no niglagbas ka gaang dio to poka to Datu. Waro husura ni Ihud ka moirob din, woy naop-lop on sikan to tabo. 23 No, niglibuwas on si Ihud, woy piglokoban din ka gomawan to sinabong to ampow dio to koiniugan din, woy pigkandaruan din. 24 Takas to nighipanow sikandin, niglopow ka mgo suguonon woy nakita ran no pigkandaruan ka lokob to sinabong to ampow. Nigkagi sikandan to “Naugpa nig-indos ka Datu duon to sood.” 25 Nigtagad sikandan to malmaugoy taman to nasipod on sikandan, di to waro din napuwasi ka lokob to sinabong, nigpurut sikandan to susi, woy pigpuwasan dan ka lokob, woy nakita ran naan ka igbudyag dan dio to soog no namatoy on. 26 Tagood to nigtatagad sikandan, nakapanlaguy on si Ihud. Naligaran din ka mgo binas-basan no mgo batu, woy nigpanlaguy sikandin pohondio to Siira. 27 To poglopow rin dio, pigparaging din ka sagboka no budyung duon to kabubunganan to Ipraim, woy nigtupang ka mgo otow to Israil ligkat to kabubunganan, no si Ihud ian ka nig-aap kandan. 28 Kagi rin to “Sundul kow kanak, su inbogoy on to Magboboot ka mgo usig now no matig Moab duon to mgo boad now.” No sikan ian no pigsundul dan si Ihud no nigtupang, woy pig-atangan dan ka mgo apotanan to Jordan no woig no ogbadyaan to mgo otow no oghondio to Moab. Waro otow no ogpakatalipag. 29 To sikan no mgo allow, sampuu no libu no otow to Moab ka pighimatadyan dan. Mgo manokal woy mabuut no mgo otow ka pighimatadyan dan; waro sagboka no naka-panlaguy. 30 To sikan no allow, nadiraom ka Moab to pogboot to Israil, woy warad on nigmangadyow to tano sood to 80 no tuid.
Si Samgar
31 Takas ki Ihud, si Samgar no anak ni Anat ian ka niglopow. Pighimatadyan din ka 600 no mgo otow no mgo Filistihanon no ka durugsangoy to baka ro ka piggamit din. Songo pigpangabangan din ka Israil.