4
Si Dibora
1 Takas to kamatadyon ni Ihud, nighutuk man do nakasao ka mgo otow to Israil duon to pogpitow to Magboboot. 2 No sikan ian no induad sikandan to Magboboot duon ki Yabin, no sagboka no Datu to Canaan, no nigboboot duon to Hatsor. Ka igbudyag to mgo sundau rin ian si Sisira no nig-ugpo to Harosit-Haggoyim. 3 Duon sasiyam no gatus no putow no unturanan no igmamangadyawoy rin, woy pig-ul-uangan din ka mgo otow to Israil to waro koid-u sood to 20 no tuid. Tongod to sikan, nig-umow sikandan no nigpabulig duon to Magboboot. 4 Ka nig-aap to Israil to sikan no mgo tuid ian sagboka no taagtagna no si Dibora no igboi ni Lapidot. 5 Ogpinnuu sikandin diraom to kadyu no pighingaranan dan no Palmira ni Dibora no duon to taliwaro to Rama woy Bit-il duon to kabubunganan to Ipraim. Ogmanhondio ka mgo otow to Israil ki Dibora odyow to pogpohusoy to mgo husadyonon dan.
6 Inpo-umow ni Dibora si Barak no anak ni Abinoam no matig Kidis to Naptali, woy pignangonan din sikandin to “Soini ka sugu to Magboboot no Igbudyag to Israil, kagi ‘Hondio ka, woy parumaa nu ka sampuu no libu no mgo otow no matig Naptali woy Sibulun, woy hondio kow to Bubungan to Tabor. 7 Og-adyaton ku si Sisira no igbudyag to mgo sundau ni Yabin, odyow no og-aapon din ka mgo unturanan din woy ka mgo sundau rin duon to woig to Kison, woy igbogoy ku si Sisira duon to mgo boad nu.’”
8 Nigtabak si Barak kandin to “Ko ogdumoon a nu, oghondio a ian, di ko kono ka ogludyud, kono a oghipanow.”
9 Kagi ni Dibora to “No man. Ogdumaan ku sikoikow. Di tongod su soini ka oghimuon nu, kono kad ogkangaranan. Hoo su ogboot ka Magboboot no sagboka no boi ka ogpakaroog ki Sisira.” No sikan ian, nigduma si Dibora ki Barak pohondio to Kidis. 10 To dio sikandan, pig-umow ni Barak ka mgo otow to Sibulun woy to Naptali. Sampuu no libu no otow ka nigsundul kandin, woy songo nigduma si Dibora kandin.
11 No kuntoon, duon otow no pighingaranan ki Hibir no otow to Kin no sagboka no kapunganan ni Hobab no bodyow ni Mosis. To sikan no mgo tuid, nig-ongkod si Hibir to mgo duma rin no mgo otow to Kin, woy nigpos-ok sikandin to tukbung din dio to longod to dakol no kadyu no duon to Saanim no marani to Kidis.
12 To pogkarinog ni Sisira no nighondio si Barak no anak ni Abinoam dio to Bubungan to Tabor, 13 piglimud din ka 900 no putow no unturanan no igmamangadyawoy woy ka tibon mgo otow no duma rin ligkat to Harosit-Haggoyim dio to Kison no woig. 14 No nigkagi si Dibora duon ki Barak to “Hondio ka! Soini ian no allow pigbogadyan kad on to Magboboot to pogkaroog ki Sisira. Nighun-a on ka Magboboot koikow.” No sikan ian nigtupang si Barak to Bubungan to Tabor no nigsundul ka 10,000 no mgo otow rin. 15 To poglusud ni Barak, naroog to Magboboot si Sisira woy ka tibon mgo unturanan din woy mgo sundau rin pinabadyo to kampilan. Pig-ongkoran ni Sisira ka unturanan din woy nigpanlaguy ro sikandin. 16 Di, piggapon ni Barak ka mgo unturanan woy mgo sundau pohondio to Harosit-Haggoyim. Nanatigbas ka tibon mgo otow ni Sisira; waro sagboka ian ka nakapanlaguy. 17 Di si Sisira atag, nigpallaguy sikandin pohondio to tukbung ni Yail no asawa ni Hibir no otow to Kin. Hoo su pigdoromdom din no mgo aukoy to igbudyag din no si Yabin no Datu to Hatsor ka mgo otow to lunggunan ni Hibir no otow to Kin. 18 Niglibuwas si Yail odyow to pogtomu ki Sisira woy pignangonan din sikandin to “Dii kad, Igbudyag ku, sood ka to tukbung. Doka ogkahallok.” Woy nigsood si Sisira woy pigtol-oban sikandin ni Yail to manggad. 19 Kagi ni Sisira to “Namaraan a. Bogadyi a kun to woig.” Pigpuwasan ni Yail ka sagboka no laplap no sooranan to gatas, woy pigpo-inom din, woy pigtol-oban din man do. 20 Nigkagi si Sisira to “Hasindog ka duon to gomawan to tukbung. Ko duon ogligad no og-inso to ‘Duon buwa otow kai?’ nangon ka to ‘Waro.’” 21 Dokad di, pigpurut ni Yail no asawa ni Hibir ka pig-iroban no putow no igpos-ok to tukbung porom, woy sagboka no martilyu. Nighimuung sikandin to pogdani ki Sisira no naalinok-nok tongod to kabooy rin. Pigpalpaan ni Yail ka uu ni Sisira no nakalagbas ka putow pohondio to tano woy namatoy si Sisira.
22 No niglopow si Barak no niggapon ki Sisira, woy niglibuwas si Yail odyow to pogtomu kandin. Kagi ni Yail to “Dii kad. Ipapitow ku koikow ka otow no pigpamangho nu.” No, nigsood si Barak duma kandin, woy nakita rin si Sisira dio no nokohibat no napal-paan on ka uu rin, no namatoy on.