Josue
1
Ka Pogsugu To Magboboot Ki Josue
1 Takas to kamatadyon ni Mosis no suguanon to Magboboot, nigkagi ka Magboboot duon ki Josue no anak ni Nun no hibatoon ni Mosis to 2 “Namatoy on si Mosis no suguanon ku. No kuntoon, panagana ka duma to soini no koot-otawan odyow to pogtalipag now to Jordan no woig odyow to pogsood to tano no igbogoy ku kandan no mgo kapunganan ni Israil. 3 Agad hondoi kow ogdiok, igbogoy ku kaniu ka sikan no tano, sumao to inpangulibot ku ki Mosis. 4 Ka kau-agan to tano now ogligkat to han-hanawan pohondio to Libanon, woy ogligkat to dakol no woig no Eupratis pohondio to Dakol no Dagatadio to ogsaopan inlagkos ka tibon tano to mgo kapunganan ni Hit. 5 Waro koot-otawan ka ogpaka-atu koikow tagood to manokal ka rod. Unawa to pigdumaan ku si Mosis, songo ogdumaan ku sikoikow; kono ku ogbaagaron sikoikow woy kono ku ian og-ongkoran sikoikow. 6 Nokal-nokal ka woy palimbubuut ka, hoo su og-aapon nu ka soini no koot-otawan odyow no ogkatagtuun dan ka tano no inpangulibot ku to pogbogoy dio to mgo kabuybudyagan dan. 7 Nokal-nokal ka woy doka ian ogpatatabiow. Poomot ka to pogbabali to tibon mgo udlin no inbogoy ni Mosis no suguanon ku duon koikow: dokag suwoy ligkat to sikan pohondio to kawanan woy pohondio to gibang, odyow no ogpakatood ka, agad hondoi ka ogdoog. 8 Dokag hagtong to pogkakagi to insulat to soini no libru to mgo udlin; doromdoma nu to allow woy to mausilom, odyow no ogdorodyow ka to pogbabali to tibo no nasulat duon. No sikan ian no ogtulin ka woy ogpakatood ka. 9 Waro a buwa nigsugu koikow to ‘Nokal-nokal ka woy palimbubuut ka?’ No, dokag kahallok; dokag patawara ka goinawa nu, su ogduma ka Magboboot no Igbudyag nu agad hondoi ka ogdoog.”
10 No pigsugu ni Josue ka mgo igbudyag to mgo otow to: 11 “Panloudya now ka ugpaan to mgo otow woy pannangoni now sikandan to ‘Panaganaa now ka mgo kaaglagan now. To igkatou no allow kuntoon ogtalipag kow to Jordan kai odyow to pogsood woy to pogtagtuun to tano no igbogoy to Magboboot no Igbudyag now kaniu.’”
12 Di dio to mgo kapunganan ni Riubin woy ni Gad woy dio to pori to mgo kapunganan ni Manasi, nigkagi si Josue to 13 “Doromdoma now ka sugu ni Mosis no suguanon to Magboboot to pogkagi rin kaniu to ‘Pigbogadyan kow to Magboboot to poghimooy, woy inbogoy rin kaniu ka soini no tano.’ 14 Ogpakapalinggaat ka mgo asawa now, mgo anak now woy mgo adyam now kai to tano no inbogoy ni Mosis kaniu kai to ogsilaan to Jordan no woig, di ogtalipag hun-a to mgo suod dan ka tibo no mgo lukos now no ogpakamangadyow no og-aap to mgo panganiban dan. Ogbulig kow to mgo suod now 15 taman to ogkabogadyan sikandan to Magboboot to poghimooy unawa to inbogoy rin kaniu, woy taman to ogkatagtuun dan ka tano no igbogoy to Magboboot kandan. Takas to sikan ogpakapan-uli kow to pog-ugpo to tano no inbogoy ni Mosis no suguanon to Magboboot kaniu kai to ogsilaan to Jordan no woig.”
16 No nigtabak sikandan ki Josue to “Oghimuon noy ko nokoy ka insugu nu kanami. Agad hondoi koy nu igpa-aap oghondio koy ian. 17 Unawa to pogbabali noy to tibon mgo ingkakagi ni Mosis, songo ogbabalion noy ka mgo kagi nu. Di ogdumaan ka porom to Magboboot unawa to pogduma rin ki Mosis. 18 Ko hontow ka og-atu to mgo kagi nu, no ogligal to pogbabali to mgo kinagian nu, agad nokoy ka sugu nu kandin, oghimatadyan ian ka sikan no otow. Di nokal-nokal ka woy palimbubuut ka!”