2
Ka Mgo Nigsisiib Woy Si Rahab
1 No to waro pogpoitaga nigpa-aap si Josue no anak ni Nun to daruwa no otow no ogsisiib ligkat to Sittim. Nigkagi sikandin to “Hondio kow woy pansobsoba now ka tano, lagboy ka lunsud to Jerico.”
No nighondio sikandan woy nigsood sikandan to baoy to sagboka no agkadyon no boi no pighingaranan ki Rahab, woy dio sikandan nig-ugpo.
2 Duon otow no nignangon to Datu to Jerico to “Pitow ka! Duon mgo otow no kapunganan ni Israil no nighondii kuntoon no maukilom odyow to pogsobsob to tano.”
3 No nigpa-aap ka Datu to Jerico to kinagian duon ki Rahab no kagi “Palibuwasa nu ka mgo lukos no nigsood to baoy nu ganna, hoo su nighondii sikandan odyow to pogsobsob to tibon tano.”
4 Di inhoos to boi ka daruwa no lukos woy nigkagi sikandin to “Hoo, nakahondii ka mgo lukos kai’t to koddi, di waro a mataga ko hondoi sikandan puun no mgo otow. 5 Ganna to magaan ogsaop ka allow, to oras to poglokob to gomawan to lunsud, nighipanow ka mgo otow. Waro a mataga ko hondoi sikandan nigdoog. Agpasa now gapona. Naugpa ogkasaponan now pad.” 6 (Di to maugot ian, pig-aap din sikandan duon to atop to baoy rin, woy pighoos din sikandan diraom to dagami to pinamua no linuano indampil din dio to atop.) 7 No sikan ian no nighipanow ka mgo otow to Jerico odyow to poggapon poron to mgo nigsobsob. Dio sikandan nigdoog to daan no oghondio to apotanan to Jordan no woig, woy to poglibuwas to mgo niggapon, piglokoban oghutuk ka gomawan to lunsud. 8 To waro pad nakahibat ka mgo taagsiib odyow to poghirogo, nighondio ka boi dio to atop 9 woy pignangonan din sikandan to “Nataga a no inbogoy to Magboboot kaniu ka soini no tano. Nohinhinaatan koy lagboy no songo koot-otawan, taman to nanahallok lagboy kaniu ka tibon mgo otow no nig-ugpo to soini no tano. 10 Nakarinog koy no pig-otian to Magboboot ka Malaab no Dagat to tangkaan now pogligkat now to Ehiptu. Woy songo nakarinog koy to pighimu now to mgo Datu to mgo kapunganan ni Amor no si Sihon woy si Og dio to diipag to Jordan no pighimatadyan now ian. 11 To pogkarinog noy to sikan nohinaatan koy lagboy woy natabiow on ka tibo tongod kaniu, hoo su ka Magboboot no Igbudyag now ian ka Igbudyag to langit to ampow woy to tano to diraom. 12 No kuntoon panguliboti a now kun pinabadyo to Magboboot no ogkoid-uan now ka lunggunan ku, su pigkoid-uan ku sikaniu. Bogadyi a now to tuus 13 no ogpangabangan now ka ukul to amoy ku woy inoy ku, to mgo suod ku no mgo lukos woy boi, woy to tibo no kandan. Kaasagi koy odyow no kono koy ogkammatoy.”
14 Nigtabak ka mgo lukos to “Kanami no ukul liwan to kaniu no mgo ukul! Ko kono kow ognangon to pighimu noy, og-ot-otawon noy sikaniu to marodyow ian ko igkabogoy on to Magboboot kanami ka soini no tano.”
15 No inpalurus din sikandan pinabadyo to pigtuntun no lubid duon to bintana, su nakalagkos to aad to lunsud ka baoy rin. 16 Songo nignangon ka boi to “Hondio kow to mgo bubungan odyow kono kow ogkakitaan to mgo niggapon kaniu. Hoos kow dio sood to tatou no allow taman to pog-uli dan kai, woy takas to sikan hipanow kow on.”
17 Nigkagi ka mgo lukos ki Rahab to “Kono koy ogkasonditan to pangulibot noy koikow 18 ko oglopow koy to tano woy waro ka nakahikot to soini no malaab no lubid to bintana no nabadyaan noy to poglogsad, woy ko waro malimud ka amoy nu woy ka inoy nu woy ka mgo suod nu woy ka tibon lunggunan nu kai to baoy nu. 19 Ko oglibuwas ka sagboka pohondio to kalasara, sikandin do ka ogsonditan to langosa rin; kono koy ogkasonditan. Di ko ogkoomonu ka mgo otow no duma koikow kai to sood to baoy, sikanami ka ogkasonditan. 20 Di ko ignangon nu ka oghimuon noy, no ogkatampod on ka pangulibot no inpapangulibot nu kanami.” 21 Nigtabak ka boi to “No man. Ogkohimu no unawa to innangon now.” No pigpaligkat din sikandan, woy nighipanow sikandan. Nighikot sikandin to malaab no lubid dio to bintana din. 22 To poghipanow ran, nighondio sikandan to mgo bubungan woy dio sikandan nig-ugpo to tatou no allow, taman to nakapamangho ka mgo niggapon kandan dio to tibon kalasara woy noko-uli to waro nakita ran. 23 No nighipanow on ka daruwa no otow. Nigtupang sikandan ligkat to mgo bubungan, nig-apot sikandan to woig, woy nighondio sikandan ki Josue woy nignangon-nangon sikandan to tibo no nabadyaan dan. 24 Nignangon sikandan ki Josue to “Inkabogoy on ian to Magboboot kanta ka tibon tano; hoo su nohinaatan lagboy ka mgo otow tongod kanta.”