Josue 3

Nigtalipag Ka Mgo Otow To Israil To Jordan No Woig

¹ Masoom pad to pogkapawo, nighipanow si Josue duma to tibon mgo otow to Israil ligkat to Sittim pohondio to Jordan, woy dio sikandan nigpos-ok to mgo tukbung dan to waro pad sikandan makatalipag to woig. ² Takas to tatou no allow nigpanlouy ka mgo igbudyag to tibon pig-ugpaan to mgo otow ³ no nigsugu sikandan to mgo otow no kagi “Ko ogkitoon now ka Sooranan to Kasabutan to Magboboot no Igbudyag now, woy ogkitoon now ka mgo taagpanubad no ogtiang to sikan, oghipanow kow ligkat to pigsasindogan now no ogsundul kow to sikan. ⁴ No sikan ian no ogkataga kow to daan now, su waro kow pad makabadyo to sikan no daan agad kon-u. Di ol-oati now ka Sooranan woy ka kaniu no lawa to mgo songo kilometro; dokow ogdani ian.”

⁵ Nignangon si Josue to mgo otow to “Himpod kow no ig-oog now ka mgo lawa now, su asoom no allow oghimu ka Magboboot to mgo ogko-in-inuan no mgo tuus to taliwaro now.” ⁶ Nigkagi si Josue duon to mgo taagpanubad to “Tianga now on ka Sooranan to Kasabutan woy oghun-a kow to mgo otow.” No sikan ian no pigtiang dan woy nighun-a sikandan to mgo otow.

⁷ No nigkagi ka Magboboot ki Josue to “Kuntoon no allow ogbunsud a to pogpabantug koikow to pogpitow to tibon mgo otow to Israil, odyow no ogkataga sikandan no pigdumaan ku sikoikow unawa to pogduma ku ki Mosis. ⁸ Nangoni nu ka mgo taagpanubad no nigtiang to Sooranan to Kasabutan to ‘Ko oglopow kow to ilis to Jordan no woig, dio kow oghasindog to taliwaro to woig.’”

⁹ Nignangon si Josue duon to mgo otow to Israil to “Dani kow woy pamminoga now ka mgo kinagian to Magboboot no Igbudyag now. ¹⁰ Soini ka indanan odyow no ogkataga kow no pigdumaan kow to Magboboot no manokal woy no ogdogilon din to tangkaan now ka tibon mgo kapunganan ni Canaan, ni Hit, ni Hib, ni Piris, ni Girgas, ni Amor woy ni Yibus. ¹¹ Pitow kow, oghun-a kaniu pohondio to Jordan no woig ka Sooranan to Kasabutan to Magboboot no Igbudyag to tibon kalibutan. ¹² No kuntoon aam kow to sampuu woy daruwa no otow ligkat to mgo lunggunan to Israil, sagboka no otow to kara lunggunan ian. ¹³ Ko oglopow duon to Jordan ka mgo taagpanubad no ogtiang to Sooranan to Magboboot no Igbudyag to tibon kalibutan, woy ko ogpakagiok on sikandan to woig, ogsagdok on ka pogtu-aug to woig no ogkalimud do dio to diradya.”

¹⁴ No sikan ian to poghipanow to mgo otow odyow to pogtalipag to Jordan, nighun-a kandan ka mgo taagpanubad no nigtiang to Sooranan to Kasabutan.

¹⁵ No kuntoon tinglanog ian to Jordan no woig ka tibo to sikan no buwan to pogga-ani, di agad to niglanog, to pogdiok to mgo taagpanubad no nigtiang to Sooranan to Kasabutan duon to ilis to woig, ¹⁶ nasagdok on ka pogtu-aug to woig. Nalimud ka woig to dakol no puntuk dio to mariu dio to longod to sagboka no lunsud no pighingaranan no Adam marani to Saritan, woy warad on woig no nigtu-aug pohondio to Dagat to Araba no songo ogkohingaranan no Dagat no Asin. No sikan ian nigtalipag ka mgo otow dio to tangkaan to lunsud to Jerico. ¹⁷ Nigpo-onong-onong ka mgo taagpanubad no nigtiang to Sooranan to Kasabutan to Magboboot dio to taliwaro to Jordan to mammara no tano tagood to nigligad ka tibon koot-otawan to Israil no songo nigdiok to mammara no tano.