Josue 4

Ka Tuus To Pogtalipag Dan

¹ To nigtakas on nigtalipag to Jordan ka tibon koot-otawan, nigkagi ka Magboboot duon ki Josue to ² “Aam ka to sampuu woy daruwa no otow, sagboka ligkat to kara lunggunan to koot-otawan, ³ woy nangoni nu sikandan to pogpurut to sampuu woy daruwa no batu ligkat to taliwaro to Jordan dio ian to pigsasindogan to mgo taagpanubad, woy og-aapon dan ka mgo batu dio to diipag no igsabuk dan to oghibatan now kuntoon no maukilom.”

⁴ No nig-umow si Josue to sampuu woy daruwa no otow no pigtinuru din, sagboka ligkat to kara lunggunan to koot-otawan to Israil, ⁵ woy pignangonan din sikandan to “Oghondio kow to tangkaan to Sooranan to Magboboot no Igbudyag now dio to taliwaro to Jordan. Kara sagboka kaniu ogtiang to sagboka no batu, sumao to koon-ingan to mgo lunggunan to koot-otawan to Israil. ⁶ Ogkohimu no tuus kaniu ka sikan no mgo batu. Uromo ko og-inso ka mgo anak now kaniu to ‘Nokoy ka kaogsaran to soini no mgo batu?’ ⁷ nangoni now sikandan no nigsagdok ka pogtu-aug to Jordan no woig to tangkaan to Sooranan to Kasabutan to Magboboot. To pogtalipag to Sooranan to Jordan, natampod ka pogtu-aug to woig to Jordan. Soini no mgo batu ogkohimu no tuus to mgo otow to Israil taman to katamanan.”

⁸ No, pigbabali to mgo otow to Israil ka insugu ni Josue kandan. Nigpurut sikandan to sampuu woy daruwa no batu ligkat to taliwaro to Jordan sumao to koon-ingan to mgo lunggunan to mgo otow to Israil, sumao to innangon to Magboboot ki Josue. Pigtiang dan ka mgo batu pohondio to ugpaan dan duon to diipag woy insabuk dan. ⁹ Inpasasindog ni Josue ka sampuu woy daruwa no batu no nigligkat to taliwaro to Jordan no woig dio to pigsasindogan to mgo taagpanubad no nigtiang to Sooranan to Kasabutan. Woy dio dod ka sikan no mgo batu taman to kuntoon no allow.

¹⁰ No nigpalinggaat no nighasindog ka mgo taagpanubad no nigtiang to Sooranan to Kasabutan dio to taliwaro to Jordan no woig taman to naponga on to mgo otow ka tibo no insugu to Magboboot ki Josue, unawa to innangon ni Mosis ki Josue. Nig-agpas nigtalipag ka mgo otow ¹¹ woy to iam pad nigtakas sikandan tibo to pogtalipag, niggakap ka mgo taagpanubad no nigtiang to Sooranan to Kasabutan to Magboboot tagood to nigpipitow ka mgo otow. ¹² Nighun-a to duma no mgo otow to Israil ka mgo kapunganan ni Riubin, ni Gad woy ka baad to mgo kapunganan ni Manasi no nig-aap to mgo panganiban dan, sumao to innangon ni Mosis kandan. ¹³ Mgo 40,000 ka mgo otow no nigtalipag no nig-aap to panganiban to mangadyow dio to naapu to Jerico dio to tangkaan to pogpitow to Magboboot.

¹⁴ To sikan no allow inpadakol to Magboboot si Josue to pogpitow to tibon koot-otawan to Israil, woy pig-ila ran sikandin to tibon mgo allow to koudyagan din unawa to pog-ila ran ki Mosis. ¹⁵ No nignangon ka Magboboot ki Josue to ¹⁶ “Sugua nu ka mgo taagpanubad no nigtiang to Sooranan to Kasabutan no oggakap on sikandan ligkat to Jordan no woig.”

¹⁷ No pigsugu ni Josue ka mgo taagpanubad to “Gakap kow on ligkat to Jordan.” ¹⁸ Woy niggakap on ka mgo taagpanubad no nigtiang to Sooranan to Kasabutan to Magboboot. To waro malingon-ngon, to pogdiok dan to mammara no tano to tikoba, nigtu-aug man do ka woig to Jordan no niglanog unawa to nokohun-a. ¹⁹ To sikan no igkasampuu no allow to an-anadyan no buwan to tuid, nigligkat to Jordan no woig ka mgo otow woy nigpos-ok sikandan to mgo tukbung dan duon to Gilgal dio to oatan to Jerico dio to ogsilaan. ²⁰ Inpahasindog ni Josue dio to Gilgal ka sampuu woy daruwa no batu no napurut dan to Jordan. ²¹ Nigkagi sikandin duon to mgo otow to Israil to “Uromo, ko og-inso ka mgo tipouri now duon to mgo amoy ran to ‘Nokoy ka kaogsaran to soini no mgo batu?’ ²² nangoni now sikandan to ‘Nigtalipag ka koot-otawan to Israil to Jordan no woig no nigdiok to mammara no tano.’ ²³ Hoo su pig-otian to Magboboot ka Jordan to tangkaan now taman to nakatalipag kow. Pighimu to Magboboot now duon to Jordan ka unawa rod no pighimu rin to Dagat no Malaab to pogtalipag ta to sikan no no-otian taman to niggakap kid on. ²⁴ Pighimu rin soini odyow ogkataga ka tibon mgo koot-otawan to kalibutan no mabogbog ka Magboboot, woy odyow no ungud kow ogkohinaatan to Magboboot no Igbudyag now.”