5
Ka Pogtuli Dio To Gilgal
1 No kuntoon duon mgo datu to mgo kapunganan ni Amor no nig-ugpo to ogsaopan to Jordan no woig, woy mgo datu to mgo kapunganan ni Canaan no nig-ugpo to ilis to dagat. To pogkarinog dan no pigpa-otian to Magboboot ka Jordan no woig to tangkaan to mgo otow to Israil taman to nakatalipag koy, natabiow sikandan, woy warad on litos no kabuut dan to pogtangko to mgo otow to Israil. 2 To sikan no mgo allow, nignangon ka Magboboot ki Josue to “Himu ka to mgo ilab no sumaomawoy iglibong now ka pogpanuli to mgo otow to Israil.”
3 No sikan ian nighimu si Josue to mgo ilab no sumaom, woy inpatuli din ka mgo otow to Israil duon to Gibiat Haaralot.b 4 Hoo su soini ka nabadyaan dan: Ka tibon mgo otow no niglibuwas to Ehiptu no nakalitos to pannuigon to pogmangadyow, nammatoy sikandan dio to han-hanawan takas to nigligkat to Ehiptu. 5 Natuli on ka tibo no nigligkat to Ehiptu, di waro matuli ka tibo no no-otow duon to han-hanawan to poghipanow to mgo otow ligkat to Ehiptu. 6 Nakahip-hipanow ka mgo otow to Israil duon to han-hanawan sood to kohop-atan no tuid taman to nammatoy on ka tibon mgo lukos no nigligkat to Ehiptu no litos on to pannuigon to pogmangadyow, hoo su waro sikandan nigpannalinga to Magboboot. Nigpangulibot ian ka Magboboot kandan no kono ogpakakita sikandan to tano no tu-augan to gatas woy tonob no inpangulibot din duon to mgo kabuybudyagan dan no igbogoy rin kanta. 7 Inpatulin to Magboboot ka mgo anak dan no lukos liwan kandan, woy sikandan ian ka mgo inpatuli ni Josue. Waro pad sikandan matuli su waro sikandan natuli duon to poghipanow ran. 8 Takas to natuli ka tibon koot-otawan, nigpalinggaat sikandan to pigpos-okan dan to mgo tukbung dan taman to naulian on ka mgo pali dan.
9 No nigkagi ka Magboboot ki Josue to “Kuntoon inliid kud on ka igkosamili now no nigligkat to Ehiptu.” No sikan ian no pighingaranan dan ka sikan no longod to Gilgal taman to kuntoon no allow.c
10 To mausilom to igkasampuu woy hop-at no allow to buwan, tagood to dio sikandan nig-ugpo to Gilgal dio to naapu to Jerico, nigkoon to pagkoonan to Pogligad ka mgo otow to Israil. 11 To pogkapawo to Pogligad, to sikan ian no allow, nigkoon sikandan to mgo koonon no nigligkat to sikan no tano; mgo pan no waro igpatulin woy sinandag no trigu. 12 Nighagtong on ka mannadto pogkapawo to pogkoon dan to sikan no koonon ligkat to tano. Warad on manna no ogkakoon to mgo otow to Israil, di to sikan no tuid nigkokoon sikandan to koonon no nigpuun to sikan no tano to Canaan.
13 No kuntoon, to marani on si Josue to Jerico, nigtonggak sikandin woy nakita rin ka sagboka no otow no nighasindog to tangkaan din no niggon-gon to pighuabut no kampilan to boad din. Nigdani si Josue kandin woy nig-inso sikandin to “Otow noy sikoikow woy ko otow ka to mgo usig noy?”
14 Nigtabak sikandin to “Kono a no otow now, woy songo kono a no otow to mgo usig now, di nighondii a no igbudyag to kasundauhan to Magboboot.”
No niglangkob si Josue to tano to pog-ila, woy nig-inso sikandin to “Nokoy ka igkakagi to Magboboot duon to suguanon din?”
15 Nigtabak ka igbudyag to kasundauhan to Magboboot to “Luunga nu ka mgo sapatus nu, su in-oog no tano ka pigdiokan nu.” Woy pigluung ni Josue ian.