Josue 6

Ka Pogdoog Dio To Jerico

¹ No kuntoon piglokoban dorodyawi ka Jerico tongod to mgo otow to Israil. Waro niglibuwas woy waro nigsood. ² No nigkagi ka Magboboot ki Josue to “Pitow ka, inbogoy kud koikow ka Jerico duma to datu dio woy to tibon mgo otow duon no ogmangadyow. ³ Linguta now to poghipanow ka lunsud duma to tibon mgo lukos no og-aap to panganiban dan. Himua now soini sood to hon-om no allow. ⁴ Sugua nu ka papitu no taagpanubad to pog-aap to mgo budyung no mgo sungay to kambing no oghipanow to tangkaan to Sooranan to Kasabutan. To igkapitu no allow, kapapitu kow oglingut to lunsud tagood no ogparagingon to mgo taagpanubad ka mgo budyung dan. ⁵ Ko ogdinogon now sikandan no ogparaging to maagbot woy maadyat no daging to mgo budyung, sugua nu ka mgo otow to pogbabansagon to maagbot; no ogkakapood ka mgo aad to lunsud, woy og-agpas ogmansood ka kara sagboka kaniu to lunsud.”

⁶ No pig-umow ni Josue no anak ni Nun ka mgo taagpanubad woy pignangonan din sikandan to “Puruta now ka Sooranan to Kasabutan to Magboboot, woy aam kow to papitu no taagpanubad no og-aap to mgo budyung to tangkaan to sikan.” ⁷ Woy pigsugu din ka mgo otow to “Hipanow kow! Linguta now ka lunsud no oghun-a to Sooranan to Magboboot ka mgo og-aap to panganiban.” ⁸ Takas to pogkagi ni Josue duon to mgo otow, nighipanow on ka papitu no taagpanubad no nig-aap to papitu no mgo budyung to tangkaan to Magboboot, no pigparaging dan ka mgo budyung dan, woy nigsundul kandan ka Sooranan to Kasabutan to Magboboot. ⁹ Nighipanow ka mgo otow no nig-aap to panganiban dio to tangkaan to mgo taagpanubad, woy songo duon mgo otow no nig-aap to panganiban no nigsundul to Sooranan to Kasabutan tagood to ungud paraginga ka mgo budyung. ¹⁰ Di nigsugu si Josue to mgo otow to “Dokow ogngangang woy dokow ogbabansagon, agad ka pogkagi taman to allow no ognangonan ku sikaniu to pogbabansagon. To sikan no allow ogbabansagon kow ian!” ¹¹ No sikan ian no inpatiang din ka Sooranan to Magboboot lingut to lunsud to kasagboka. Takas to sikan, nigman-uli ka mgo otow to pigpos-okan dan to mgo tukbung dan woy dio sikandan nig-ugpo to maukilom.

¹² Masoom pad to pogkapawo, nig-onow si Josue woy pigtiang man on to mgo taagpanubad ka Sooranan to Magboboot. ¹³ Nighipanow ka papitu no taagpanubad no nig-aap to papitu no budyung, no nighun-a sikandan to Sooranan to Magboboot no nigparaging to budyung. Nighun-a kandan ka mgo nig-aap to panganiban, woy songo duon mgo nigbantoy no nigsundul to Sooranan to Magboboot tagood to ungud paraginga ka mgo budyung. ¹⁴ No sikan ian no nighipanow sikandan no niglingut to lunsud to kasagboka to igkorangob no allow woy nig-uli sikandan dio to pig-ugpaan dan. Sikan ka pighimu ran sood to hon-om no mgo allow.

¹⁵ To igkapitu no allow, nig-onow sikandan to pogsilo to allow, woy unawa to nokohun-a, nighipanow sikandan to poglingut to lunsud to kapapitu. Unawa ian to duma no mgo allow di kuntoon to kapapitu sikandan niglingut. ¹⁶ To igkapitu no poglingut dan, to pogparaging to mgo taagpanubad to mgo budyung dan to maagbot, nigsugu si Josue to mgo otow to “Babansagon kow! Hoo su inbogoy on to Magboboot ka lunsud kaniu! ¹⁷ In-oog to Magboboot ka lunsud woy ka tibo no duon. Si Rahab no agkadyon no boi ro woy ka mgo otow duma kandin to baoy rin ian ka ogkapangabangan, hoo su inhoos din ka mgo nigsisiib no inpa-aap ta. ¹⁸ Di dokow ogpamurut to mgo in-oog no kaaglagan, odyow no kono kow ogkalogparan pinabadyo to pogpurut now to sikan. Ko duon ogpuruton now ogka-awo ka kaasag to pig-ugpaan to koot-otawan to Israil, woy ogkabaybadyaran kow ian. ¹⁹ Tibo ka plata woy bulawan woy ka mgo kaaglagan no brunsi woy putow in-oog to Magboboot, woy og-aapon now to kandin no sabukanan.”

²⁰ To pogdaging to mgo budyung, nigbabansagon ka mgo otow, woy to sikan no pogdaging to mgo budyung woy to pogbabansagon to mgo otow to maagbot, nanapood ka mgo aad no batu no nakalingkus to lunsud, woy nigpallaguy ka mgo otow to poglusud to lunsud, woy naroog dan. ²¹ Inbogoy ran to Magboboot ka lunsud woy pigpanghimatadyan dan ka tibo no duon to sood no manokal; mgo lukos woy boi, budyag woy bato, mgo baka, karniru woy asnu. ²² Nignangon si Josue duon to daruwa no nigsobsob to tano to “Hondio kow duon to baoy to agkadyon no boi woy palibuwasa now sikandin duma to tibo no kandin sumao to pangulibot now kandin.”

²³ No nigsood ka mgo baubato no nigsobsob woy pig-angoy ran si Rahab duma to amoy woy inoy rin, mgo ma-ama rin woy ka tibo no mgo duma rin. Pig-aap dan ka tibo no lunggunan din woy pigpo-ugpo dan to longod to libuwasan to pig-ugpaan to koot-otawan to Israil. ²⁵ Pigsilaban to mgo otow ka tibon lunsud, di pig-aap dan ka plata woy bulawan woy ka mgo kaaglagan no brunsi woy putow duon to sabukanan to baoy to Magboboot. ²⁵ Di pigpangabangan ni Josue si Rahab no agkadyon no boi, duma to lunggunan din woy to tibo no mgo duma rin, su inhoos din ka mgo otow no inpa-aap ni Josue odyow to pogsobsob to Jerico, woy nig-ugpo pad sikandin to mgo otow to Israil taman to kuntoon no allow.

²⁶ To sikan no allow nigkagi si Josue to soini no hogot no tungadyow: “Ogkatungadyawan to Magboboot ka otow no og-ol-oog to pogpos-ok oghutuk to soini no lunsud to Jerico. Ko ogbunsud sikandin to pogpos-ok ogkamatoy ka panganoy no anak din, woy ko ogkatapus din to pogsabuk to lokob to gomawan ogkamatoy ka kimud din no anak.” ²⁷ No sikan ian no nigduma ka Magboboot ki Josue, woy nigdakol ka ngaran din to tibon tano dio.