7
Ka Sao Ni Akan
1 Di nakasao ka mgo otow to Israil tongod to mgo in-oog no mgo kaaglagan. Pigpurut ni Akan ka duma to sikan, woy nabou lagboy ka Magboboot tongod to sikan dio to koot-otawan to Israil. Si Akan ian ka anak ni Karmi no anak ni Sabdi no anak ni Sira no kapunganan ni Juda. 2 No kuntoon, nigpa-aap si Josue to mgo otow ligkat to Jerico pohondio to Ai no marani to Bit Avin no dio to ogsilaan to Bit-il. Pignangonan din sikandan to ‘Hondio kow woy pansobsoba now ka sikan no mgo tano.’ No sikan ian nighondio ka mgo otow woy pigsobsob dan ka Ai. 3 To pog-uli dan ki Josue, nigkagi sikandan to “Doka nu ogpohondio-a ka tibon mgo otow. Pa-aap ka ro to mgo daruwa woy ko tatou no libu no otow odyow to poglusud dio – doka oghibuadya ka tibon koot-otawan, su maintok ka mgo otow duon.”
4 No sikan ian no mgo tatou no libu ka mgo otow no nighondio, dokad di naroog sikandan to mgo otow to Ai. 5 Pighimatadyan to mgo otow to Ai ka mgo 36 no otow to Israil. Pigpanggapon dan ka mgo kapunganan ni Israil ligkat to gomawan to lunsud pohondio to kalianan to mgo batu, woy pigpangtigbas dan sikandan duon to mgo daligdigan.
To pogkataga to mgo otow to soini, na-awaan sikandan to kabuut no nanahallok on lagboy sikandan. 6 No pighigbit ni Josue ka mgo kinabo din tongod to kasakit to goinawa rin, woy niglangkob sikandin to tano dio to tangkaan to Sooranan to Magboboot no nigpalinggaat sikandin dio taman to pogkatangkob on. Songo sikan ka pighimu to mgo igbudyag to Israil woy pigsawigan dan ka mgo uu ran to abu. 7 Nigkagi si Josue to “Magboboot no Igbudyag to tibo, manio to pig-aap nu soini no koot-otawan to diipag to Jordan no woig odyow ro to pogbogoy kanami dio to boad to mgo kapunganan ni Amor odyow ogkangkammatoy koy? Marodyow pad porom ko nalitosan koy to pog-ugpo dio pad to diipag to Jordan! 8 Mahal no Igbudyag, nokoy ka igkanangon ku kuntoon no naroog ka Israil to mgo usig dan? 9 Angkuwan ko ogdinog ka mgo kapunganan ni Canaan woy ka duma no mgo koot-otawan to soini no tano tongod to soini, woy oglingutan koy ran woy ogka-awo ka ngaran noy kai to ampow to kalibutan. Woy nokoy naan ka oghimuon nu to mabogbog no ngaran nu no konad ogkangaranan?”
10 Nigkagi ka Magboboot ki Josue to “Onow ka! Nokoy ka oghimuon nu no niglangkob ka? 11 Nakasao ka Israil; pigligal dan ka kasabutan ku no insugu ku kandan. Nigtakow sikandan no nigpurut sikandan to in-oog no mgo kaaglagan woy inlagkos dan to kandan no mgo kaaglagan woy nig-ubat pad sikandan. 12 No sikan ian ka pugtian no konad ogpakatangko ka mgo otow to Israil to mgo usig dan; og-iniug sikandan no ogpanlaguy su na-awo ka kaasag dan, ian no ogkaroog on. Kono ad on ogduma kaniu ko kono now og-awoon ka in-oog no duon to taliwaro now.
13 “Hondio ka woy ooga nu ka koot-otawan. Nangoni nu sikandan to ‘Ooga now ka mgo lawa now no ogpanagana kow to asoom su nignangon ka Magboboot no duon mgo in-oog no kaaglagan taliwaro kaniu, Israil. Kono kow ogpakaroog to mgo usig now ko kono now og-awoon sikan. 14 To masoom ogtangko kow pinabadyo to mgo ka-ap-apuan now. Ko hontow no kapunganan ka og-aamon to Magboboot, ogtangko sikandan pinabadyo to mgo puntuk dan. Ko hondoi no puntuk ka og-aamon to Magboboot, ogtangko sikandan pinabadyo to mgo lunggunan dan. Ko hondoi no lunggunan ka og-aamon to Magboboot, ogtangko sikandan kara sagboka no otow. 15 Ko hontow ka ogkakitaan no niggon-gon to in-oog no mgo kaaglagan, oglogparan sikandin pinabadyo to hapuy, duma to tibo no kandin, su nig-apul sikandin to kasabutan ku, woy makasisipod ka pighimu rin taliwaro to Israil.’”
16 Masoom pad to pogkapawo, inpatangko ni Josue ka mgo otow to Israil pinabadyo to mgo ka-ap-apuan dan, woy ka koot-otawan ni Juda ian ka pig-aam. 17 Nigtangko ka mgo puntuk ni Juda, woy pig-aam ka mgo kapunganan ni Sira. Inpatangko ni Josue ka mgo lunggunan ni Sira woy ka lunggunan ni Sabdi ian ka pig-aam. 18 Inpatangko ni Josue ka lunggunan ni Sabdi pinabadyo to kara lukos to lunggunan, woy ka pig-aam ian si Akan no anak ni Karmi, no anak ni Sabdi, no anak ni Sira no kapunganan ni Juda.
19 No nigkagi si Josue ki Akan to “Anak, sadyo ka to Magboboot no Igbudyag to Israil woy nangoni nu sikandin. Nangoni a nu ko nokoy ka pighimu nu. Doka a nu ‘ghoosi.”
20 Nigtabak si Akan to “Maugot ian! Nakasao a duon to Magboboot to Israil. Soini ka pighimu ku: 21 To nakakita a dio to hinawi no mgo kaaglagan no duon marodyow lagboy no kinabo ligkat to Babilon woy to daruwa no gatus no malison no plata woy to tampod to bulawan no hon-om no gramu ka kabogati rin, noibogan ku sikan tibo woy pigpurut ku. Inhoos ku sikan to tano sood to tukbung ku no inlobong kud no duon ka plata to diraom.”
22 No nigpa-aap si Josue to mgo otow no nigpallaguy pohondio to tukbung ni Akan. Dio dan makitoi ka tibo no inhoos no duon ka plata to diraom. 23 Pigpurut dan ka mgo kaaglagan ligkat to tukbung, woy pig-aap dan duon ki Josue woy to tibon koot-otawan to Israil, woy pigboat dan to tangkaan to Magboboot. 24 No, pig-aap ni Josue woy to tibon koot-otawan to Israil si Akan no anak ni Sira woy ka plata, ka kinabo woy ka bulawan duma to mgo anak din no lukos woy boi, mgo baka, mgo asnu, woy karniru rin, ka tukbung din woy ka tibo no kandin. Pig-aap ka tibo duon to aug to Akora.
25 Nigkagi si Josue to “Manio to pigpa-aapan koy nu to soini no igkabaybadyari noy? Kuntoon songo ogpa-aapan ka to Magboboot to igkabaybadyari nu.” No pigdorogpak sikandin to batu to tibon mgo otow to Israil, pigdorogpak to batu ka tibo no kandin. Takas to sikan, pigsilaban dan sikandin. 26 Dio to ampow to lawa ni Akan, niglimud sikandan to dakol no puntuk to mgo batu, woy nigpalinggaat sikan taman to kuntoon. No, nabohow ka moinit no goinawa to Magboboot. Ligkat to sikan no allow, pighingaranan dan ka sikan no longod no Aug to Akor*.