Josue 8

Ka Pogdoog Dio To Ai

¹ No nigkagi ka Magboboot ki Josue to “Dokad ogkahallok. Doka ogpatawara ka goinawa nu. Aapa nu ka tibon mgo otow nu no ogmangadyow, woy lusuri now ka Ai, su inbogoy kud on kaniu ka Datu to Ai duma to tibon mgo otow rin, ka lunsud din woy ka tibon tano din. ² Og-unawoon now to pighimu now to Datu to Jerico woy to lunsud din ka oghimuon now to Datu to Ai woy to lunsud din. Di to kuntoon ogpakapamurut kow to hinawi now no mgo kaaglagan woy mgo adyam. Pa-aap ka to mgo otow no oggopas to liu to lunsud.”

³ No pig-aap ni Josue ka tibon mgo lukos odyow to poglusud to Ai. Nig-aam sikandin to 30,000 no mapandoy ko ogmangadyow no mgo otow rin woy pigpohipanow rin sikandan to maukilom. ⁴ Pignangonan din sikandan to “Pamminog kow pa. Gopasi now ka liu to lunsud. Dokow ogpamariu to lunsud, woy ngilam kow tibo. ⁵ Oghondio a to lunsud duma to tibon mgo duma ku, di ko oglibuwas ka mgo otow to lunsud unawa to nokohun-a, ogpanlaguy koy. ⁶ Ogpagapon-gapon koy taman to ogka-aap noy sikandan to madmariu to lunsud. Hoo su ogmanang-nangonoy sikandan to ‘Nigpanlaguy sikandan unawaro to nokohun-a.’ No sikan ian ko ogpanlaguy koy on, ⁷ ogbokas kow ligkat to pighoosan now woy oglusuran now ka lunsud. Igbogoy to Magboboot ka lunsud duon to boad now. ⁸ Ko naroog now on ka lunsud, silabi now. Ligdongi now no ogtooron now ka insugu to Magboboot. Sikan ian ka sugu ku kaniu.”

⁹ No inpohipanow sikandan ni Josue, woy nighondio sikandan to oggopasan dan no nig-ngilam sikandan dio to taliwaro to Ai woy to Bit-il dio to ogsaopan to Ai. Di si Josue atag, nighibat pad sikandin to pig-ugpaan to mgo otow. ¹⁰ Masoom pad to pogkapawo, inpohimpod ni Josue ka mgo otow rin, nighun-a sikandin woy ka mgo igbudyag to Israil no niglibuwas pohondio to Ai. ¹¹ Nighipanow ka tibo no mgo otow duma kandin pohondio to lunsud woy nigdatong sikandan dio to tangkaan. Nig-ugpo sikandan dio to amihananto lunsud, dio to diipag to aug. ¹² Mgo 5,000 ka otow no inpohoos ni Josue taliwaro to Ai woy to Bit-il dio to ogsaopan to lunsud. ¹³ Inpa-adyad-adyad din ka mgo otow dio to litos no mgo ogsasindogan dan, inlagkos ka dio to pig-ugpaan to amihanan woy ka nighoos dio to ogsaopan. To sikan no maukilom, nigtupang si Josue duon to aug.

¹⁴ To pogkakita to datu to Ai kandan to masoom pad nig-agpas niglibuwas sikandin duma to tibon mgo otow rin odyow to pogmangmangadyawoy to Israil no ogkapantowan ka Araba dio to habagatan. Di waro sikandin nataga naan no duon mgo otow no niggopas dio to liu to lunsud. ¹⁵ Nigpa-agad-agad si Josue woy ka tibon mgo otow to Israil no pigpabatili sikandan to mgo matig Ai, woy nigpanlaguy sikandan pohondio to han-hanawan. ¹⁶ Pig-umow ka tibon mgo otow to Ai odyow to poggapon kandan, woy piggapon dan si Josue woy nagawadyan sikandan odyow to pog-ongkod to lunsud dan. ¹⁷ Waro lukos no nagaat dio to Ai woy dio to Bit-il, su niggapon ka tibo duon to Israil. Inbaagad dan ka lunsud no napuwasan no niggapon sikandan to Israil.

¹⁸ No nigkagi ka Magboboot ki Josue to “Ikawoy nu ka kommag nu no duon to boad nu no igpatangko to Ai, su igbogoy ku koikow ka lunsud.” No inkawoy ni Josue ka kommag din no inpatangko to Ai. ¹⁹ To waro do malingon-ngon, to pogkawoy ni Josue to kommag din, nig-agpas nigbokas ka mgo otow ligkat to piggopasan dan woy nigpallaguy sikandan no piglusuran dan ka lunsud. Naroog dan ka lunsud woy magaan dan do nasilabi. ²⁰ Niglingi ka mgo matig Ai, woy pigkita ran ka obol no nigturoy ligkat to lunsud, di warad ogkapanlagudyan dan su nanlibong on ka mgo otow to Israil. Konad ogpanlaguy ka mgo otow ni Josue pohondio to han-hanawan no nig-atu on sikandan to mgo niggapon kandan. ²¹ Hoo su to pogkakita ni Josue woy to mgo otow to Israil no naroog to mgo niggopas ka lunsud, woy no nigturoy on ka obol ligkat to lunsud niglibong on sikandan no nig-atu to mgo otow to Ai. ²² Songo niglibuwas to lunsud no nig-atu kandan ka mgo otow no niggopas no inat naligpisan sikandan to taliwaro no nalingutan to mgo otow to Israil. Pigpanghimatadyan sikandan to mgo otow to Israil taman to noubus sikandan nammatoy no waro sagboka kandan no nakapanlaguy. ²³ Di narakop dan ka datu to Ai woy pig-aap dan sikandin no manokal pad dio to ki Josue. ²⁴ To naponga on to mgo otow to Israil ka poghimatoy to tibon mgo otow to Ai dio to mgo kamot woy dio to han-hanawan no piggaponan dan, no pigpanigbas on ian ka tibo kandan, niglibong ka mgo otow to Israil dio to Ai woy pigpanghimatadyan dan ka tibo no duon dod dio. ²⁵ 12,000 ka mgo lukos woy boi no namatoy to sikan no allow – tibo ian to mgo otow to Ai. ²⁶ Su waro intuntun ni Josue ka boad din no nigkawoy to kommag din taman to noubus pigpanghimatadyan din ka tibo no nig-ugpo to Ai. ²⁷ Di pig-agow to mgo otow to Israil ka mgo adyam woy mgo kaaglagan to lunsud sumao to innangon to Magboboot ki Josue. ²⁸ No sikan ian pigsilaban ni Josue ka Ai, woy piggugus din ian odyow no warad og-ugpo dio taman to kuntoon no allow. ²⁹ Pigbitoy ni Josue ka datu to Ai dio to sagboka no kadyu, woy ingaat din dio taman to mahapun on. To pogsaop to allow, nigsugu si Josue no igpalogsad ka lawa woy to pogtugdo to sikan dio to tangkaan to gomawan to lunsud. Pigbunbunan dan ka lawa to dakol no puntuk to mgo batu no nigpalinggaat taman kuntoon.

Ka Pogbasa to Kasabutan

³⁰ Takas to sikan, nighimu si Josue to tubaranan tongod to Magboboot no Igbudyag to Israil dio to bubungan to Ibal. ³¹ Pighimu rin ka tubaranan sumao to insugu ni Mosis no suguanon to Magboboot. Sumao to nasulat duon to libru to balaod ni Mosis, pighimu rin ka tubaranan pinabadyo to mgo batu no malibuson – waro ian mabasbasi to putow. Dio to sikan no tubaranan nigtaruwoy sikandan to mgo tutungonon no mgo igtubad duon to Magboboot, woy nigtubad sikandan to mgo tubad to pogkasagboka. ³² Dio to tangkaan to mgo otow to Israil, inpatik ni Josue to mgo batu ka udlin no nasulat ni Mosis. ³³ Nigmanhasindog ka tibon mgo otow to Israil, inlagkos ka mgo kapunganan ni Jacob woy ka mgo nig-agpot do duon, duma to mgo igbudyag dan, mgo duon katondanan woy mgo taaghusoy, dio to pinoglimang to Sooranan to Magboboot no nigtangko to nigtiang to sikan no mgo taagpanubad no mgo kapunganan ni Livi. Sagboka no baad to koot-otawan ka nighasindog to tangkaan to bubungan to Girisim woy ka dangob no baad duon nighasindog to tangkaan to bubungan to Ibal, sumao to insugu ni Mosis no suguanon to Magboboot dongan to nignangon sikandin ko ogmonuon to pogbolig to mgo otow to Israil. ³⁴ Takas to sikan, pigbasa ni Josue ka tibon mgo kinagian to Balaod – inlagkos ka mgo pogbolig woy mgo tungadyow – sumao to nasulat duon to libru to Balaod. ³⁵ Waro ian sagboka no kinagian to tibo no insugu ni Mosis ka waro makagi ni Josue duon to tibon koot-otawan to Israil, inlagkos ka mgo boi woy mgo bato woy ka tibo no mgo konon kapunganan ni Israil no nig-agpot kandan to pog-ugpo.