9
Ka Poggawoy To Mgo Matig Gibion
1 No kuntoon nakarinog ka mgo datu no nig-ugpo to ogsaopan to Jordan no woig tongod to soini no mgo pighimu to mgo otow to Israil. Sikandan ian ka mgo datu to mgo bubungan, to mgo daligdigan to ogsaopan woy to tibon ilis to Dakol no Dagatapohondio to Libanon. Mgo igbudyag sikandan to mgo kapunganan ni Hit, ni Amor, ni Canaan, ni Piris, ni Hib woy ni Yibus. 2 To pogkarinog dan to sikan, nasagboka sikandan odyow to pog-atu ki Josue woy to koot-otawan to Israil. 3 Di ka mgo otow to lunsud to Gibion atag, to pogkarinog dan to pighimu ni Josue dio to Jerico woy duon to Ai, 4 nigbabantaan sikandan to poggawoy. Nighipanow sikandan odyow to pogsasabut no pig-unturan dan ka mgo asnu ran to mgo taan no mgo saku woy to mgo taan no sooranan to binu no nan-goat woy nanatupakan on. 5 Nigsau-ub ka mgo otow to mgo naluhus on woy natupakan no mgo sapatus dan woy to mgo taan no kinabo. Makogal woy abungawan on ka pan no bohow ran. 6 Nighondio sikandan ki Josue duon to pig-ugpaan to mgo otow to Gilgal woy pignangonan dan sikandin woy to mgo otow to Israil no “Nigligkat koy to mariu lagboy no ugpaan. Oghimu kow to kasabutan poron kanami.”
7 Nigtabak ka mgo otow to Israil duon to soini no mgo kapunganan ni Hib to “Naugpa nig-ugpo kow marani kanami atag. Ogmonuon noy naan to poghimu to kasabutan kaniu?”
8 Nigtabak sikandan ki Josue to “Mgo suguanon koy nu.”
Di nig-inso si Josue to “Hontow kow no otowa, woy matig hondoi kow?”
9 Nigtabak sikandan to “Sikanami no mgo suguanon now, nigligkat koy to mariu lagboy no ugpaan tongod to kabantug to Magboboot no Igbudyag now. Hoo su nakarinog koy to tibo no pighimu rin to Ehiptu, 10 woy to tibo no pighimu rin to daruwa no datu to mgo kapunganan ni Amor dio to ogsilaan to Jordan – ian si Sihon no datu to Hisbon woy si Og no datu to Basan no nigboboot dio to Astarot. 11 Pignangonan koy to mgo igbudyag noy woy to tibo no nig-ugpo to kanami to ‘Bobohow kow, woy hipanow kow odyow to pogtomu kandan woy nangoni now sikandan to ‘Sikanami, mgo suguanon koy now. Himu kow to kasabutan kanami.’’ 12 Soini no pan noy, moinit pad to pogbohow noy dio to ugpaan noy to allow no nigligkat koy odyow to poghondii. Di kuntoon pitow kow no makogal woy abungawan on. 13 Woy soini no mgo sooranan to binu no pigsooran noy, iam pad porom, di kuntoon pitow kow no nan-goat on. Soini no mgo kinabo noy woy ka sapatus noy nigmanipis on tongod to kariu to pighipanawan noy.”
14 Pig-ol-oogan to mgo otow to Israil ka mgo koonon dan, di waro sikandan nig-inso to Magboboot. 15 No nighimu si Josue to kasabutan to ka-awangan kandan no kono oghimatadyan sikandan, woy songo nigpangulibot ka mgo igbudyag to Israil.
16 Tatou no allow takas to poghimu ran to kasabutan duon to mgo otow to Gibion, nigdinog ka mgo otow to Israil no marani ro naan sikandan nig-ugpo. 17 No nighipanow ka mgo otow to Israil, woy to igkatou no allow niglopow sikandan to mgo lunsud dan; ian ka mgo lunsud to Gibion, Kipira, Biirot woy Kiriat Yarim. 18 Di waro nigmangadyow ka mgo otow to Israil kandan. Hoo su nangulibot ka mgo igbudyag to koot-otawan pinabadyo to ngaran to Magboboot no Igbudyag to Israil. Nig-aaras ka tibon mgo otow dio to mgo igbudyag dan, 19 di nigtabak ka mgo igbudyag to “Nangulibot koy kandan dio to tangkaan to Magboboot no Igbudyag to Israil, woy kono kid ogpaka-amonu kandan kuntoon. 20 Soini ka oghimuon ta kuntoon kandan: kono tad oghimatadyan sikandan, hoo, su ogkatungadyawan ki ko ogtamporon ta ka pangulibot no pighimu ta kandan.” 21 Nigparagas sikandan to “Baagara now sikandan no ogkoudyag pad, di ogkohimu sikandan no mgo taagpangadyu woy mgo taagsakoru to tibon koot-otawan ta.” Woy sikan ian no waro matampod ka kasabutan to mgo igbudyag kandan.
22 No pig-umow ni Josue ka mgo matig Gibion woy nigkagi sikandin to “Manio to piggawadyan koy now to pognangon now to ‘Nig-ugpo koy to mariu kaniu,’ dokad di marani kow ro nanaan nig-ugpo? 23 Kuntoon, ogkatungadyawan kow on: kono oghagtong no ogkohimu kow no mgo taagpangadyu woy mgo taagpanakoru dio to baoy to Magboboot taman to katamanan.”
24 Nigtabak sikandan ki Josue to “Nigdinog koy to maugot to insugu to Magboboot no Igbudyag now dio to suguanon din no si Mosis no igbogoy rin kun ka tibon tano kaniu woy ogpanghimatadyan din ka tibon mgo tag-inugpo to tangkaan now. No sikan ian no nahallok koy kaniu no ogkangkammatoy koy, woy sikan ian ka pugtian to pighimu noy. 25 Di kuntoon kaniu ka ogboot kanami. Himua now kanami ko nokoy ka nadoromdoman now no litos.”
26 No sikan ian no pigpangabangan sikandan ni Josue odyow no kono ogpanghimatadyan sikandan to mgo otow to Israil. 27 To sikan no allow, pighimu rin ka mgo matig Gibion no mgo taagpangadyu woy mgo taagsakoru to tibon koot-otawan woy dio to tubaranan to Magboboot ko hondoi igpapos-ok sikan to Magboboot. Woy sikan ian ka tarabau ran taman kuntoon no mgo allow.