10
Ka Pogkaroog Dio To Mgo Kapunganan Ni Amor
1 No kuntoon, nigdinog si Adoni-Sidik no datu to Jirusalim no naroog ni Josue ka Ai woy no nagugus on ian sikan woy no inbitoy rin ka datu to Ai unawa to pighimu rin to Jerico woy to datu dio. Songo nigdinog sikandin no nighimu ka mgo matig Gibion to kasabutan to ka-awangan dio to koot-otawan to Israil woy nig-ugpo do sikandan to marani kandan. 2 Nohinaatan lagboy sikandin woy ka koot-otawan din to soini su mabantug no lunsud ka Gibion, iing to mgo lunsud to mabantug no datu. Dakol-dakol ka Gibion to Ai, woy mabuut ko ogmangadyow ka mgo otow dio. 3 No nigpabulig si Adoni-Sidik dio to ki Hoham no datu to Hibron, ki Piram no datu to Yarmut, ki Yapia no datu to Lakis, woy ki Dibir no datu to Iglon. 4 Kagi rin to “Hondii kow woy buligi a now to poglusud to Gibion su nighimu sikandan to kasabutan to ka-awangan dio to ki Josue woy to koot-otawan to Israil.”
5 No sikan ian no nasagboka ka mgo datu to mgo kapunganan ni Amor; ian ka mgo datu to Jirusalim, to Hibron, to Yarmut, to Lakis woy to Iglon. Pig-aap dan ka tibon mgo sundau ran woy inpa-adyad-adyad dan pad ka mgo otow dio to tangkaan to Gibion woy piglusuran dan. 6 Nigpa-aap ka mgo otow to Gibion to kinagian dio ki Josue to pig-ugpaan din to Gilgal no kagi “Doka ogbaagara ka mgo suguanon nu. Agpas kow oghondii odyow to pogpangabang kanami. Buligi koy su niglusud kanami ka tibon mgo datu to mgo kapunganan ni Amor ligkat to kabubunganan.”
7 No sikan ian, nighipanow si Josue ligkat to Gilgal duma to tibon mgo otow rin, inlagkos ka mgo mapandoy ko ogmangadyow no mgo duma rin.
8 Nigkagi ka Magboboot ki Josue to “Doka ogkahallok kandan. Inbogoy kud on sikandan kaniu. Waro sagboka kandan no ogpaka-atu kaniu.” 9 Nighipanow si Josue to tibon maukilom ligkat to Gilgal woy natokowan ka mgo usig dan to poglopow ran. 10 Pigsasow to Magboboot ka mgo otow to tangkaan to Israil. Naroog sikandan to dakol no mangadyow dio to Gibion. Piggapon to mgo otow to Israil sikandan dio to daan no oghondio to Bit Horon. Pigpanigbas dan sikandan pohondio to Asika woy to Makida. 11 To pogpanlaguy ran to tangkaan to Israil to daan ligkat to Bit Horon pohondio to Asika, pigpandogpak to Magboboot sikandan to iceano nono-uug iing to uran. Molmoon-ing kandan ka namatoy tongod to ice, malmaintok do ka pighimatadyan to mgo moirob to mgo kapunganan ni Israil.
Nigsagdok ka Allow
12 To sikan no allow no inbogoy to Magboboot ka mgo kapunganan ni Amor dio to Israil, nigkagi si Josue dio to Magboboot dio to tangkaan to koot-otawan to Israil to “Allow, sagdok ka ampow to Gibion. Buwan, sagdok ka dio to ampow to Aug to Ayalon.” 13 Woy sikan ian no nigsagdok ka allow to poghipanow rin, woy songo nigsagdok ka buwan, taman to naroog to koot-otawan ka mgo usig dan. Songo nasulat soini to Libru ni Yasarb. Nigsagdok ian ka allow taliwaro to langit woy nigtataantaan to pogsaop to mgo songo allow. 14 Waro allow no iing to sikan no allow ligkat to binunsuran taman kuntoon. Allow sikan no nigpamminog ka Magboboot to sagboka no otow. Maugot ian no nigmangadyow ka Magboboot no nigbulig to Israil! 15 Takas to sikan, nig-uli si Josue duma to tibon mgo otow to Israil dio to Gilgal.
16 No kuntoon, nakapanlaguy ka lalima no mgo datu woy nighoos sikandan to sagboka no pilang dio to Makida. 17 To nakarinog si Josue no nakitaan ka lalima no mgo datu no nighoos to sagboka no pilang dio to Makida, 18 nignangon sikandin to “Liira now ka mgo dagdakol no batu odyow to pogsongsong to lingangaan to pilang woy sabuk kow to pila no otow dio no ogbabantoy. 19 Di dokow ogsagdok dio! Gapona now ka mgo usig now. Panigbasa now sikandan ligkat to koiniugan dan odyow no kono ogpaka-uli sikandan to mgo lunsud dan. Hoo su inbogoy sikandan to Magboboot no Igbudyag now dio to mgo boad now.” 20 No sikan ian no noubus sikandan nammatoy. Manalimboka ro ian ka nakalopow to mgo in-ootan no mgo lunsud dan.
21 Nig-uli ka tibon koot-otawan no waro noomonu dio to ki Josue to pig-ugpaan din to Makida. Warad on otow no ogpakalangub to pogkagi to maroot to koot-otawan ni Israil. 22 Nigkagi si Josue to “Puwasi now on ka pilang woy palibuwasa now ka sikan no mgo datu kai to koddi.” 23 Woy sikan ian no pig-aap dan ka lalima no datu ligkat to pilang. Ian ka mgo datu to Jirusalim, to Hibron, to Yarmut, to Lakis woy to Iglon. 24 To na-aap dan ka soini no mgo datu dio to ki Josue, piglimud din ka tibon mgo otow to Israil woy pignangonan din ka mgo igbudyag to mgo sundau no nakaruma kandin to “Dii kow woy dioki now ka mgo li-og to soini no mgo datu.” Woy nigdani ian sikandan woy pigdiokan dan ka mgo li-og to mgo datu.
25 Nigkagi si Josue kandan to “Dokow ogkahallok. Dokow ogpatawara ka mgo goinawa now. Nokal-nokal kow woy dokow ian ogpatatabiow. Soini ka oghimuon to Magboboot to tibon mgo usig now no ogmangadyowon now.” 26 No pigpanigbas ni Josue ka tibon mgo datu no pighimatadyan din sikandan. Pigpambitoy rin ka mgo lawa ran duon to mgo kadyu taman to maapun on. 27 To pogsaop on to allow, nigsugu si Josue no igpaogsad dan ka mgo lawa woy intugdo dan dio to pilang no pighoosan dan. Niglimud sikandan to dakol no puntuk to mgo batu dio to lingangaan to pilang, woy nigpalinggaat soini taman to kuntoon no allow. 28 To sikan no allow, naroog ni Josue ka Makida. Pigpanigbas din ka datu woy ka tibon mgo otow to lunsud. Pigpanghimatadyan din ian ka tibo dio; waro ian nagaat no manokal. Unawa to pighimu rin to datu to Jerico ka pighimu rin to datu to Makida.
29 Ligkat dio nighipanow si Josue duma to tibon mgo otow to Israil ligkat to Makida pohondio to Libna, woy piglusuran dan ka sikan no lunsud. 30 Songo inbogoy to Magboboot ka sikan no lunsud woy ka datu to sikan dio to boad to koot-otawan to Israil. Pigpanigbas ni Josue ka tibon mgo otow to sikan no lunsud. Waro nagaat no manokal dio. Songo pighimatadyan din ka datu dio unawa to pighimu rin to datu to Jerico.
31 No nighipanow man on si Josue duma to tibon koot-otawan to Israil ligkat to Libna pohondio to Lakis. Inpa-adyad-adyad din ka mgo otow rin woy pigpalusuran din ka lunsud. 32 Inbogoy to Magboboot ka lunsud to Lakis dio to Israil woy naroog ni Josue to igkorangob no allow. Pigpanghimatadyan din ka tibon mgo otow dio unawa to pighimu rin to Libna. 33 Tagood to dio si Josue to Lakis, niglopow si Horam no datu to Gisir odyow to pogpangabang porom to Lakis, di naroog sikandin ni Josue duma to tibon mgo sundau rin. Waro sagboka kandan atag ka nagaat no manokal.
34 No nighipanow man on si Josue woy ka tibon koot-otawan to Israil ligkat to Lakis pohondio to Iglon. Nigpa-adyad-adyad sikandan dio woy piglusuran dan ka lunsud. 35 Naroog dan to sikan dod no allow, woy pigpanigbas dan ka tibon mgo otow dio woy pigpanghimatadyan dan ka tibo, unawa to pighimu ran to Lakis.
36 Ligkat dio to Iglon, nighipanow si Josue duma to tibon koot-otawan to Israil pohondio to Hibron, woy piglusuran dan. 37 Naroog dan ka lunsud woy pigpanigbas dan ka tibon mgo otow dio inlagkos ka datu duon woy ka mgo otow no duon to mgo hilit-hilit. Waro nagaat no manokal dio. Unawa to dio to Iglon, pigpanghimatadyan ka tibon mgo otow dio.
38 No, nigliku si Josue duma to tibon mgo otow to Israil, woy piglusuran dan ka Dibir. 39 Naroog dan ka lunsud, ka datu woy ka tibon mgo hilit-hilit. Pigpanghimatadyan dan ka tibon mgo otow to sood to sikan, woy waro ian ingaat dan no manokal. Pighimatadyan dan ka datu to Dibir unawa to pighimu ran dio to Libna woy to Hibron.
40 No sikan ian no naroog ni Josue ka mgo otow to sikan no tibon tano, inlagkos ka kabubunganan, ka Nigib, ka mgo bub-bubungan dio to ogsaopan, woy ka mgo daligdigan to bubungan, duma to tibon mgo datu to sikan. Waro ingaat din no manokal. Pigpanghimatadyan din ka tibo no duon goinawa, unawa to insugu to Magboboot no Igbudyag to Israil. 41 Naroog ni Josue ka tano ligkat to Kadis Barnia pohondio to Gasa, woy ligkat to longod to Gosin pohondio to Gibion. 42 Naroog ni Josue soini tibon mgo datu woy mgo tano to kasagboka ro no pogmangadyow. Hoo, su nigmangadyow ka Magboboot no Igbudyag to Israil no nigbulig to Israil.
43 Takas to sikan, nig-uli si Josue duma to tibon mgo otow to Israil dio to pig-ugpaan dan to Gilgal.