11
Ka Pogkaroog Dio To Duma No Mgo Datu
1 To pogdinog ni Yabin no datu to Hatsor to soini tibo, nigpa-aap sikandin to kinagian dio to ki Yobab no datu to Madon, dio to mgo datu to Simron woy to Aksap, 2 woy dio pad to mgo datu to amihananano dio to mgo bubungan, dio to Araba no dio to habagatanbto Kinirit, dio to mgo kabubunganan to ogsaopan woy dio to Napot Dor to ogsaopan. 3 Songo nigpa-aap sikandin to kinagian dio to mgo kapunganan ni Canaan dio to ogsilaan woy dio to ogsaopan pad; dio to mgo kapunganan ni Amor, ni Hit, ni Piris woy ni Yibus no dio to kabubunganan, woy dio to mgo kapunganan ni Hib no dio to linogsaran to bubungan to Hirmon no marani to Mitspa. 4 Nighipanow sikandan tibo, duma to tibon mgo sundau ran, woy moon-ing ka mgo kuddo woy mgo unturanan dan. Potpotukan no puntuk to mgo sundau no konad ogkasool sikan unawa to badyokbok dio to ilis to dagat no kono ogkasool.
5 Nasagboka soini tibon mgo datu woy namos-ok sikandan tibo to mgo tukbung dan dio to longod to Woig to Mirom, odyow no ogkasagboka sikandan to pog-atu to koot-otawan to Israil. 6 Nigkagi ka Magboboot ki Josue to “Doka ogkahallok kandan, hoo su to iing soini no allow asoom igbogoy ku sikandan tibo no nammatoy on duon to Israil. Panggot-gota now ka mgo loklokonan to mgo kuddo dan no ogpo-ingku-ingku on, woy pansilabi now ka mgo unturanan dan to ogminangadyow.”
7 No, sikan ian no pigtokowan sikandan lusuri ni Josue woy to tibon mgo sundau rin dio to Woig to Mirom, 8 woy inbogoy sikandan to Magboboot dio to boad to mgo otow to Israil. Naroog dan, woy piggapon dan sikandan pohondio to Sidon, to Misripot Maim woy dio to Aug to Mitspa to ogsilaan taman to warad on nagaat no manokal. 9 Pighimu ni Josue kandan ka tibo no innangon to Magboboot; piggot-got din ka mgo loklokonan to mgo kuddo dan no ogpo-ingku-ingku on, woy pigsilaban din ka mgo unturanan dan.
10 Takas to sikan, niglibong si Josue woy naroog din ka lunsud to Hatsor woy ka datu to sikan. (Ka Hatsor ian ka punuan no lunsud to sikan no tibon mgo lunsud.) 11 Pigpanigbas dan ka tibon mgo otow to sikan no lunsud. Pigpanghimatadyan dan ka tibo, no waro nasamo dan no otow no duon goinawa. Takas to sikan, pigsilaban ni Josue ka lunsud to Hatsor. 12 Naroog ni Josue soini tibon duon datu no mgo lunsud, woy pigpanghimatadyan din ka tibon mgo datu woy mgo tagilunsud dan. Naroog din lagboy soini tibo, sumao to sugu ni Mosis no suguanon to Magboboot. 13 Di waro masilabi to Israil ka soini no mgo lunsud no nanapos-ok dio to mgo bubungan dan. Ka Hatsor naan do ka pigsilaban ni Josue. 14 Pigpurut to koot-otawan to Israil ka tibon hinawi woy mgo adyam to soini no mgo lunsud, di pigpanigbas dan ka tibon mgo otow taman to warad on ian nagaat no niggogoinawa to soini.
15 Ka mgo sugu to Magboboot ki Mosis no suguanon din ian ka insugu ni Mosis ki Josue, woy pighimu ni Josue ka tibo. Waro sugu to Magboboot ki Mosis no waro toora ni Josue. 16 No sikan ian no natagtuun ni Josue ka tibon tano; ka kabubunganan, ka tibon Nigib, ka mgo ugpaan no marani to Gosin, ka mgo bub-bubungan dio to ogsaopan, ka Araba woy ka tibon mgo bubungan to Israil duma to mgo bub-bubungan. 17 Ligkat to Bubungan to Halak no marani to Siir, pohondio to Baal Gad to Aug to Libanon no dio to linogsaran to Bubungan to Hirmon, narakop din ka tibon mgo datu, woy pigpanigbas din no pighimatadyan.
18 Malmaugoy ka pogmangadyow ni Josue to soini tibon mgo datu. 19 Waro lunsud ka nighimu to kasabutan to ka-awangan dio to koot-otawan to Israil ko konon ka mgo kapunganan ni Hib naan do no nig-ugpo dio to Gibion. Naroog to Israil atag ka tibo. 20 Hoo, su inpamakogal to Magboboot ka mgo goinawa to kandan tibo odyow no ogmangadyow sikandan tibo dio to koot-otawan to Israil, odyow no ogkapanghimatadyan sikandan tibo to waro koid-u no ogka-awo tibo sikandan to tano, sumao to sugu to Magboboot ki Mosis.
21 Songo pighimatadyan ni Josue to sikan no mgo allow ka mgo kapunganan ni Anakcno nig-ugpo to kabubunganan; dio to Hibron, to Dibir, woy to Anab, woy dio to kabubunganan to Juda, woy to tibon kabubunganan to Israil. Pigpanghimatadyan sikandan tibo ni Josue, woy naroog din ka mgo lunsud dan. 22 Waro kapunganan ni Anak no nagaat dio to tano to mgo otow to Israil. Ian naan do nagaat ka dio to Gasa, to Gat woy to Asdod.
23 No, sikan ian no naroog ni Josue ka tibon tano, unawa to innangon to Magboboot ki Mosis. Inpambogoy ni Josue ka tano dio to mgo kapunganan ni Israil sumao to mgo puntuk dan. Takas to sikan, nakahimooy ka tano to pogminangadyawoy.