23
Nignangon-nangon ka mgo birsikulu to kapitulu 12 pohondio to kapitulu 22 moitongod to tano woy mgo lunsud no naroog ni Josue woy pigmonu rin to pogpambogoy to kara puntuk to koot-otawan. Pigtinuru din ka tano no litos to kara kapunganan ni Israil.
Ka Baghot Ni Josue To Mgo Igbudyag
1 Nigligad on ka molmoon-ing no mgo tuid, woy nigbogoy ka Magboboot to ka-awangan dio to koot-otawan to Israil no warad on oglusud kandan no mgo usig dan. To sikan no mgo allow, maadyat on ka pannuigon ni Josue woy budyag on sikandin. 2 Inpo-umow rin ka koot-otawan to Israil – ian ka mgo budyag dan, ka mgo igbudyag, ka mgo taaghusoy woy ka mgo duon katondanan. Nigkagi sikandin kandan to “Maadyat on ka pannuigon ku, woy budyag ad on. 3 Kaniu ian ka nakakita to tibo no pighimu to Magboboot no Igbudyag now to soini no mgo koot-otawan tongod kaniu. Ka Magboboot ian ka nigmangadyow tongod kaniu. 4 Doromdoma now no pigpantinuru ku to kaniu no mgo puntuk ka tibon tano to mgo koot-otawan no nagaat, inlagkos pad ka tano to mgo koot-otawan no naroog kud on; ka tibon tano ian ligkat to Jordan no woig pohondio to Dakol no Dagatato ogsaopan. 5 Ogdogilon sikandan to Magboboot to tangkaan now. Ogkaroldol din sikandan to tangkaan now, woy kaniu ka ogpakatagtuun to tano dan, sumao to inpangulibot to Magboboot no Igbudyag now kaniu.
6 “Nokal-nokal kow lagboy, woy bantoy kow no ogtooron now ka tibo no insulat dio to Libru to Balaod ni Mosis. Kono kow ian ogsuwoy pohondio to gibang woy ko pohondio to kawanan. 7 Dokow og-agpot to duma no mgo koot-otawan no nigpalinggaat to taliwaro now. Dokow og-umow duon to ngaran to mgo tinuuhan dan, woy kono kow ogpangulibot pinabadyo to mgo ngaran dan. Kono kow ian ogga-at to sikan no mgo tinuuhan dan, woy kono kow ogluhud kandan. 8 Oggon-gonan now atag ka Magboboot no kono now ogloka-an, unawa to pighimu now taman kuntoon.
9 “Pigdogil to Magboboot to tangkaan now ka mgo dakol woy mabogbog no mgo koot-otawan. Taman to kuntoon no allow, waro sagboka kandan ka naka-atu kaniu. 10 Sagboka no otow kaniu ka ogpakaroog to songo libu kandan. Hoo, su ogmangadyow ka Magboboot tongod kaniu unawa to inpangulibot din. 11 No, sikan ian no bantadyi now no ogdakolon now ka goinawa now duon to Magboboot no Igbudyag now.
12 “Di ko og-iniugan now sikandin, woy ko ogdani kow to nagaat no manokal no mgo otow to sikan no mgo koot-otawan no duon to taliwaro now, woy ko ogmang-asawa kow kandan woy og-agpot kow kandan, 13 no, ogpaka-iman-iman kow no konad ogdogilon to Magboboot ka sikan no mgo koot-otawan to tangkaan now. Ogkohimu sikandan no mgo lit-ag woy mgo baatik to kaniu atag. Ogkohimu sikandan no mgo baras to mgo poka now, woy mgo dugi duon to mgo mata now taman to ogkangkammatoy kow tibo to soini no marodyow no tano no inbogoy to Magboboot no Igbudyag now kaniu.
14 “No kuntoon, sumasaop ad on no magaan ad on ogpaka-agpot to mgo minuna ta. Nataga kow to goinawa now no waro agad sagboka to mgo marodyow no inpangulibot to Magboboot no Igbudyag now ka waro din toora. Natood ian ka tibo; waro sagboka ka nalipasan. 15 Di, unawa to natood to Magboboot no Igbudyag now ka tibon mgo inpangulibot din, songo ogtooron din ka tibon mgo tungadyow no inhinaat din kaniu, taman to ogkoubus kow ogkammatoy to soini no marodyow no tano no inbogoy rin kaniu. 16 Ko ogligalon now ka kasabutan to Magboboot no Igbudyag now, no insugu din kaniu, no oghondio kow no ogga-at kow to duma no mgo tinuuhan, woy ogluhud kow kandan, oglogdog ka kabou to Magboboot kaniu, woy magaan kow ro ogkangkammatoy to soini no marodyow no tano no inbogoy rin kaniu.”