24
Ka Poghogot To Kasabutan
1 Takas to sikan, inpalimud ni Josue ka tibon mgo puntuk to koot-otawan to Israil dio to Sikim. Pig-umow rin ka mgo budyag, mgo igbudyag, mgo taaghusoy woy ka mgo duon katondanan to Israil, woy niglopow sikandan no dio to tangkaan to Magboboot. 2 Nigkagi si Josue to tibon mgo otow to “Soini ka mgo kinagian to Magboboot no Igbudyag to Israil. Kagi rin to ‘To dongan pad, nig-ugpo ka mgo minuna now dio to limang to Eupratis no woig, woy nigga-at sikandan to loin no mgo tinuuhan. Inlagkos kandan si Tira no amoy ni Abraham woy ni Nahor. 3 Di pig-umow ku ka amoy now no si Abraham ligkat to tano no dio to limang to Eupratis no woig, woy pig-aap ku sikandin to poghip-hipanow to tano to Canaan, woy pigbogadyan ku sikandin to moon-ing no mgo tipouri no otow. Pigbogadyan ku sikandin ki Isaak, 4 woy pigbogadyan ku si Isaak ki Jacob woy ki Esau. Intinuru ku ki Esau ka tano to kabubunganan to Siir, di nighondio si Jacob woy ka mgo anak din no lukos dio to Ehiptu.
5 “'Takas to sikan, inpa-aap ku si Mosis woy si Aaron, woy pigbaybadyaran ku ka mgo matig Ehiptu dio, woy pig-aap ku sikaniu libuwas dio. 6 To pog-aap ku to mgo amoy now ligkat to Ehiptu, niglopow sikandan to dagat, woy piggapon sikandan to mgo matig Ehiptu no nig-untud to mgo unturanan dan woy to mgo nig-untud to kuddo pohondio to Malaab no Dagat. 7 Di, nigpan-nanoy ka mgo amoy now koddi no Magboboot, woy nigsabuk a to dooman taliwaro kaniu woy to mgo matig Ehiptu; woy takas to sikan pigbunbunan ku ka mgo matig Ehiptu to woig to dagat. Nakita now to kaniu ro no mgo mata ka pighimu ku to mgo matig Ehiptu. Takas to sikan, nig-ugpo kow to han-hanawan to malmaugoy no mgo tuid.
8 “‘Pig-aap ku sikaniu dio to tano to mgo kapunganan ni Amor no nig-ugpo dio to ogsilaan to Jordan no woig. Nigmangadyow sikandan kaniu, di inbogoy ku sikandan duon to boad now. Pigpanghimatadyan ku sikandan to tangkaan now, woy kaniu on ka nakatagtuun to tano dan. 9 To nigbabantaan si Balak no anak ni Sipor no Datu to Moab to pogmangadyow duon to Israil, nig-umow sikandin ki Balaam no anak ni Bior odyow to pogtungadyow porom to kaniu. 10 Di, waro a nigpannalinga ki Balaam, woy sikan ian no anoy su ogtungadyow porom, nig-ungud nigbolig sikandin kaniu atag, woy piglipuwasan ku sikaniu ligkat to boad ni Balak.
11 “‘Takas to sikan, nigtalipag kow to Jordan no woig woy niglopow kow to Jerico. Nigmangadyow kaniu ka mgo otow to Jerico unawa to mgo kapunganan ni Amor, ni Piris, ni Canaan, ni Hit, ni Girgas, ni Hib woy ni Yibus, di inbogoy ku sikandan tibo duon to mgo boad now. 12 Inpohun-a ku ka tabu-uan kaniu, woy sikan ka nigdogil kandan to tangkaan now, inlagkos pad ka daruwa no Datu to mgo kapunganan ni Amor. Konon sikaniu ka nakaroog pinabadyo to mgo kampilan woy mgo busug now. 13 No sikan ian no pigbogadyan ku sikaniu to tano no waro now kamota, woy mgo lunsud no waro now pos-oki. Kuntoon kaniu ian ka nig-ugpo to sikan, woy nigkoon kow to bogas to mgo paras woy mgo olibu no waro now ipamua.’”
14 Nigkagi pad si Josue to “No kuntoon, kahalloki now ka Magboboot, woy sikandin ka ogga-aton now to waro pogsuwoy. Ongkori now ka mgo tinuuhan to mgo kabuybudyagan now no pigsadyo dan dio to limang to woig to Eupratis woy dio pad to Ehiptu, woy ga-ata now ro ka Magboboot. 15 Di, ko inat konon marodyow to kaniu ka pogga-at to Magboboot, no, aam kow kuntoon no allow ko hontow ka ogga-aton now. Aam kow ko ogga-aton now ka mgo tinuuhan to mgo kabuybudyagan now dio to limang to Eupratis no woig, woy ko mgo tinuuhan to mgo kapunganan ni Amor no ian tagtuun nokani to tano no pig-ugpaan now kuntoon. Di ko sikoddi ka og-insoon now duma to lunggunan ku, ka Magboboot do ian ka ogga-aton noy.”
16 No, nigtabak ka mgo otow to “Kono ian ogkohimu no og-iniugan noy ka Magboboot odyow to pogga-at to duma no mgo tinuuhan! 17 Ka Magboboot ian ka nig-aap kanami duma to mgo amoy ta ligkat to Ehiptu, ligkat to sikan no tano to pogko-uripon ta, woy sikandin ka nighimu to mgo ogko-in-inuan to tangkaan to pogpitow ta. Sikandin ka nigbantoy kanta to tibon poghipanow ta, woy taliwaro to tibon duma no koot-otawan no pigligaran ta. 18 Nokoy pad no ka Magboboot ian ka nigdogil to mgo koot-otawan to tangkaan ta, inlagkos ka mgo kapunganan ni Amor no nig-ugpo to tano. Songo ogga-aton noy ka Magboboot su sikandin ian ka Igbudyag no pigtuuhan ta.”
19 Nigkagi pad si Josue to mgo otow to “Kono kow buwa ogpakagoon to pogga-at to Magboboot. In-oog lagboy no Magboboot sikandin. Talikuron no Magboboot sikandin. Kono din oglipasan ka mgo sao now woy ka pog-atu now. 20 Ko og-iniug kow to Magboboot no ogga-aton now ka loin no mgo tinuuhan, ogsagmanon kow rin woy ogpa-aap sikandin kaniu to dakol no igkabaybadyari now, woy ogka-awo kow tibo, agad no marodyow ka pighimu rin to kaniu taman kuntoon no allow.”
21 Di nigtabak ka mgo otow ki Josue to “Kono koy! Ogga-aton noy ro ka Magboboot.”
22 No nigkagi si Josue to “No, ogpakapamaugot kow to innangon now no naka-aam kow to pogga-at to Magboboot.”
Nigtabak sikandan to “Hoo, ogpakapamaugot koy.”
23 No kagi ni Josue to “No, kuntoon, igdogpak now ka tibon mgo inotowotow to loin no tinuuhan no duon to taliwaro now, woy igbogoy now ka tibon goinawa now duon to Magboboot no Igbudyag to Israil.”
24 Woy nigkagi ka mgo otow ki Josue to “Ogga-aton noy ka Magboboot no Igbudyag noy woy ogpannalinga koy kandin.” 25 To sikan no allow, nighimu si Josue to kasabutan duon to koot-otawan, woy nigpanulat sikandin to mgo udlin woy mgo balaod dio to Sikim. 26 Inpanulat ni Josue ka soini no mgo kinagian duon to libru to Balaod to Magboboot. Takas to sikan, nigpurut sikandin to sagboka no dakol no batu, woy inpohasindog din dio to diraom to dakol no kadyuano nigtulin marani to in-oog no longod to Magboboot.
27 Nigkagi sikandin to tibon koot-otawan to “Pitow kow! Soini no batu ogkohimu no pamaugot to pighimu ta. Nigdinog soini to tibon mgo kinagian to Magboboot kanta. Ogpakapamaugot soini ko ogsuwoy kow to daan to Magboboot now.” 28 No, inpohipanow ni Josue ka mgo otow no nigman-uli dio to tano no natinawo dan.
29 Takas to soini tibo, namatoy si Josue no anak ni Nun no suguanon to Magboboot. Songo gatus woy sampuu no tuid ka pannuigon din to pogkamatoy rin. 30 Woy inlobong dan ka lawa rin dio to tano no natagtuun din, dio to Timnat Sira no dio to kabubunganan to puntuk ni Ipraim, dio to baabagan to bubungan to Ga-as. 31 Nigga-at to Magboboot ka koot-otawan to Israil to tibon mgo tuid to manokal dod si Josue. Nigparagas sikandan to pogga-at kandin sood to mgo tuid to mgo igbudyag no manokal pad to pogkamatoy ni Josue. Nakakita ka sikan no mgo igbudyag to tibo no pighimu to Magboboot tongod to koot-otawan to Israil.
32 Inlobong dan ka mgo bokog ni Jose no pig-aap to koot-otawan to Israil ligkat to Ehiptu. Inlobong dan dio to Sikim to tano no pigboli ni Jacob dongan to saapi no songo gatus no malison ligkat to mgo anak ni Hamor no ian ka amoy ni Sikim. Sikan no tano nakasood to tano no ian tagtuun ka mgo kapunganan ni Jose.
33 Songo namatoy si Iliasar no anak ni Aaron, woy inlobong sikandin dio to Gibia no ian ka tano no ian tagtuun si Pinihas no anak din duon to kabubunganan to Ipraim.