Ruth
1
Si Naomi Woy Si Ruth
1 To mgo tuid to pogboboot to mgo maghuhusoy, duon bitil to Israil. Duon sagboka no otow no matig Bitlihim dio to Juda, woy nighipanow sikandin duma to asawa rin woy to daruwa rin no anak no lukos, woy nighondio sikandin tagtagood to tano to Moab. 2 Ka ngaran to otow ian si Ilimilik, woy ka ngaran to asawa rin ian si Naomi, woy ka ngaran to daruwa ran no anak ian si Malon woy si Kilion. Mgo otow sikandan to Iprata no matig Bitlihim no dio to Juda. Nighondio sikandan to Moab, woy dio sikandan nig-ugpo. 3 No kuntoon, namatoy si Ilimilik woy si Naomi no asawa rin naan do ka nagaat duma to daruwa rin no anak no lukos. 4 Nig-asawa ka daruwa no lukos to mgo boi no matig Moab. Ka ngaran to sagboka ian si Orpa woy ka ngaran to dangob ian si Ruth. Nig-ugpo sikandan dio to Moab to mgo sampuu no tuid, 5 woy takas to sikan, songo namatoy si Malon woy si Kilion. No, si Naomi naan do ka nagaat no warad on ka daruwa no anak din no lukos woy ka iglukos din.
6 No, kuntoon, to dio sikandin to Moab, nigdinog si Naomi no pigbuligan to Magboboot ka koot-otawan din no pigbogadyan din sikandan to koonon. Woy sikan ian no nighimpod si Naomi odyow to pog-uli duma to daruwa no amboi rin. 7 Nigligkat sikandin to pig-ugpaan din duma to daruwa rin no amboi, woy nighipanow on sikandin to daan no oghondio to pigpuunan din no dio to tano to Juda. 8 To dio sikandan to daan, nigkagi si Naomi duon to daruwa rin no amboi to “Uli kow on, kaniu daruwa, duon to baoy to mgo inoy now. Igpapitow porom to Magboboot ka marodyow no goinawa rin kaniu unawa to inpapitow now no marodyow no goinawa duon to namatoy no mgo iglukos now woy kai’t koddi. 9 Ogboot porom ka Magboboot no ogpakahimooy kow on dio to lunggunan to ogpakasoip no iglukos now.” Pigpanharokan din sikandan woy tibo sikandan nigmansinogow to maagbot.
10 Nigkagi ka daruwa no boi kandin to “Ogduma koy koikow no og-uli to koikow no koot-otawan.”
11 Di nigtabak si Naomi to “Uli kow ro, mgo anak ku. Manio to ogduma kow koddi? Bak ko ogpaka-anak a oghutuk to mgo lukos no og-asawoon now porom? 12 Uli kow, mgo anak ku; budyag ad on woy kono ad ogpakahutuk og-asawa. Agad ko ogkohimu porom no duon iglukos ku kuntoon no maukilom, woy og-anak a to mgo lukos, 13 ogtagad kow pad buwa to pogdakol dan? Ogpalinggaat kow buwa no waro lukos no ogtagad kow kandan? Dokow, mgo anak ku. Ogkatimuan ka igmasakit to goinawa ku ko ogkalagkos kow to koirapi ku su nig-atu koddi ka boad to Magboboot.”
14 To sikan, nigsinogow man do sikandan. No nigharok si Orpa to anugang din to pogligkat, di si Ruth nigkopkop atag to anugang din.
15 Nigkagi si Naomi to “Pitow ka, og-uli on ka iras nu duon to koot-otawan din woy to mgo tinuuhan din. Uli kad duma kandin.”
16 Di nigtabak si Ruth to “Kono a nu ogpogosa to pog-ongkod koikow woy to pog-iniug koikow. Ko hondoi ka ogdoog, songo dio a ogdoog. Ko hondoi ka og-ugpo, songo dio a og-ugpo. Ogkohimu no koot-otawan ku ka koot-otawan nu, woy ogkohimu no Magboboot ku ka Magboboot nu. 17 Ko hondoi ka ogkamatoy, songo dio a ogkamatoy, woy dio a igkalobong. Dakol porom ka igkabaybadyari no igbogoy to Magboboot koddi ko duon ogpakaluat koddi to koikow ko konon ka kamatadyon do ian.”
18 To pogkakita ni Naomi no nasantop on so goinawa ni Ruth to pogludyud kandin, nighagtong sikandin to pogbaghot kandin to pog-uli. 19 No, sikan ian no nigparagas ka daruwa no boi taman to noko-uma on sikandan to Bitlihim. To pogdatong dan to Bitlihim, nasasow ka tibon lunsud. Nigmanang-nangonoy ka mgo boi to lunsud to “Kono buwa no si Naomi soini?”
20 Nigkagi si Naomi to “Dokow on og-umow koddi ki Naomi. Ngarani a now ro ki Mara?, su nigbogoy ka Magboboot no mapoit on lagboy ka pog-ugpo ku. 21 Naruonan a to pogligkat ku kai, di inpo-uli a to Magboboot no nawaraan on. Manio to ogko-umow a now ki Naomi? Pigbaybadyaran a to Magboboot. Pigpa-aapan a to Igbudyag ta to igkoirapi.”
22 No sikan ian no nig-uli si Naomi ligkat to Moab no nigduma ka amboi rin no si Ruth no matig Moab. Niglopow sikandan to Bitlihim to buwan to pogbunsud to pog-gaani to sibada.