2
Nigpakilau Si Ruth To Kamot Ni Boas
1 No kuntoon, duon karumahan ni Naomi no ligkat to langosa to asawa rin, ian sagboka no otow no ligkat to puntuk ni Ilimilik. Mabantug no otow sikandin woy ka ngaran din ian si Boas. 2 No nigkagi si Ruth no matig Moab dio to ki Naomi to “Pauguti a nu bag to poghondio to mgo kamot. Ko duon ogkoid-u koddi, ogpakilau a dio to koiniugan din.”
Nigtabak si Naomi to “No, hondio kad anak ku.”
3 No sikan ian no nighipanow sikandin no nigbunsud to pogpakilau dio to koiniugan to mgo niggagaani. Niglopow no ka pigtarabauan din no tano ian tagtuun si Boas no otow to puntuk ni Ilimilik. 4 No, to sikan, niglopow si Boas ligkat to Bitlihim woy nigpangumusta sikandin to mgo niggagaani. Nigkagi sikandin to “Ogdumaan kow poron to Magboboot!” Nigmantabak sikandan to “Ogboligan ka porom to Magboboot.”
5 Nig-inso si Boas dio to otow no nig-aap to mgo taag-gaani rin to “Hontow n’ boia sikan?”
6 Nigtabak ka otow to “Sikandin ka matig Moab no nig-uli duma ki Naomi. 7 Nignangon sikandin koddi to ‘Pauguti a nu bag to pogpakilau dio to naga-anian on dio to koiniugan to mgo niggagaani.’ Nighondio sikandin to kamot woy nigtarabau sikandin ligkat to masoom pad taman to kuntoon. Kasagboka ro sikandin nighimooy dagdagow dio to pinadyag.”
8 No nighondio si Boas ki Ruth no nigkagi to “Pamminogi a nu, anak ku. Doka oghondio to loin no kamot odyow to pogpakilau. Doka og-awo. Kai ka ro ogpalinggaat duma to mgo suguanon ku no boi. 9 Pitow ka ko hondoi niggaani ka mgo lukos, woy sundul ka to mgo boi no ogbabagkos. Pignangonan kud ka mgo lukos no kono ka ran ogmonuon. Ko ogkammaraan ka, purut ka ro to woig no og-inomon nu ligkat to mgo kuron no pigsakug to mgo lukos.”
10 To pogdinog din to sikan, nig-unduk si Ruth pohondio to tano. Nignangon sikandin to “Manio naan no narodyowan ka to pogpitow koddi no niglinu-linu ka man kanak, no dagpu a ro?”
11 Nigtabak si Boas to “Nakarinog a to tibo no pighimu nu tongod to anugang nu takas to namatoy on ka asawa nu. Pig-ongkoran nu kun ka amoy nu woy inoy nu woy ka ugpaan nu, no nighondii ka odyow to pog-ugpo taliwaro to koot-otawan no waro nu moiloi. 12 Ogsaliuan porom to Magboboot tongod ka nu. Ogkadassagan ka porom to dakol to Magboboot no Igbudyag to Israil, hoo su nigpakupkup ka to diraom to mgo pakpak din.”
13 Nigtabak si Ruth to “Ogparagas a porom to pog-ugpo diraom to koid-u to mgo mata nu, Anggam. Noim-imuan a nu, woy moid-uon ka pogkagi nu koddi no suguanon nu, agad no to maugot maupot a pad to sagboka no suguanon nu no boi.”
14 To moudtu on, to pogkoon dan, nigkagi si Boas ki Ruth to “Dii ka. Koon ka to pan, woy ihalit nu to soini no binu no mangilu.” To pogpinnuu on to tibon mgo niggagaani, nigbogoy si Boas to sinandag no bogas ki Ruth. Nigkoon si Ruth to litos din woy duon dod samo. 15 To poghasindog ni Ruth to pogpakilau man do, nigsugu si Boas to mgo otow rin to “Agad ko ogpamurut sikandin dio to mgo binagkos, dokow ogpasipori sikandin. 16 Oghusud kow atag to mgo gina-ani ligkat to mgo binagkos odyow no ogpamuruton din. Dokow ogsapari sikandin.”
17 No nigparagas si Ruth to pogpakilau taman to maapun on. Piggigiok din ka sibada no napunpun din, woy ka bogas no subra to songo lata. 18 Pig-aap din no niglibong dio to lunsud, woy nakakita ka anugang din ko monu karakol ka napunpun din. Songo inlibuwas ni Ruth ka inbogoy kandin no sinandag no nasamo takas to nakakoon sikandin to litos. 19 Nig-inso ka anugang din kandin to “Hondoi ka nigpakilau kuntoon? Hondoi ka nakatarabau? Ogkaboligan porom ka otow no nigsagman koikow!” No nignangon ian si Ruth duon to anugang din tongod to otow no ian tagtuun to pigtarabauan din. Kagi rin to “Ka ngaran to otow dio to pigtarabauan ku kuntoon ian si Boas.”
20 Nigkagi si Naomi duon to amboi rin to “Ogkaboligan porom sikandin to Magboboot! Waro sikandin nighagtong to pogpakita to marodyow no goinawa rin duon to manokal woy duon to namatoy.” Nigparagas si Naomi to “Marani no karumahan ta ka sikan no otow. Sagboka sikandin to mgo karumahan ta no ogpakabaukas?.”
21 No nignangon pad si Ruth no matig Moab to “Nigkagi pad sikandin koddi to ‘Palinggaat ka duma to koddi no mgo suguanon taman to ogkoubus dan ka tibo no ogga-anion ku.’”
22 Kagi ni Naomi duon to amboi rin to “Hoo, marodyow ian, Igi, ko ogduma ka to kandin no mgo boi, su ko oghondio ka to kamot to loin no otow, naugpa ko ogkohilabotan ka.”
23 No sikan ian no nigpalinggaat si Ruth marani to mgo suguanon no boi ni Boas no nigpakilau sikandin taman to noubus on ka pog-gaani to sibada woy to trigu. Woy nig-ugpo sikandin duma to anugang din.