2
Ka Pogsadyo ni Hanna
1 No nigpanabisabi si Hanna duon to Magboboot no kagi “Narago a lagboy duon to Magboboot; inpabantug din ka ngaran ku. Duon on igkatabak ku to mgo usig ku, su narodyowan a lagboy to pogpangabang nu.
2 Waro in-oog lagboy unawa to Magboboot; waro unawa koikow; waro Batu no unawa to Magboboot ta.
3 Doka og-ungud ogkagi to pogparakol-dakol, doka’g pauguti ka bobo nu to pogpagarol-garol, hoo su ogkataga ka Magboboot ta to tibo, woy sikandin ka og-ongod-ongod to mgo hinimuan to mgo otow.
4 Nagopu on ka mgo busug to mgo bagani, di ka mgo naluming nabogadyan to dadyagang to pogpangmangadyow.
5 Ka mgo otow no naantoy nokani ogpanginallow on odyow to pogpamangho to ogkoonon dan, di ka mgo niggutasan nokani konad oggoram to gutas. Ka boi no kono ogpaka-anak porom, naka-anak on to papitu no anak, di ka boi no moon-ing anak no lukos ogmaotoy on.
6 Ka Magboboot ian ka ogpakahimatoy woy ka ogbogoy to goinawa. Sikandin ka ogboot ko hontow ka ogpalogsad pohondio to lobongan, woy ko hontow ka ogpaka-onow.
7 Ka Magboboot ian ka ogpa-aap to pogkawaraan woy ka pogtulin. Sikandin ka ogpakabogoy to kabantug woy ogpaka-awo.
8 Og-onawon din ka otow no nawaraan ligkat to abug, woy oghonaton din ka otow no nakulangan ligkat to nalimud no abu; ogpapinnuuon din sikandan topad to mgo anak to hari, woy ogpakatagtuun sikandan to mabantug no pinnuuanan.
Hoo su ka Magboboot ian ka tagtuun to mgo pos-okanan to tano; pigpos-ok din ka kalibutan to sikan.
9 Ogbantadyan to Magboboot ka poghipanow to mgo nigtuu kandin, di ogkahaglong do ka mgo maddoot taliwaro to kaukiloman. Konon pinabadyo to dadyagang nu no ogpakaroog ka.
10 Ko hontow ka og-atu to Magboboot ogkaupot sikandin. Ogparagsangan sikandin to Magboboot to lugung ligkat to langit. Ogboboot ka Magboboot to katibtibaan to kalibutan.
Ogbogadyan din ka hari din to kabogbogan, woy ipabantug din ka ngaran to pig-aam din.”
11 No nig-uli si Ilkana duon to Rama, di nigpalinggaat ka bato no nigga-at dio to tangkaan to Magboboot, diraom to pogboot ni Ili no taagpanubad.
Ka mgo Anak ni Ili
12 No kuntoon, maddoot no mgo otow ka mgo anak ni Ili. Waro sikandan nigtahud to Magboboot. 13 Ka oghimuon to mgo taagpanubad atag ko duon otow no og-aap to igtaruwoy no panubad, tagood to ogpasobuon dan pad ka saapu ogbitbit ka suguanon to taagpanubad to sagboka no bagooy. 14 Igtiuk din sikan to sooranan (agad ko kaldiru, ko takuri, ko karahay woy ko cumpania no kaldiru), woy ogpuruton to taagpanubad ka agad nokoy no ogkatiuk to bagooy. Sikan ka oghimuon dan to agad hontow no otowa to Israil no oghondio to Silo.a 15 Di agad to waro pad natutung ka tabo, oghondio ka suguanon to taagpanubad woy ognangon sikandin to “Bogadyi ka taagpanubad to saapu no ogtuugon din. Kono ogtinawo sikandin to nalataan no saapu. Ka moilow ro ka ogpuruton din.”b 16 Ko ognangon ka otow to “Ogtutungon ta panoy ka tabo, woy on ogpakapurut ka to agad nokoy no ogkoiniatan nu,” ogtabak ka suguanon to “Kono! Bogadyi a nu kuntoon. Ko kono ka, ogpogoson ku sikoikow.” 17 Soini no sao to mgo baubato dakol lagboy to pogpitow to Magboboot, su pigsamilian dan ka panubad no igtaruwoy to Magboboot.
18 Di, si Samuel atag, nigga-at sikandin to tangkaan to Magboboot. Sagboka no bato pad no nigsau-ub to kinabo to mgo taagpanubad.c 19 Kara tuid, nighimu ka inoy rin to maintok no kinabo woy pig-aap din ki Samuel to poghondio din duma to iglukos din odyow to pogpanubad to tinuid no panubad. 20 Ogboligan ni Ili si Ilkana woy ka asawa rin no kagi “Ogbogadyan ka porom to Magboboot to mgo anak pinabadyo to soini no boi, liwan to bato no pigbudyu din woy no intaruwoy rin to Magboboot.” Woy og-uli man do sikandan. 21 Woy noid-uan to Magboboot si Hanna; naboros sikandin woy naka-anak sikandin to tatou no lukos woy daruwa no boi. Tagood to sikan, nigtulin ka bato no si Samuel dio to tangkaan to Magboboot.
22 No kuntoon, manigoon on si Ili, woy nigdinog sikandin to kinagian tongod to mgo pighimu to mgo anak din dio to koot-otawan to Israil, woy no nighuhulid sikandan to mgo boi no nigga-at to gomawan to Tukbung to Pogtomu.d 23 Pignangonan din sikandan to “Manio to soini ka oghimuon now? Ungud a ogdinog ligkat to mgo otow tongod to soini maddoot no mgo hinimuan now. 24 Dokow, mgo anak ku. Konon marodyow ian ka kinagian no ogdinogon ku no nakatangkap to koot-otawan to Magboboot. 25 Ko ogpakasao ka otow duon to dangob no otow, ogkohusadyan sikan to Magboboot; di, ko ogpakasao ka otow duon to Magboboot, hontow naan ka ogpakahusoy tongod kandin?” Agad to sikan, waro nigpannalinga ka mgo anak din to sapad to amoy ran, hoo su tuud to Magboboot no ogkohimatadyan din sikandan. 26 Di si Samuel atag, nigparagas sikandin to pogtulin to lawa, woy songo nigtulin ka marodyow no goinawa to Magboboot woy to mgo otow kandin.
27 No kuntoon, duon otow to Magboboot no nighondio ki Ili, woy pignangonan din sikandin to “Soini ka kinagian to Magboboot. ‘Waro ka buwa mataga no inpapitow ku to kono ogkaligal ko hontow a duon to lunggunan to amoy nu to dio pad sikandan to Ehiptu diraom to pogboot ni Parao? 28 Pig-aam ku ka ka-ap-apuan nu ligkat to tibon mgo puntuk to Israil odyow no ogkohimu sikandin no taagpanubad. Sikandin ka ogdani to panubaranan ku, kandin ka ogtutung to palina, kandin ka ogsau-ub to ipodeto tangkaan ku. Songo inbogoy ku to lunggunan to amoy nu ka pogboot to mgo tutungonon no igpanubad to mgo otow to Israil. 29 Manio to piglomotan now ka panubad woy ka igtaruwoy no insugu ku tongod to ugpaan ku? Manio to dakol-dakol ka pog-ila nu to mgo anak nu to koddi? Hoo su pigpallambog now ka mgo lawa now pinabadyo to mgo maambog no mgo baad to mgo igtaruwoy to mgo otow to Israil.’
30 No sikan ian nignangon ka Magboboot no Igbudyag to Israil to ‘Nangulibot a to lunggunan nu woy to lunggunan to ka-ap-apuan nu no ogga-at kow to tangkaan ku taman to katamanan.’ Di kuntoon nigkagi ka Magboboot to ‘Kono ogkohimu sikan! Ka otow no og-ila koddi ian ka og-iloon ku, di ka otow no kono og-ila koddi, ogsamilian ku sikandin. 31 Ogdatong on ka allow no ogtamporon ku ka dadyagang nu, woy ka dadyagang to tibon mgo otow to lunggunan to amoy nu, odyow no waro sagboka kaniu ka ogkohimu no budyag to mgo tipouri now. 32 Ogmamasakit ka goinawa nu to pogpitow to karodyowan no og-aapon ku to Israil di ka kaniu no mgo tipouri atag, waro sagboka no ogkohimu no budyag. 33 Woy ka otow no kono kud ogtamporon to pogdani to panubaranan ku, ogbutud to mgo mata nu, woy ogbogoy to igmasakit to goinawa nu. Tibo to mgo kapunganan nu ogkamatoy to kono pad ogkabudyag. 34 Ogkohimu no tuus koikow ka ogkabadyaan to daruwa no anak nu no si Hopni woy si Pinihas; hoo su ogdorongan ogkammatoy sikandan to sikan do no allow. 35 Ogtinuru a pad to sagboka no taagpanubad no ogka-saligan. Oghimu sikandin to tibo no duon to goinawa ku. Ogdigonon ku ka lunggunan din, woy ogpakaga-at sikandin to pig-aam ku no igbudyag taman to katamanan. 36 No ko ogkatood on sikan, oghondio ka mgo tipouri nu woy ogluhud sikandan to tangkaan din no ogpakoid-u odyow no ogbogadyan sikandan to maintok no saapi woy to lotib to pan. Ogkagi sikandan to “Bogadyi a to tarabau to taagpanubad odyow no ogpakakoon a.”’”