3
Nigpakita Ka Magboboot ki Samuel
1 Nigga-at ka baubato no si Samuel dio to tangkaan to Magboboot diraom to pogboot ni Ili. To sikan no mgo tuid, songo ka kuo do ka pogkagi to Magboboot, manalimboka ro ka mgo kitoonon. 2 Sagboka no maukilom to sikan, nighibat si Ili duon to hibatanan din. Konad amani ogpakakita si Ili, su piglaburan on ka mgo mata rin. 3 Waro pad moobuki ka ilawan to Magbobootawoy nighibat si Samuel to baoy to Magboboot, no ian ka ugpaan to Sooranan to Magboboot. 4 No nig-umow ka Magboboot ki Samuel. Nigtabak si Samuel to “Soini a.” 5 Nig-agpas sikandin nigpallaguy ki Ili woy nigkagi sikandin to “Soini a, nig-umow ka.” Di nigtabak si Ili to “Waro a nig-umow koikow. Libong ka to hibatanan nu.” Woy niglibong si Samuel no nighibat man do. 6 Nighutuk nig-umow ka Magboboot to “Samuel!” Nig-onow si Samuel woy nighondio sikandin ki Ili no nignangon to “Soini a; pig-umow a nu.” Nigtabak si Ili to “Utu, waro a nig-umow. Libong ka woy hibat ka.” 7 No kuntoon, waro pad moko-ila si Samuel to Magboboot: waro pad mapuwasi ka sumsumanan din to kinagian to Magboboot. 8 Nig-umow ka Magboboot ki Samuel to igkatou on, woy nig-onow si Samuel woy nighondio sikandin ki Ili. Nigkagi sikandin to “Soini a; pig-umow a nu.” No nakasabut on si Ili no ka Magboboot naan ka nig-umow ki Samuel. 9 No sikan ian pignangonan ni Ili si Samuel to “Libong ka no oghibat, woy ko og-umow sikandin, nangon ka to ‘Kagi ka Magboboot, nigpamminog ka suguanon nu.’” No niglibong nighibat si Samuel to hibatanan din. 10 Niglopow ka Magboboot no nighasindog duon no nig-umow unawa to nokohun-a to “Samuel! Samuel!” No nigkagi si Samuel to “Kagi ka, su nigpamminog ka suguanon nu.” 11 No nigkagi ka Magboboot ki Samuel to “Pitow ka, magaan on ka oghimuon ku to Israil no ogko-in-inuan to tibon mgo otow no ogdinog to sikan. 12 To sikan no allow, ogtooron ku ka tibo no innangon ku to pog-atu ki Ili woy to lunggunan din; Ka tibo ian ligkat to binunsuran taman to koopusan. 13 Su pignangonan ku sikandin no ogbobootan ku ka lunggunan din taman to katamanan tongod to sao no natagaan din; ian su makaloomot ka pighimu to mgo anak din woy waro sikandin nakaponod kandan. 14 No, sikan ian no pigpangulibotan ku ka lunggunan ni Ili no ‘Kono ogkaawo ka sao to lunggunan ni Ili agad ko pila ka mgo igtaruwoy woy igpanubad dan.’” 15 Nighibat si Samuel taman to kapawo woy nig-onow sikandin odyow to pogpuwas to mgo lokob to baoy to Magboboot. Nahallok sikandin to pognangon ki Ili tongod to kitoonon din, 16 di, pig-umow sikandin ni Ili no kagi “Samuel, anak ku.” Nigtabak si Samuel to “Soini a.” 17 Nig-inso si Ili to “Nokoy ka innangon din koikow? Doka a nu oghoosi. Oglogparan ka lagboy to Magboboot porom ko duon ighoos nu kanak to innangon din koikow.” 18 No pignangonan sikandin ni Samuel to tibo, no waro inhoos din. No nigkagi si Ili to “Sikandin ka Magboboot; oghimu sikandin ko nokoy ka marodyow to pogpitow rin.”
19 Nigduma ka Magboboot ki Samuel to pogtulin din, woy waro ingkakagi ni Samuel no nadoromdom no waro puus. 20 Noko-ila ka tibon mgo otow to Israil, ligkat to Dan pohondio to Birsiba, no si Samuel sagboka no taagnangon to Magboboot. 21 Nigparagas ka Magboboot to pogpakita duon to Silo, woy dio sikandin nigpo-ila ki Samuel pinabadyo to kinagian din.