4
Nigmangadyow ka mgo Filistihanon, woy Na-agow ka Sooranan to Magboboot.
1 Woy na-aap ka mgo kinagian ni Samuel to tibon Israil. No kuntoon niglibuwas ka mgo otow to Israil odyow to pogmangadyow to mgo Filistihanon. Namos-ok ka mgo otow to Israil to mgo tukbung dan duon to Ibinisir, woy duon ka mgo Filistihanon to Apik. 2 Pig-ay-adyaran to mgo Filistihanon ka mgo otow ran odyow to pogtomu to Israil. To pogtangkap on to mangadyow, naroog ka mgo otow to Israil to mgo Filistihanon, woy mgo hop-at no libu kandan ka nammatoy to pogmangadyow. 3 To poglibong to mgo sundau duon to pig-ugpaan dan, nigman-inso ka mgo igbudyag to Israil to “Manio buwa no pigpaugutan to Magboboot no naroog ki to mgo Filistihanon kuntoon no allow? Og-angadyon ta ka Sooranan to Kasabutan to Magboboot ligkat to Silo, odyow no ogduma sikan kanta, woy ogkapangabangan ki to sikan ligkat to boad to mgo usig ta.” 4 No sikan ian no nigpa-aap sikandan to mgo otow pohondio to Silo, woy na-angoy ran ka Sooranan to Kasabutan to Magboboot no Mabogbog to Tibo, no ian ka nigpinnuu taliwaro to mgo diwata. Duon ka daruwa no anak ni Ili no si Hopni woy si Pinihas no nigduma to Sooranan to Kasabutan to Magboboot. 5 To poglopow to Sooranan to Kasabutan to Magboboot duon to pig-ugpaan dan, nigbabansagon ka tibon mgo otow to Israil to maagbot lagboy taman to inat na-antog ka tano. 6 To pogdinog dan to pogbabansagon, nigmang-inso ka mgo Filistihanon to “Nokoy soini no pogbabansagon duon to ugpaan to mgo Hibriu?” To pogkarinog dan no nakalopow ka Sooranan to Magboboot duon to ugpaan, 7 nanahallok ka mgo Filistihanon. Nigkagi sikandan to “Duon Tinuuhan no nakalopow to ugpaan dan! Ogkoirapan kid on! Waro iing soini no nabadyaan to mgo otow ligkat to binunsuran taman kuntoon. 8 Na-al-aangan ki angkuwan! Hontow ka ogpakapangabang kanta ligkat to boad to soini no mabogbog no mgo tinuuhan? Sikandan ka mgo tinuuhan no nakabadyad-badyad to mgo otow to Ehiptu to loin-loin no mgo logpad duon to han-hanawan. 9 Nokal-nokal kow no mgo Filistihanon! Palimbubuut kow, su ko kono kow, ogkadiraom kow to pogboot to mgo Hibriu unawa to nakadiraom sikandan kaniu. Palimbubuut kow woy og-atu kow!” 10 No sikan ian, no nigmangadyow ka mgo Filistihanon woy naroog ka mgo otow to Israil. Nigpanlaguy ka kara otow pohondio to tukbung din. Moon-ing ian ka nammatoy; mgo 30,000 no sundau ka nammatoy. 11 Na-agow ka Sooranan to Magboboot woy namatoy ka daruwa no anak ni Ili no si Hopni woy si Pinihas.
12 To sikan dod no allow, duon otow no kapunganan ni Binyamin no nakapallaguy puun to mangadyowan, woy nighondio sikandin to Silo. Pighigbit din ka mgo kinabo din woy pigsabukan to abu ka uu rin (tongod to masakit no goinawa rin). 13 To poglopow rin, duon si Ili nigpinnuu to pinnuuanan din to ilis to kalasara no nigbabantoy, su nasasow ka goinawa rin tongod to Sooranan to Magboboot. To pogsood to otow to lunsud woy to pognangon din to niglopow, nigngangang ka tibon lunsud. 14 Nigdinog si Ili to pogbabansagon woy nig-inso sikandin to “Nokoy ka pugtian to soini no samuk?” Nig-agpas nigdani ka otow ki Ili. 15 Kasiyaman woy wawau on ka panuigon ni Ili, woy piglaburan on ka mgo mata rin odyow no konad ogpakakita sikandin. 16 Pignangonan si Ili to otow to “Iam a pad nigpuun to mangadyowan. Kuntoon do no allow a nigligkat ian.” Nig-inso si Ili to “Nokoy ka niglopow, anak?” 17 Nigtabak ka otow no nig-aap to nangnangonon to “Nigpanlaguy ka mgo otow to Israil to tangkaan to mgo Filistihanon, woy moon-ing ka mgo sundau ka nammatoy, iglagkos pad ka daruwa nu no anak no si Hopni woy si Pinihas. Namatoy sikandan woy na-agow on ka Sooranan to Magboboot.” 18 To pogkagi rin tongod to Sooranan to Magboboot, napood si Ili ligkat to pinnuuanan din dio to ilis to gomawan to lunsud. Nabunggu ka liog din woy namatoy sikandin su budyag ian sikandin woy mabogat pad. Nig-aap sikandin to Israil sood to kohop-atan no tuid.
19 No kuntoon, naboros ka amboi ni Ili no asawa ni Pinihas woy marani on ka pogpanganak din. To pogdinog din to nangnangonon no na-agow ka Sooranan to Magboboot woy no namatoy ka anugang din woy ka iglukos din, nigbunsud on sikandin nighadyoran. Nig-anak sikandin, di natakin sikandin. 20 To magaan ogkabigtawan on sikandin, nigkagi ka mgo boi no nig-udyamu kandin to “Doka ogko-ook-ook, naka-anak ka to lukos.” Di waro sikandin nigtabak woy waro sikandin nigsagman. 21 Pighingaranan din ka bato ki I-kabodano kagi rin to “Na-awo ka kabantug to Israil” tongod su na-agow ka Sooranan to Magboboot woy su namatoy ka anugang din woy ka asawa rin. 22 Kagi rin to “Na-awo ka kabantug to Israil, su na-agow ka Sooranan to Magboboot.”