5
Ka Sooranan to Magboboot Duon to mgo Filistihanon
1 Takas to na-agow to mgo Filistihanon ka Sooranan to Magboboot, pig-aap dan ligkat to Ibinisir pohondio to Asdod. 2 Pig-aap dan ka Sooranan to sood to baoy no panubaranan dan to tinuuhan dan no si Dagon, woy insabuk dan to kilid ni Dagon. 3 To pog-onow to mgo otow to Asdod to masoom pad to pogkapawo, nakita ran si Dagon no nakaangkob to tano to tangkaan to Sooranan to Magboboot! Pighonat dan si Dagon, woy inlibong dan to taan no nasabukan din. 4 Di to pogkapawo to pog-onow ran, duon man do si Dagon no nakaangkob to tano to tangkaan to Sooranan to Magboboot! Nagopu ka liog din woy ka mgo boad din, woy naliid ka uu rin pohondio to longod to gomawan. Ka lawa rin do ka nagaat. 5 Sikan ka pugtian to oghimuon to mgo taagpanubad ni Dagon, woy to mgo otow no ogsood to baoy no panubaranan ni Dagon to Asdod, no kono sikandan ogdiok dio to longod to gomawan.
6 Mabogat ka inpatiang to Magboboot to mgo otow to Asdod woy to marani no mgo ugpaan. Nigpa-aap sikandin to ogpakadaat kandan woy pigpa-aapan sikandan to mgo lobag. 7 To pogkakita to mgo otow to Asdod ko nokoy ka niglopow, nigmanang-nangonoy sikandan to “Kono porom ogpalinggaat ka sooranan to tinuuhan to Israil kai to kanta, su mabogat ka boad din kanta woy ki Dagon no tinuuhan ta.” 8 No inpalimud dan ka tibon mgo igbudyag to mgo Filistihanon woy pig-inso dan sikandan to “Nokoy ka oghimuon noy to sooranan to tinuuhan to Israil?” Nigtabak ka mgo igbudyag to “Ipa-aap now ka sooranan to tinuuhan to Israil duon to Gat.” No sikan ian, pig-aap dan ka sooranan to Magboboot to Israil dio to Gat. 9 Di takas to poghalin dan to sikan, mabogat ka boad to Magboboot to sikan no lunsud, woy nasasow woy nanahallok ka tibon mgo otow to lunsud. Pigbaybadyaran din ka tibon mgo otow, ligkat to budyag pohondio to bato pad, pinabadyo to mgo lobag. 10 No inpa-aap dan ka Sooranan to Magboboot dio to Ikron. To pogsood to Sooranan to Magboboot dio to Ikron, nigbabansagon ka mgo otow to Ikron to “Pig-aap dan ka sooranan to tinuuhan to Israil kai to kanta odyow to poghimatoy man do kanta woy to mgo lunggunan ta!” 11 No inpalimud dan ka tibon mgo igbudyag to mgo Filistihanon woy nignangon sikandan to “Dogila now ka sooranan to tinuuhan to Israil; Ipo-uli now to ugpaan din, su ko kono, ogkohimatadyan ki rin duma to tibon mgo lunggunan ta.” Hoo su nasasow lagboy ka tibon lunsud tongod to kamatadyon. Mabogat ian ka boad to Magboboot dio kandan. 12 Ka waro namatoy, nabay-badyaran to mgo lobag, woy niglopow ka pogpangiak duon to langit.