6
In-uli ka Sooranan to Magboboot Duon to Israil
1 Takas to naka-ugpo ka Sooranan to Magboboot dio to tano to mgo Filistihanon to papitu no buwan, 2 nig-umow ka mgo Filistihanon to mgo bailan woy mgo taagtimao dan woy nigkagi sikandan to “Nokoy ka oghimuon ta to Sooranan to Magboboot? Nangoni koy ko ogmomonu koy odyow to pogpa-aap uli to ugpaan din.” 3 Nigtabak ka mgo bailan to “Ko i-uli now ka sooranan to tinuuhan to Israil, dokow ipa-aap no waro sood. Pa-aap kow to tubad no ig-awo to sao now. Ko sikan ka oghimuon now, ogkoulian kow to mgo dau now, woy ogkataga kow ko manio to waro pad na-awo soini mabogat no badyadbadyad din kaniu." 4 Nig-inso ka mgo Filistihanon to “Nokoy ka litos no tubad no igpa-aap noy kandin odyow to pog-awo to sao noy?” Nigtabak ka mgo bailan to “Lalima no bulawan no lobag woy lalima no bulawan no ambow, sumao to koon-ingan to mgo igbudyag to mgo Filistihanon, su unawa ka dau no niglopow kaniu woy to mgo igbudyag now. 5 Himu kow to mgo unawa to mgo lobag woy mgo unawa to ambow no nigdaat to tano now woy og-iloon now ka tinuuhan to Israil. Naugpa og-awoon din ka boad din dio to kaniu woy to mgo tinuuhan now woy to tano now. 6 Dokow ogmakogaa ka mgo uu now unawa to pighimu to mgo otow to Ehiptu dongan duma ki Parao. To pogbadyad-badyad to Magboboot kandan, pigdogil dan ka mgo otow to Israil odyow no ogpakahipanow sikandan.
7 No kuntoon, purut kow to sagboka no iam pad no unturanan, woy daruwa no baka no naka-anak on woy no waro pad masabuki to yugu. Yugui now ka mgo baka to unturanan di puruta now ka mgo nati ran woy aara now ka sikan no mgo nati. 8 Puruta now ka Sooranan to Magboboot woy iuntud now to unturanan. Topad to sikan, isabuk now to songo sooranan ka mgo pighimu now to bulawan no ipa-aap now kandin no tubad to pog-awo to sao now. Pohipanawa now ka unturanan, 9 di, bantadyi now. Ko ogparagas sikan pohondio to tano din pohondio to Bit-Simis, no sikan ian no ogkataga ki no ka Magboboot ian ka nigpa-aap to soini dakol no igkobaybadyari ta. Di ko kono oghondio sikan, no ogkataga ki no konon ligkat to kandin no boad soini tibo, no niglopow ro duon kanta.”
10 No sikan ian ka pighimu ran. Nigpurut sikandan to daruwa no baka woy pigyuguan dan to unturanan woy pig-aad dan ka mgo nati to baka. 11 Pig-untud dan ka Sooranan to Magboboot dio to unturanan duma to sooranan no nasooran to mgo bulawan no ambow woy to mgo unawa to mgo lobag. 12 No nighipanow ka mgo baka no nigparagas to Bit-Simis no dio ian to kalasara, no nig-ungud nig-nga-nga. Waro sikandan nigsuwoy pohondio to gibang woy ko pohondio to kawanan. Nigsundul ka mgo igbudyag to mgo Filistihanon taman to oatan to Bit-Simis.
13 No kuntoon, niggaani ka mgo otow to Bit-Simis to trigu ran duon to aug. To pogtonggak dan nakita ran ka Sooranan. Nigkukuus sikandan to pogkakita ran. 14 Nigsagdok ka unturanan dio to kamot ni Josue no matig Bit-Simis. Dio nigsagdok sikan to longod to sagboka no dakol no batu. Nigpangguwoy ka mgo otow to kadyu to unturanan, woy pigpanubad dan ka daruwa no baka no igtubad no tutungonon tongod to Magboboot. 15 Pighonat to mgo kapunganan ni Livi ka Sooranan to Magboboot, duma to sooranan no nasooran to mgo hinimu to bulawan, woy insabuk dan dio to dakol no batu. To sikan no allow, nigpanubad ka mgo otow to Bit-Simis to mgo tubad no tutungonon woy mgo igtaruwoy to Magboboot. 16 Nakita to mgo igbudyag to mgo Filistihanon ka soini tibo, woy nig-uli sikandan to Ikron to sikan no allow.
17 Soini ka pugtian no lalima ka mgo lobag no bulawan no inpa-aap to mgo Filistihanon no tubad to pog-awo to sao; sagboka ian to kara lunsud to Asdod, to Gasa, to Askilon, to Gat woy to Ikron. 18 Songo sikan dod ka koon-ingan to mgo bulawan no ambow no inpa-aap dan tongod to koon-ingan to mgo dagdakol no mgo lunsud no nadiraom to lalima no igbudyag to mgo Filistihanon. Nalingkusan to mgo aad no batu sikan no mgo lunsud woy duon mgo hilit-hilit to palibut to sikan. Nigpalinggaat no pamaugot to soini tibo taman kuntoon no allow ka dakol no batu to kamot ni Josue to Bit-Simis no ian ka nasabukan dan to Sooranan to Magboboot.
19 Di, piglogparan to Magboboot ka duma no mgo otow to Bit-Simis no pighimatadyan din ka 70akandan, su nigpipitow sikandan to sood to Sooranan to Magboboot. Nigpandaawit ka mgo otow tongod to mabogat no logpad no inbogoy to Magboboot kandan. 20 Nigman-inso ka mgo otow to Bit-Simis to “Hontow ka ogpakahasindog to tangkaan to Magboboot, soini no in-oog lagboy no Tinuuhan? Hontow ka ogpa-aapan to Sooranan ligkat kai?” 21 No nigpa-aap sikandan to nangnangonon pohondio to mgo otow to Kiriat-Yiarim no kagi “In-uli to mgo Filistihanon ka Sooranan to Magboboot. Dii kow woy aapa now dio to ugpaan now.”