1 Samuel 7

Pig-ongkoran to mgo Otow to Israil ka mgo Sao Dan

¹ No sikan ian no nighondio ka mgo matig Kiriat-Yiarim woy pigpurut dan ka Sooranan to Magboboot. Pig-aap dan dio to baoy ni Abinadab no dio to ampow to bubungan, woy in-oog dan ka anak din no si Iliasar no ian ka ogbantoy to Sooranan to Magboboot. ² Maugoy ian, mgo kawaan no tuid tibo, no nigpalinggaat ka Sooranan dio to Kiriat-Yiarim. Woy nigsisinogow ka tibon mgo otow to Israil no nigpakoid-u to Magboboot.

³ No nigkagi si Samuel to tibon lunggunan to Israil to “Ko maugot ian no oglibong kow to Magboboot to tibon goinawa now, no dogila now ka tibon mgo tinuuhan to loin no koot-otawan, woy ka mgo Astarot, woy ooga now ka pogko-otow now duon to Magboboot, woy sikandin do ka ogga-aton now. Woy ogkapangabangan kow ligkat to boad to mgo Filistihanon.” ⁴ No sikan ian no pig-awo to mgo otow to Israil ka mgo Baalwoy mgo Astarot dan, woy ka Magboboot do ian ka pigga-at dan. ⁵ No nigkagi si Samuel to “Limura now ka tibon koot-otawan to Israil duon to Mispa, woy ogpanabisabi a to Magboboot tongod kaniu.” ⁶ To nalimud on sikandan to Mispa, nigsakug sikandan to woig, woy inbus-ug dan to tangkaan to Magboboot. To sikan no allow waro sikandan mogkoon, woy nig-abin sikandan to 'Nakasao koy duon to Magboboot.' Woy si Samuel ian ka igbudyag dan duon to Mispa.

⁷ To pogkarinog to mgo Filistihanon no nalimud ka mgo otow to Israil duon to Mispa, nighipanow ka mgo igbudyag to mgo Filistihanon odyow to pogmangadyow. To pogdinog to mgo otow to Israil to sikan, nanahallok sikandan tongod to mgo Filistihanon. ⁸ Pignangonan dan si Samuel to “Doka oghagtong to pog-umow to Magboboot no Igbudyag ta tongod kanami, odyow no ogkapangabangan ki rin ligkat to boad to mgo Filistihanon.” ⁹ Nigpurut si Samuel to sagboka no ogsusu pad no karniru woy intaruwoy rin dio to Magboboot no malibuson no tutungonon no tubad. Nigpangiak sikandin no nigpabulig duon to Magboboot tongod to Israil, woy nigtabak ka Magboboot kandin. ¹⁰ Tagood to nigtubad pad si Samuel to tutungonon no igtaruwoy, nigdani ka mgo Filistihanon odyow to pogmangadyow porom to mgo otow to Israil. Di to sikan no allow, pigparagsangan to Magboboot ka mgo Filistihanon to maagbot no lugung. Nasasow lagboy sikandan woy tongod to sikan, magaan do sikandan naroog to mgo otow to Israil. ¹¹ Nigpallaguy ka mgo otow to Israil ligkat to Mispa no niggapon to mgo Filistihanon. Pigpanghimatadyan dan sikandan dio to daan pohondio to sagboka no ugpaan diraom to Bit-Car. ¹² No nigpurut si Samuel to sagboka no batu woy inpos-ok din taliwaro to Mispa woy to Sin. Pighingaranan din ka batu to ‘Ibinisir’ no kagi rin to “Taman kai nabuligan ki to Magboboot.” ¹³ No sikan ian no naroog ka mgo Filistihanon woy waro sikandan nighutuk nigmangadyow to tano to mgo otow to Israil. Tagood to manokal dod si Samuel, nig-atu ka boad to Magboboot to mgo Filistihanon. ¹⁴ Inlibong to Israil ka mgo lunsud ligkat to Ikron pohondio to Gat no na-agow nokani to mgo Filistihanon, woy pigdogil to mgo otow to Israil ka tibon mgo Filistihanon to mgo tano no marani to sikan. Songo warad on mangadyow to mgo otow to Israil woy to mgo kapunganan ni Amor. ¹⁵ Nigparagas si Samuel to pogpanghusoy to Israil to tibon mgo allow to ukul din. ¹⁶ Kara tuid, nighipanow sikandin ligkat to Bit-il pohondio to Gilgal pohondio to Mispa pad, no nigpang-husoy to Israil to tibon mgo ugpaan to sikan. ¹⁷ Di ladyun sikandin nig-uli to Rama, no ian ka ugpaan din, woy songo nigpanghusoy sikandin to Israil dio. Nighimu sikandin to tubaranan to Magboboot dio.