8
Nigpamudyu ka mgo Otow to Israil no Duon Hari dan
1 To budyag on si Samuel, intinuru din ka mgo anak din no mgo maghuhusoy to Israil. 2 Ka ngaran to panganoy rin ian si Joel, woy ka ngaran to igkorangob ian si Abiya, woy nigpanghusoy sikandan dio to Birsiba. 3 Di waro nig-unug ka mgo anak ni Samuel to daan din. Nigsuwoy sikandan pohondio to mgo daan to pogpanaapi. Nigtinawo sikandan to saapi odyow to poghutuk to husoy ran to konon litos.
4 No, niglimud-limud ka tibon mgo igbudyag to Israil, woy nighondio sikandan ki Samuel dio to Rama. 5 Pignangonan dan sikandin to “Budyag kad on, woy waro mog-ikul ka mgo anak nu to daan nu. No kuntoon, tinuru ka to sagboka no hari no og-aap kanami unawa to duma no mgo nasud.” 6 Di waro narago si Samuel to pognangon dan to “Bogadyi koy to hari no og-aap kanami.” No nigpanabisabi sikandin duon to Magboboot. 7 Woy pignangonan sikandin to Magboboot to “Pamminoga nu ka tibo no innangon to mgo otow koikow; konon sikoikow ka pigsamilian dan, ko konon sikoddi no hari dan ka pigsamilian. 8 Unawa ka pighimu ran kanak ligkat to allow no pig-aap ku sikandan ligkat to Ehiptu taman to kuntoon no allow, no nig-iniug sikandan kanak no nigga-at sikandan to duma no mgo tinuuhan, sikan dod ka oghimuon dan to koikow kuntoon. 9 No pamminoga nu ka pigbudyu dan; di booga nu sikandan no ognangonan nu sikandan to tibo no oghimuon to hari no ogboboot kandan.” 10 Nignangon ian si Samuel to tibon mgo kinagian to Magboboot dio to mgo otow no nigbudyu kandin to pogtinuru to hari. 11 Kagi rin to “Soini ka oghimuon to hari no ogboboot kaniu. Ogpuruton din ka mgo anak now no lukos odyow no ogtarabau sikandan to mgo kuddo woy mgo unturanan din, woy ogpallaguy sikandan to tangkaan to mgo unturanan din. 12 Ogtinuru sikandin to duma kandan no ogkohimu no mgo igbudyag to songo libu no otow, woy ka duma ogkohimu no mgo igbudyag to kalimmaan no mgo otow. Ka duma pad no mgo anak now no lukos ogdadaru woy ogga-ani to tano din, woy ka duma pad ogmanhimu to mgo panganiban to pogmangadyow, woy mgo kaaglagan to mgo unturanan din. 13 Ogpuruton to hari ka mgo anak now no boi odyow no ogkohimu sikandan no mgo taaghimu to pohomut woy mgo taaghilutu woy mgo taaghimu to pan. 14 Ogpuruton din ka dorodyawi no mgo kamot now, mgo pinamua-an now to mgo ubas woy mgo olibu, woy igbogoy rin to mgo sakup din. 15 Ogpuruton din ka igkasampuu no baad to tibon bogas now, woy mgo ubas now, woy igbogoy rin to mgo sakup din woy to mgo duon katondanan. 16 Ogpuruton to hari ka dorodyawi no mgo suguonon now no mgo lukos woy boi, woy mgo baka woy mgo asnu now, woy sikandin ka oggamit to sikan. 17 Ogpuruton din ka igkasampuu no baad to mgo karniru now, woy sikaniu, ogkohimu kow no mgo uripon din. 18 Ko oglopow ka sikan no allow, ogpangiak kow to Magboboot odyow no og-awoon din ka hari no pig-aam now, woy to sikan no allow, kono ogpamminog ka Magboboot kaniu.” 19 Di waro mogpannalinga ka mgo otow ki Samuel. Kagi ran to “Kono! Ogkoiniat koy no duon hari no og-aap kanami. 20 Ko duon hari noy, ogkohimu koy no unawa to duma no mgo nasud no duon hari no og-aap kanami woy no oghun-a kanami to pogmangadyow.” 21 To pogdinog ni Samuel to tibo no innangon to mgo otow, inkagi rin ka tibo dio to tangkaan to Magboboot. 22 Nigtabak ka Magboboot to “Pamminoga nu sikandan. Bogadyi sikandan to hari.” No pignangonan ni Samuel ka mgo otow to Israil to “Ogmang-uli kow tibo to mgo ugpaan now.”