9
Pig-aam si Saul no Hari to Israil
1 No kuntoon, duon kapunganan ni Binyamin no pighingaranan ki Kis no anak ni Abiil, no anak ni Siror, no anak ni Bikorat, no anak ni Apia no kapunganan ni Binyamin. Ogkangaranan no otow sikandin. 2 Duon anak din no si Saul no baubato pad no marodyow lagboy. Waro unawa kandin to tibon Israil – matmatangkawal sikandin to tibo; tagapamanadyon din do ka duma.
3 No kuntoon, naagak ka mgo asnu to amoy ni Saul no si Kis. Nignangon si Kis duon to anak din no si Saul to “Parumaa nu ka sagboka no suguonon ta, woy hondio kow no pamanghaa now ka mgo asnu.” 4 No sikan ian no nighip-hipanow sikandan to kabubunganan to Ipraim, woy to mgo tano no marani to Salisa, di waro dan makitoi ka mgo asnu. Nigparagas sikandan to longod to Saalim, di songo waro dio ka mgo asnu. Takas to sikan, nighip-hipanow sikandan to tano to Binyamin, di waro dan makitoi. 5 To poglopow ran to Sup, pignangonan ni Saul ka suguonon no duma rin to “No, og-uli kid on. Ko ogmaugoy ki pad, konad no ka mgo asnu ka ogkasasawan to amoy ku ko kono ogko-ipong on sikandin kanta.” 6 Di nigtabak ka suguonon to “Pitow ka, duon otow to Magboboot to soini no lunsud. Mabantug ian sikandin, woy ogkatood ka tibo no ignangon din. Oghondio kid on duon, woy naugpa ogpakanangon sikandin kanta ko hondoi ka litos no daan ta.” 7 Nignangon si Saul to suguonon din to “Ko oghondio ki, nokoy ka igkabogoy ta to otow? Noubus on ka ogkakoon kai’t mgo saku ta. Waro igkabogoy ta to otow to Magboboot. Nokoy pad naan ka kai to kanta?” 8 Nigtabak ka suguonon oghutuk kandin to “Pitow ka, duon igkohop-at no pori to plata ku.aIbogoy ku to otow to Magboboot odyow no ognangon sikandin ko hondoi ki ogdoog.” 9 (Nokani to Israil, ko duon otow no oghondio to pog-inso to Magboboot, ogkagi sikandin to “Oghondio kid to ogpakakita.” Hoo su ka oghingaranan ta no taagtagna kuntoon pighingaranan dan no ‘ka ogpakakita’ nokani.) 10 Kagi ni Saul duon to suguonon din to “No, marodyow. Oghondio kid.” No nighipanow sikandan pohondio to lunsud no pig-ugpaan to otow to Magboboot.
11 To pogtakorog dan pohondio to lunsud, duon natomu ran no mgo daaga no niglibuwas odyow to pogsakug. Pig-inso dan ka mgo boi to “Kai buwa ka ogpakakita?” 12 Nigtabak ka mgo boi to “Duon. Nokohun-a sikandin kaniu. Agpas kow; nighondii sikandin to lunsud noy kuntoon do, su duon igpanubad to mgo otow duon to bubungan. 13 Ko ogsood kow to lunsud, ogkitoon now sikandin to kono pad ogtakorog sikandin pohondio to bubungan odyow to pogkoon. Kono ogbunsud ogkoon ka mgo otow to kono pad oglopow sikandin, su sikandin ka ogbolig to tubad dan. Takas to sikan, ogkoon ka mgo otow no hininggat. Hondio kow on, ogkakita now pad sikandin kuntoon.” 14 Nigtakorog sikandan pohondio to lunsud, woy to pogsood dan, duon si Samuel no nigparoog kandan no oghondio to bubungan. 15 No kuntoon, to nigligad no allow to waro pad nigdatong si Saul, nigpakita ka Magboboot ki Samuel to soini no kinagian: 16 “To iing to soini ka allow asoom, ogpa-aap a koikow to otow no matig Binyamin. Sikandin ka ogbus-ugan nu to lana to pog-indan kandin no igbudyag to koot-otawan ku no Israil. Sikandin ka ogpangabang to koot-otawan ku ligkat to boad to mgo Filistihanon. Nakadoromdom a to koot-otawan ku, su narinog ku ka pogpangiak dan.” 17 To pogkakita ni Samuel ki Saul, pignangonan sikandin to Magboboot to “Soini ka otow no innangon ku koikow. Sikandin ka ogboboot to koot-otawan ku.”
18 Nigdani si Saul ki Samuel duon to gomawan to lunsud, woy nig-inso sikandin to “Ogpakanangon ka buwa kanak, Anggam, ko hondoi ka baoy to ogpakakita?” 19 Nigtabak si Samuel to “Kanak ian ka ogpakakita. Takorog ka hun-a koddi dio to bubungan, su ogkoon ka duma kanak kuntoon no allow, woy asoom to masoom ogpohipanawon ku sikoikow, woy ognangonan ku sikoikow to tibo no duon to goinawa nu. 20 Moitongod to mgo asnu no naagak to igkatou on no allow kuntoon no nigligad, dokad ogkasasow tongod to sikan; nakitaan on sikandan. Woy hontow naan ka ogkoiniatan to tibon Israil ko konon sikoikow woy ka tibon lunggunan to amoy nu?” 21 Nigtabak si Saul to “Di, kapunganan a ni Binyamin, no ian ka pinakamaintok no koot-otawan sood to Israil. Woy ka lunggunan ku ian ka malmaintok pad to tibon mgo lunggunan to Binyamin. Manio naan no nigkagi ka to innangon nu kanak?” 22 No pig-aap ni Samuel si Saul woy ka suguonon din dio to sood to sinabong, woy inpapinnuu din sikandan to dorodyawi no pinnuuanan dio to koonanan taliwaro to mgo hininggat; mgo katouan no otow tibo. 23 Pignangonan ni Samuel ka taaghilutu to “Aapa nu dii to kanak ka sikan no saapu no inbogoy ku koikow. Ka innangon ku no ikannugun nu.” 24 No pigpurut to taaghilutu ka paa no duon saapu, woy insabuk din to tangkaan ni Saul. Nigkagi si Samuel to “Soini ka ingkannugun ku koikow. Koon kad, su in-oog ku koikow ligkat to pognangon ku no ‘Duon mgo hininggat ku to pogkoon.’” Woy nigkoon si Saul duma ki Samuel to sikan no allow. 25 Takas to nigtupang sikandan ligkat to bubungan pohondio to lunsud, nig-aaukuy si Samuel ki Saul duon to ampow to baoy rin. 26 To pogkapawo, nig-onow sikandan to pogsilo to allow, woy pig-umow ni Samuel si Saul duon to ampow no kagi to “Himpod ka woy ogpo-hipanawon ku sikoikow.” To nakahimpod on si Saul, nigluudyud niglibuwas si Saul woy si Samuel. 27 To marani on sikandan to oatan to lunsud, nignangon si Samuel ki Saul to “Sugua nu ka suguonon nu to poghun-a kanta, di ogpalinggaat ka duma kanak to magaan, su duon ignangon ku koikow ligkat to Magboboot.” Woy nighun-a ian ka suguonon.