10
Pig-indanan si Saul no Hari
1 No nigpurut si Samuel to sooranan to lana, woy inbus-ug din to uu ni Saul, woy pigharokan din si Saul no kagi “Pig-indanan kad on to Magboboot pinabadyo to pogbus-ug to lana no sikoikow on ka igbudyag to koot-otawan no ian tagtuun ka Magboboot. 2 Ko ogligkat ka kanak angkuwan, ko marani kad on to lobong ni Rakil, ogpakatomu ka to daruwa no otow, dio to Silsa to oatan to Binyamin. Ognangonan ka ran to ‘Nakitaan on ka mgo asnu no inpamangho now porom, woy kuntoon, konad ogdoromdom ka amoy nu to sikan, woy kaniu on ka no-ipongan din. Kagi rin to “Nokoy ka oghimuon ku tongod to anak ku?”’ 3 No ogparagas ka ligkat dio pohondio to dakol no kadyu to Tabor. Ko dio kow, ogkatomuan kow to tatou no otow no ogtakorog odyow to pogsadyo to Magboboot dio to Bit-il. Ka sagboka ogtiang to tatou no nati no kambing, ka dangob og-aap to tatou no malison no pan, woy ka igkatou og-aap to sooranan no nasooran to binu. 4 Ogpangumusta sikandan kaniu, woy ogtaruwoy sikandan to daruwa no pan kaniu, woy ogtinawoon now ian. 5 Takas to sikan, ogparagas kow to bubungan to Magbobootalongod to ugpaan to mgo sundau to mgo Filistihanon. Ko ogdani kow to lunsud, ogpakatomu kow to puntuk to mgo taagtagna no ogtupang ligkat to bubungan. Duon ogparaging to mgo ogparagingonon to tangkaan dan no iing to mgo kuglung, mgo gimbal, mgo pulondag woy mgo sauroyb, woy ogpanagna sikandan. 6 Ogkalonaan ka to Gimukud to Magboboot to kabogbogan, woy ogpanagna ka duma kandan, woy ogkohutuk ka pogko-otow nu. 7 Takas no ogkatood on ka soini no mgo indanan, himua nu ko nokoy ka ogkitoon nu, su ogdumaan ka to Magboboot. 8 Tupang kad hun-a kanak pohondio to Gilgal. Ogsundul ad ian no oglogsad odyow to pogpanubad to mgo tutungonon no mgo igtubad woy mgo tubad to pogkasagboka, di ogtatagad ka to papitu no allow woy ad ogpakahondio to koikow woy ognangonan ku sikoikow to oghimuon nu.”
9 To pogliku ni Saul odyow to pogpaligkat ki Samuel, pighutuk to Magboboot ka goinawa ni Saul, woy natood ian ka tibo to soini no mgo indanan to sikan no allow. 10 To poglopow ran to Gibaa, duon puntuk to mgo taagtagna no nigtomu kandan. Piglona-an si Saul to Gimukud to Magboboot to kabogbogan, woy songo nigpanagna sikandin. 11 To pogkakita to mgo otow no noko-ila ki Saul nokani no songo nigpanagna sikandin duma to mgo taagtagna nigmang-inso sikandan to “Nokoy soini no niglopow to anak ni Kis? Songo taagtagna buwa si Saul?” 12 Duon otow dio no nignangon “Songo taagtagna buwa ka mgo amoy to soini duma?” woy tongod to sikan no nangnangonan to mgo otow ka “Songo taagtagna buwa si Saul?” 13 Takas to nighagtong on si Saul to pogpanagna, nigtakorog sikandin pohondio to bubungan.
14 No kuntoon nig-inso ka anggam ni Saul kandin woy to suguonon din to “Hondoi kow puun?” Nigtabak si Saul to “Nigpamangho koy to mgo asnu. Di to waro noy makitoi, nighondio koy ki Samuel.” 15 Nig-inso ka anggam ni Saul to “Nangoni a nu, nokoy ka innangon ni Samuel kaniu?” 16 Nigtabak si Saul to “Pignangonan koy rin no nakitaan on ka mgo asnu.” Di waro innangon ni Saul to anggam din ka innangon ni Samuel kandin tongod to pogkahari.
17 Inpo-umow ni Samuel ka tibon mgo otow to Israil to pogtangko to Magboboot dio to Mispa, 18 woy pignangonan din sikandan to “Soini ka kinagian to Magboboot no Tinuuhan to Israil, kagi ‘Pig-aap ku sikaniu ligkat to Ehiptu, woy pigpangabangan ku sikaniu puun to kabogbogan to Ehiptu woy to tibon mgo koot-otawan no nig-uang-uang kaniu. 19 Di kuntoon pig-iniugan now ka Magboboot now no ian ka taagpangabang kaniu to mgo koirapan woy mgo igkasasow now. Nignangon kow to “Kono! Bogadyi koy to hari.” No kuntoon ogtangko kow to Magboboot pinabadyo to mgo ka-ap-apuan now woy mgo puntuk now.’”
20 To pogtangko to tibon mgo kapunganan ni Israil ki Samuel, pig-aam ka mgo kapunganan ni Binyamin. 21 No inpatangko din ka tibon koot-otawan ni Binyamin pinabadyo to mgo puntuk dan, woy ka pig-aam ian ka mgo kapunganan ni Matri. To katapusan, ka pig-aam ian si Saul no anak ni Kis. Di to pogpamangho dan kandin, kono ogkakitaan sikandin! 22 No nig-inso sikandan to Magboboot to “Nakahondii buwa ka otow kuntoon?” woy nigtabak ka Magboboot to “Hoo ian, nighoos do sikandin to mgo kaaglagan.” 23 Nigpallaguy sikandan to pog-angoy ki Saul, woy to poghasindog din taliwaro to mgo otow, nakita ran no tagapamanadyon din do ka duma no mgo otow. 24 Nignangon si Samuel to koot-otawan to “Pitow kow to otow no pig-aam to Magboboot. Waro unawa kandin taliwaro to tibon koot-otawan.” Woy nigbabansagon ka mgo otow to “Ogmaadyat ka ukul to hari!” 25 Nignangon-nangon si Samuel to mgo otow to mgo udlin tongod to pogkahari. Insulat din to pigluun no sulatanan, woy insabuk din to tangkaan to Magboboot. No inpo-uli on ni Samuel ka tibon mgo otow to mgo lunggunan dan. 26 Songo nig-uli si Saul to ugpaan din to Gibaa. Nigduma kandin ka mgo mabantug no mgo otow pinabadyo to pog-antog to Magboboot to goinawa ran. 27 Di duon duma no mgo otow no sabandal no nignangon to “Ogmomonu soini no otow to pogpangabang kanta?” Pigsamilian dan sikandin, woy waro sikandan nigbogoy to mgo igbogoy kandin. Di si Saul atag, waro sikandin mogkagi.