1 Samuel 11

Pigpangabangan ni Saul ka Yabis-Gilaad

¹ Kuntoon si Nahas ian ka igbudyag to mgo kapunganan ni Bin-Ammi. Nighondio sikandin woy piglingkusan din ka Yabis-Gilaad. Nignangon ka mgo otow to Yabis to “Himu ka to kasabutan kanami woy ogpadiraom koy koikow.” ² Di nigtabak si Nahas no kapunganan ni Bin-Ammi kandan to “Woy a oghimu to kasabutan kaniu ko ogpakalokat a to kawanan no mata to kara sagboka kaniu, odyow no ogkasiporan ka tibon Israil.” ³ Nigtabak ka mgo igbudyag to Yabis kandin to “Bogadyi koy to papitu no allow odyow to pogpa-aap to mgo taagnangon to tibon Israil. Ko waro oghondii to pogpangabang kanami, ogluhud koy kaniu.” ⁴ To poglopow to sikan no mgo taagnangon dio to Gibaa no pig-ugpaan ni Saul, nignangon-nangon sikandan to soini tibo to mgo otow, woy nansinogow to maagbot ka tibo.

⁵ To sikan, nig-uli si Saul ligkat to kamot no nigsundul to mgo igdadaru no mgo baka rin. Nig-inso sikandin to “Nokoy ka nasasowan to mgo otow? Mainaan to nigsi-sinogow sikandan?” Woy pignangonan dan sikandin to tibo no innangon to mgo otow to Yabis. ⁶ To pogdinog ni Saul to mgo kinagian dan, piglona-an sikandin to Gimukud to Magboboot to kabogbogan woy songo nabou lagboy sikandin. ⁷ Nigpurut sikandin to daruwa no baka, woy pigpanggupal din. Inpa-aap din ka mgo ginupal pinabadyo to mgo taagnangon dio to tibon Israil no kagi “Soini ka oglopow to mgo baka to otow no kono ogsundul ki Saul woy ki Samuel kuntoon.” No, nahinaatan lagboy ka mgo otow to Magboboot, woy nasagboka sikandan to poglibuwas. ⁸ To poglimud ni Saul to mgo otow dio to Bisik, duon tatou no gatus no libu no otow to koot-otawan to Israil, woy katouan no libu no otow to Juda. ⁹ Pignangonan dan ka mgo otow no nig-aap to nangnangonon ligkat to Yabis to “Nangoni now ka mgo otow to Yabis-Gilaad to ‘Ko ogmoinit on ka allow asoom, ogkapangabangan kow on.’” To pognangon to mgo otow soini duon to mgo otow to Yabis-Gilaad, narago lagboy sikandan. ¹⁰ Pignangonan dan ka mgo kapunganan ni Bin-Ammi to “Asoom no allow ogluhud koy kaniu, woy ogpakahimu kow to agad nokoy no ogkoiniatan now kanami.” ¹¹ To pogkapawo, pigbaad ni Saul ka mgo otow rin to tatou no puntuk. To magaan on ogsilo ka allow, piglusuran dan ka pig-ugpaan to mgo kapunganan ni Bin-Ammi, woy pigpanghimatadyan dan sikandan taman to moinit on ka allow. Ka nakapanlaguy nokogsuwoysuwoy ian; waro agad daruwa no nagaat no nokogludyud. ¹² Nignangon ka mgo otow ki Samuel to “Hontow ka nignangon no ‘Kono ogpaka-aap si Saul kanta.’ Palibuwasa now sikandan kai to kanami, woy ogpanghimatadyan noy sikandan.” ¹³ Di nigkagi si Saul to “Waro ogkohimatadyan kuntoon no allow, su pigpangabangan to Magboboot ka Israil kuntoon.” ¹⁴ No nigkagi si Samuel duon to mgo otow to “No, oghondio kid on to Gilgal, woy igpamaugot ta ka pogkahari ni Saul.” ¹⁵ No nigmanhondio ka tibon mgo otow to Gilgal woy pigpamaugot dan no si Saul ian ka hari dan dio to tangkaan to Magboboot. Pigtubad dan dio ka mgo panubad to pogkasagboka duon to Magboboot, woy duon dakol no pogkoonan ni Saul woy to tibon mgo otow to Israil dio.