12
Mgo Kinagian to Pog-awo ni Samuel
1 Nigkagi si Samuel to tibon koot-otawan to Israil to “Narinog ku ka tibo no innangon now kanak, woy inbogoy ku kaniu ka hari no ogboboot kaniu. 2 Woy kuntoon duon on hari no igbudyag now. Tongod kanak, budyag ad on woy ubanon ad, woy duon ka mgo anak ku no lukos duma kaniu. Nohimu a no igbudyag now ligkat to baubato a pad taman to kuntoon no allow. 3 Soini ad nighasindog. Pamaugot kow kuntoon tongod kanak kai to tangkaan to Magboboot woy to pig-aam din. Hontow kaniu ka napurutan ku to baka? Hontow kaniu ka natakowan ku to asnu? Hontow ka pigluku ku? Hontow ka pig-ul-uangan ku? Hontow ka natinawaan ku to saapi odyow no kono a ogpitow to sao dan? Ko duon pighimu ku no iing soini ogbogoy a to husoy kuntoon.” 4 Nigtabak ka mgo otow to “Waro ka manluku kanami woy waro ka nig-uang-uang kanami. Waro napurut nu ligkat to boad to otow.” 5 Nigkagi si Samuel kandan to “Ogpakapamaugot ka Magboboot tongod kaniu, woy songo ogpakapamaugot ka pig-aam din kuntoon no allow no waro nakita now no maroot duon to boad ku.” Nigtabak sikandan to “Hoo, ogpakapamaugot sikandin.”
6 No nigkagi si Samuel duon to mgo otow to “Ka Magboboot ian ka nig-aam ki Mosis woy ki Aaron, woy sikandin ka nig-aap to mgo kabuybudyagan now ligkat to Ehiptu. 7 No, hasindog kow kai, su ipapitow ku kaniu ka kamaugotan to tangkaan to Magboboot tongod to tibon marodyow no hinimuan din tongod kaniu woy to mgo ka-ap-apuan now.
8 Takas to nighondio si Jacob to Ehiptu, nigpangiak ka mgo otow duon to Magboboot odyow no ogkapangabangan porom sikandan, woy inpa-aap to Magboboot si Mosis woy si Aaron no nig-aap to mgo ka-ap-apuan now libuwas to Ehiptu woy pino-ugpo din sikandan to soini no ugpaan. 9 Di, nalingawan dan ka Magboboot no Igbudyag dan, woy sikan ian no pigduad din sikandan ki Sisira no igbudyag to mgo sundau ni Hatsor, woy duon to mgo boad to mgo Filistihanon woy duon to hari to Moab no nigmangadyow kandan. 10 Nigpangiak sikandan duon to Magboboot no kagi ‘Nakasao koy, su pig-ongkoran noy ka Magboboot woy pigga-at noy ka mgo Baal woy mgo Astarot. Di kuntoon pangabangi koy nu ligkat to boad to mgo usig noy, woy ogga-aton noy sikoikow.’ 11 No inpa-aap to Magboboot si Yirub-Baala, si Barak, si Yipta woy si Samuel, woy pigpangabangan kow rin ligkat to boad to mgo usig no niglingut kaniu, odyow no maawang ka pog-ugpo now. 12 Di kuntoon to pogpitow now no nighipanow on si Nahas no hari to mgo kapunganan ni Bin-Ammi, pignangonan a now to ‘Kono! Ogkoiniat koy no duon hari no ogboboot kanami’ agad no duon on hari now no ian ka Magboboot. 13 No kuntoon, soini ka hari no pig-aam now, ka inpamudyu now ian. Pitow kow, nigtinuru ka Magboboot to hari no ogboboot kaniu. 14 Ko ogkahallokan now ka Magboboot woy ogga-aton now woy ogpamminogon now ka mgo kinagian din, no kono kow ogsuwoy to mgo sugu din, woy ko ogsundul kow to Magboboot no Tinuuhan now woy songo ogsundul kandin ka hari no og-aap kaniu, no, marodyow sikan! 15 Di, ko kono kow ogpannalinga to Magboboot, woy ko og-atu kow to mgo sugu din, songo og-atu ka boad din kaniu iing to pog-atu rin to mgo kabuybudyagan now.
16 No kuntoon, hasindog kow duon woy pitowa now ka ogko-in-inuan no kitoonon no oghimuon to Magboboot to tangkaan to mgo mata now! 17 Buwan kuntoon to pogga-ani to trigu no guabung porom, di og-umawon ku ka Magboboot odyow no ogpa-aap sikandin to lugung woy uran kuntoon. Ko ogkatood sikan, ogkataga kow ko monu karakol ka karootan no pighimu now to tangkaan to Magboboot to pogbudyu now no duon hari now.” 18 No nig-umow si Samuel duon to Magboboot, woy to sikan dod no allow, nigpa-aap ka Magboboot to lugung woy uran. No nahinaatan lagboy ka tibon mgo otow to Magboboot woy ki Samuel. 19 Nignangon ka tibon mgo otow duon ki Samuel to “Panabisabi ka duon to Magboboot no Igbudyag nu tongod to mgo suguonon nu, odyow no kono koy rin ogkohimatadyan. Hoo su pigtimuan noy pad ka mgo sao noy pinabadyo to pogbudyu noy to hari.” 20 Nigtabak si Samuel to “Dokow ogkahallok. Maugot ian no pighimu now soini no maroot; di dokow og-iniug to Magboboot; ogga-aton now sikandin to tibon goinawa now atag. 21 Dokow ogsuwoy pohondio to mgo inotowotow no waro puus. Kono ogpakabulig sikandan kaniu, woy kono ogpakapangabang sikandan kaniu, su waro puus ian. 22 Tongod to mabantug no ngaran din, kono og-iniug ka Magboboot to koot-otawan din, su narodyowan sikandin to pog-aam kaniu no koot-otawan din. 23 Tongod kanak, kono porom ogkohimu no ogpakasao a duon to Magboboot pinabadyo to poghagtong to pogpanabisabi ku kandin tongod kaniu. Woy ogtuonon ku sikaniu to daan no litos woy marodyow. 24 Di dorodyowa now no ogkahallokan now ka Magboboot woy ogga-aton now sikandin to maugot to tibon goinawa now; doromdoma now ka dorodyawi no hinimuan din tongod kaniu. 25 Di ko ogparagas kow to poghimu to maroot, ogka-awo kow tibo duma to hari now.”