13
Pigsaparan ni Samuel si Saul
1 Mgo katouan no tuid ka pannuigon ni Saul to pogbunsud din to pogkahari, woy nighari sikandin to Israil to kohop-atan woy daruwa no tuid.a 2 Nig-aam si Saul to tatou no libu no otow puun to Israil. Daruwa no libu kandan duon duma kandin to Mikmas duon to kabubunganan to Bit-il, woy duon ka songo libu duma ki Yunatan to Gibaa to Binyamin. Inpo-uli din ka duma no mgo otow. 3 Piglusuran ni Yunatan ka pig-ugpaan to mgo sundau to mgo Filistihanon duon to Giba, woy nigdinog ka duma no mgo Filistihanon tongod to sikan. No nigpaparaging si Saul to budyung to tibon Israil no kagi “Pamminog kow no mgo Hibriu no otow!” 4 No sikan ian no nigdinog ka tibon koot-otawan to Israil to nangnangonon no “Piglusuran ni Saul ka ugpaan to mgo sundau to mgo Filistihanon, woy kuntoon narootan on ka mgo Filistihanon to mgo otow to Israil.” Woy pig-umow ka mgo otow to poglimud duon ki Saul to Gilgal. 5 Niglimud-limud ka mgo Filistihanon odyow to pogmangadyow to Israil. Tatou no libubka mgo unturanan dan, woy hon-om no libu ka nig-untud to sikanc. Kono ogkasool ka mgo sundau ran, unawa to badyokbok to ilis to dagat no kono ogkasool. Nighondio sikandan no namos-ok to mgo tukbung dan to Mikmas to ogsilaan to Bit-Avin. 6 To pogkakita to mgo otow to Israil to koirapan no pigtangko dan, woy no ogka-baybadyaran ka mgo sundau ran, nighoos sikandan duon to mgo pilang, duon to mgo makopal no mgo kaikadyuan, duon to mgo batu, woy duon to mgo bangaug to tano. 7 Agad duon mgo Hibriu no nigtalipag to Jordan no woig pohondio to tano to Gad woy to Gilaad. Nigpalinggaat si Saul to Gilgal woy nangolkol to kahallok ka tibon mgo otow no duma rin.
8 Nigtatagad sikandin dio to papitu no allow, taman to allow no innangon ni Samuel, di waro niglopow si Samuel to Gilgal, woy nigbunsud on nigman-awo ka mgo otow ni Saul. 9 No nigkagi sikandin to “Kai now ka tutungonon no igtaruwoy woy ka mgo igtaruwoy to pogkasagboka.” Woy si Saul ian ka nigpanubad to tutungonon no igtaruwoy. 10 To pogtakas ni Saul to pogpanubad, niglopow si Samuel, woy niglibuwas si Saul odyow to pogtomu kandin. 11 Nig-inso si Samuel to “Nokoy soini no pighimu nu?” Nigtabak si Saul to “To pogkakita ku no nigman-awo ka mgo otow, woy no waro ka niglopow to innangon nu no allow, woy no niglimud-limud on ka mgo Filistihanon dio to Mikmas, 12 nigdoromdom a no magaan ogtupang ka mgo Filistihanon odyow to poglusud kanak kai to Gilgal woy waro nohimu ku odyow no ogkarago ka Magboboot kanak. No sikan ian no inat napogos a to pogpanubad to tutungonon no igtaruwoy.” 13 Nigtabak si Samuel to “Hinimuan to angol no otow ka pighimu nu. Waro nu toora ka sugu no inbogoy to Magboboot koikow. Ko natood nu porom, ogdigonon din ka pogkahari nu woy to lunggunan nu to nasud to Israil to waro katamanan. 14 Di kuntoon kono ogmaugoy ka koikow no pogkahari; nigpamangho on ka Magboboot to otow no nig-unug to goinawa rin, woy intinuru din on sikandin no ogkohimu no igbudyag to koot-otawan din, su waro nu toora ka sugu to Magboboot.”
15 No nigligkat si Samuel to Gilgal no nighondio sikandin to Gibaa to Binyamin, woy pigsool ni Saul ka mgo otow no nigpalinggaat kandin. Mgo hon-om no gatus sikandan. 16 Nig-ugpo si Saul woy si Yunatan no anak din, duma to mgo otow ran dio to Gibaa to Binyamin, tagood to nig-ugpo ka mgo Filistihanon to Mikmas. 17 Duon tatou no puntuk to mgo Filistihanon no niglibuwas odyow to pogpang-agow. Ka sagboka no puntuk nigdoog to Opra no marani to Sual, 18 ka igkorangob nigpadoog to Bit-Horon, woy ka igkatou nigdoog to oatan to tano no nakapantow to Aug to Siboim pohondio to han-hanawan.
Waro mgo Panganiban to Israil
19 Waro otow no ogsasalsal no ogkakitaan dio to tibon tano to Israil to sikan, su nignangon ka mgo Filistihanon to “Kono ogkohimu su, ko duon ogsasalsal, ogmanghimu sikandan to mgo kampilan woy mgo kommag!” 20 No sikan ian no napogos ka mgo otow to Israil to poghondio to ugpaan to mgo Filistihanon odyow to pogpagaang to mgo daru ran, mgo piku, mgo wasoy woy mgo garab. 21 Ogbadyad sikandan to daruwa no tampod to saapi odyow to pogpagaang to daru woy to piku, woy ogbadyad sikandan to sagboka no tampod to saapi odyow to pogpagaang to kakalioy to tano woy to wasoy, woy odyow to pog-irob to durugsangoy. 22 No sikan ian no to allow to pogmangadyow, waro kampilan woy kommag duon to mgo otow; si Saul woy si Yunatan no anak din naan do ka naka-aap to sikan. 23 No kuntoon duon sagboka no puntuk to mgo Filistihanon no nakahondio to daan to bubungan dio to Mikmas.