14
Piglusuran ni Yunatan ka mgo Filistihanon
1 Songo allow to sikan, nigkagi si Yunatan no anak ni Saul duon to baubato no og-aap to mgo panganiban din to “Dii kad, oghondio ki to ugpaan to mgo sundau to mgo Filistihanon dio to limang.” Di waro sikandin mognangon to amoy rin. 2 Si Saul atag, nig-ugpo sikandin marani to Gibaa diraom to sagboka no kadyu no granada duon to Migron. Duon mgo hon-om no gatus no otow duma kandin, 3 ilagkos si Ahiya, no nigsau-ub to kinabo to taagpanubad no ogkohingaranan no ipod. Anak sikandin to kakoy ni I-kabod no si Ahitub, no anak ni Pinihas, no anak ni Ili no taagpanubad to Magboboot nokani duon to Silo. Waro otow no nigsagman no nig-awo si Yunatan. 4 To pinoglimang to daan no ogbadyaan ni Yunatan odyow to poghondio to ugpaan to mgo sundau to mgo Filistihanon duon daama. Ka ngaran to sagboka no daama ian Botsis, woy ka dangob ian Sinni. 5 Ka sagboka no daama duon to amihananano nigtangko to Mikmas, woy ka dangob duon to habagatanbno nigtangko to Giba. 6 Nigkagi si Yunatan duon to baubato no nig-aap to panganiban din to “No, oghondio ki to ugpaan to mgo sundau to sodyo mgo otow no waro matuli. Naugpa duon oghimuon to Magboboot tongod kanta. Waro ogpakabaabag to Magboboot to pogpangabang, agad ko pinabadyo to moon-ing woy ko pinabadyo to maintok do no otow.” 7 Nigtabak ka taag-aap to panganiban din to “Himua nu ka tibo no duon to goinawa nu. Paragas ka ian, su ogduma a koikow to tibon goinawa ku.” 8 Nigkagi si Yunatan to “No man, oghondio ki pohondio to sodyo mgo otow odyow no ogkitoon ki ran. 9 Ko ognangon sikandan to ‘Tagad kow duon woy oglogsad koy to kaniu,’ ogpalinggaat ki kai no kono ki ogtakorog pohondio to kandan. 10 Di ko ognangon sikandan to ‘Panoik kow kai to kanami,’ ogtakorog ki, su sikan ian ka indanan no inbogoy on sikandan to Magboboot kai to mgo boad ta.” 11 No niglibuwas sikandan daruwa odyow no ogkitoon to mgo Filistihanon duon to ampow. Nigkagi ka mgo Filistihanon to “Pitow kow, nigpananap niglibuwas ka mgo Hibriu ligkat to mgo pighoosan dan no mgo lungag!” 12 Nig-umow ka mgo otow to ugpaan to mgo sundau dio ki Yunatan woy to taag-aap to panganiban din to “Panoik kow kai, woy og-anaron noy sikaniu.” No nignangon si Yunatan duon to taag-aap to panganiban din to “Sundul ka kanak pogpamanoik su inbogoy sikandan to Magboboot duon to boad to Israil.”
13 Nigpamaangat si Yunatan, no nigsundul marani kandin ka taag-aap to panganiban din. Nanapood ka mgo Filistihanon to pogpanigbas ni Yunatan, woy nigsundul ka taag-aap to panganiban din no nigpang-uwat kandan. 14 To sikan no an-anadyan no pogpatob-tobokoy, mgo 20 no otow ka pighimatadyan ni Yunatan woy to duma rin sood to tano no ka kau-agan mgo igkalima no baad to hiktariac.
Naroog to Israil ka mgo Filistihanon
15 Takas to sikan, naguagua ka tibon mgo sundau – ilagkos ka duon to ugpaan to mgo sundau woy ka dio to kamot, ka mgo nigbantoy woy ka mgo nakahipanow – woy songo nigdinug ka tano. Igkasasow ian sikan no inpa-aap to Magboboot. 16 Nigpipitow ka mgo otow no inpabantoy ni Saul duon to Gibaa to Binyamin, woy nakita ran no nigpanlaguy ka mgo sundau to agad hondoi no ogdoogan. 17 No nigkagi si Saul duon to mgo otow no duma rin to “Palimura now ka mgo otow ta. Ogpitow ki ko hontow ka na-awo.” To poghimu ran to sikan, nakita ran no si Yunatan woy ka taag-aap to panganiban din naan ka na-awo. 18 Nignangon si Saul ki Ahiya to “Aapa ka Sooranan to Magboboot.” (Hoo, su duon sikan duma to mgo otow to Israil to sikan no mgo allow.) 19 Tagood to nig-aaukuy si Saul duon to taagpanubad, nig-ungud nigmaagbot ka samuk duon to ugpaan to mgo Filistihanon. No nigkagi si Saul duon to taagpanubad to “Dokad ogparagasa.”d 20 No niglimud ka tibon mgo otow duma ki Saul, woy nighondio sikandan to pogmangadyow. To poglopow ran, nakita ran no naguligow lagboy ka mgo Filistihanon no nigmatig-tigbasoy sikandan to mgo kampilan dan. 21 To waro pad nigbunsud soini no pogmangadyow, duon mgo Hibriu no naka-agpot to mgo Filistihanon, di kuntoon niglibong sikandan to pogbulig to mgo otow to Israil duma ki Saul woy ki Yunatan. 22 Songo duon mgo otow to Israil no nakahoos duon to kabubunganan to Ipraim, di to pogkarinog dan no nigpanlaguy on ka mgo Filistihanon, nigbulig sikandan to pogmangadyow no niggapon. 23 No sikan ian, no pigpangabangan to Magboboot ka Israil to sikan no allow, woy noko-uma ka ogmatig-tigbasoy to kohuna-an to Bit-Avin.
Nigkoon si Yunatan to Tonob
24 No kuntoon, nabay-badyaran ka mgo otow to Israil to sikan no allow, su nabagkos sikandan pinabadyo to pangulibot no ingkagi ni Saul. Kagi rin to “Ogkatungadyawan ka otow no ogkoon to agad nokoy no koonon to kono pad ogsaop ka allow kuntoon, ko waro a pad nakasuli to mgo usig ku!” No sikan ian no waro nakakoon ka mgo sundau. 25 Nigsood ka tibon mgo sundau to puaas, woy duon tonob dio to tano. 26 To pogsood dan to kaikadyuan, nakita ran ka tonob no nigtuu-tuu, di waro otow no niglangub to pogkoon to sikan, su nahallok sikandan to tungadyow. 27 Di waro nakarinog si Yunatan no nabagkos ka mgo otow to amoy rin pinabadyo to pangulibot din. No sikan ian no pigtinduk din ka tonob pinabadyo to koopusan to tukod din. Insungit din to bobo din, woy nigmaawang ka mgo mata rin. 28 No pignangonan sikandin to sagboka no sundau to “Pigbagkos ka tibon mgo sundau to amoy nu pinabadyo to hogot no pangulibot no kagi rin to “Ogkatungadyawan ka otow no ogkoon kuntoon no allow!” No sikan ian no maotoy ka mgo otow.” 29 Nigtabak si Yunatan to “Pigbaybadyaran to amoy ku ka koot-otawan. Pitowa now no nigmaawang ka mgo mata ku to pog-ol-oog ku to maintok to soini no tonob. 30 Madmarodyow porom lagboy ko nakakoon ka mgo otow to maintok to hinawi dan to mgo usig dan. Mol-moon-ing porom ka mgo Filistihanon no ogkammatoy!” 31 To sikan no allow, takas to nigpanigbas ka mgo otow to Israil to mgo Filistihanon ligkat to Mikmas pohondio to Ayalon, noubus on ka dadyagang dan. 32 Nigtinagpo sikandan to mgo hinawi woy nigpurut sikandan to mgo karniru, mgo baka, woy mgo nati no baka, woy pig-iow ran dio to tano, woy pigkoon dan, no duon pad ka langosa. 33 No duon nigkagi ki Saul to “Pitow ka, nakasao ka mgo otow duon to Magboboot pinabadyo to pogkoon to saapu no duon pad langosa.” Nigkagi si Saul to “Pigtampod now ka pangulibot now to Magboboot. Liira now ka dakol no batu kai kuntoon.” 34 No nignangon sikandin to “Libuwas kow duon to mgo otow, woy pannangoni now sikandan to ‘Aapa now ka mgo baka woy mgo karniru now kai to kanak, woy kai now iowa, woy koona now. Dokow oghimu to sao duon to Magboboot pinabadyo to pogkoon to saapu no duon langosa.” No sikan ian no pig-aap dan ka mgo baka ran duon to sikan no maukilom woy dio ran iowa. 35 No nighimu si Saul to tubaranan to Magboboot dio. An-anadyan no tubaranan no pighimu rin soini.
36 Nignangon si Saul to “Ogtupang ki duon to mgo Filistihanon to maukilom woy ogman-agow ki to mgo kaaglagan dan taman to kapawo woy waro sagboka kandan ka igaat ta no manokal.” Nigtabak ka mgo otow to “No. Himua nu ko nokoy ka nadoromdoman nu no litos.” Di nignangon ka taagpanubad to “Og-inso ki pad to Magboboot kai.” 37 No nig-inso si Saul duon to Magboboot to “Ogtupang a buwa duon to mgo Filistihanon? Igbogoy nu buwa sikandan duon to boad to Israil?” Di waro mogtabak ka Magboboot kandin to sikan no allow. 38 No nignangon si Saul to “Kai kow no mgo igbudyag to mgo sundau woy ogpitow ki ko nokoy ka sao no nohimu kuntoon no allow. 39 Unawa to manokal pad ka Magboboot no ogpangabang to Israil, agad ko si Yunatan no anak ku ian ka nakasao, ogkamatoy ian sikandin.” Di waro nigkakagi ka mgo otow. 40 Nigkagi si Saul duon to mgo otow to Israil to “Duon kow oghasindog, woy sikanami ni Yunatan ka oghasindog kai.” Nigtabak ka mgo otow to “Himua nu ko nokoy ka nadoromdoman nu no litos.” 41 No nigpanabisabi si Saul duon to Magboboot no Igbudyag to Israil to “Bogadyi a to litos no tabak.” Woy to pogbunut dan, si Yunatan woy si Saul ian ka pig-aam. Waro sao no nakita duon to mgo otow. 42 Nignangon si Saul to “Bunut kow kanami ni Yunatan.” Woy si Yunatan ian ka pig-aam to kandan daruwa. 43 No nignangon si Saul duon ki Yunatan to “Nangoni a nu ko nokoy ka pighimu nu.” No pignangonan sikandin ni Yunatan to “Nig-ol-oog a ro to doisok no tonob no duon to koopusan to tukod ku. Sikan do. Woy kuntoon oghimatadyan a nu?” 44 Nigkagi si Saul to “Ogkalogparan a lagboy to Magboboot ko kono ka ogkamatoy, Yunatan.” 45 Di nignangon ka mgo otow ki Saul to “Litos buwa no ogkohimatadyan si Yunatan, no sikandin ian ka nig-aap to soini no dakol no pogpangabang to Israil? Kono ian! Unawa to manokal ka Magboboot, waro agad sagboka no bulbul to uu rin ka ogko-uug kuntoon, su pighimu rin soini tibo kuntoon pinabadyo to pogbulig to Magboboot.” No sikan ian no pigpangabangan to mgo otow si Yunatan, woy waro sikandin himatadyi. 46 No nighagtong si Saul to poggapon to mgo Filistihanon woy nigman-uli sikandan to kandan no tano.
47 Takas to nohimu no hari si Saul duon to Israil, nigmangadyow sikandin to tibon mgo usig dan no niglingut kandan; ian ka mgo otow to Moab, mgo kapunganan ni Bin-Ammi, mgo otow to Idom, mgo hari to Tsoba, woy ka mgo Filistihanon. Agad hondoi no pigmangadyowan din, pigbaybadyaran din sikandan. 48 Manokal sikandin to pogmangadyow, woy naroog din ka mgo kapunganan ni Amalik, no pigpangabangan din ka Israil ligkat to mgo otow no nigman-agow to mgo kaaglagan dan. 49 Ka mgo anak no lukos ni Saul ian si Yunatan, si Yisbi woy si Malki-sua. Ka kakoy no anak din no boi ian si Mirab, woy ka hari ian si Mikal. 50 Ka ngaran to asawa rin ian si Ahinoam no anak ni Ahimaas. Ka igbudyag to mgo sundau ni Saul ian si Abnir no anak ni Nir. Si Nir ian ka anggam ni Saul. 51 Hoo, su tibon mgo anak ni Abiil ka amoy ni Saul no si Kis, woy ka amoy ni Abnir no si Nir. 52 To tibon mgo allow to ukul ni Saul, duon makabadyad-badyad no minangadyawoy duon to mgo Filistihanon. Kara duon pigkita ni Saul no otow no mabuut woy manokal, pigpurut din sikandin no sundau rin.