15
Pigsamili to Magboboot ka Pogkahari ni Saul
1 Nignangon si Samuel duon ki Saul to “Sikoddi ka inpa-aap to Magboboot nokani to pog-indan koikow no hari to koot-otawan din no Israil; no kuntoon pamminog ka to innangon to Magboboot. 2 Soini ka kinagian to Magboboot no Mabogbog to tibo ‘Oglogparan kud on ka mgo kapunganan ni Amalik tongod to pighimu ran dongan no piglusuran dan ka mgo otow to Israil pogligkat dan to Ehiptu.a 3 No, hondio ka, woy lusuri nu ka mgo kapunganan ni Amalik, woy ubusa nu ka tibo no kandan. Doka ogkoid-ui sikandan; himatadyi nu ka mgo lukos woy boi, mgo bato woy mgo nigsusu pad. Songo himatadyi nu ka mgo baka, mgo karniru, mgo kamil woy mgo asnu.’” 4 No sikan ian no pigpo-umow ni Saul ka mgo otow, woy piglimud din sikandan duon to Tilaim. Mgo daruwa no gatus no libu ka mgo sundau, woy songo duon mgo sampuu no libu no mgo otow to Juda. 5 Nighondio si Saul to lunsud to Amalik, woy niggopas sikandin duon to aug. 6 No pignangonan din ka mgo kapunganan ni Kin to “Awo kow. Ongkori now ka mgo kapunganan ni Amalik odyow no kono kow ogpakalagkos to pogpang-himatoy ku kandan; hoo su marodyow ka pog-otow-otow now to koot-otawan to Israil pogligkat dan to Ehiptu dongan.” No sikan ian, no nigpamariu ka mgo kapunganan ni Kin to mgo kapunganan ni Amalik. 7 No piglusuran ni Saul ka tibon mgo kapunganan ni Amalik ligkat to Habila pohondio to Sur no duon to ogsilaan to Ehiptu. 8 Narakop din si Agag no hari to mgo kapunganan ni Amalik no manokal pad, woy pigpanghimatadyan din ka tibon mgo otow ni Agag pinabadyo to pogpanigbas. 9 Di, waro himatadyi ni Saul woy to mgo sundau rin si Agag, woy songo waro dan himatadyi ka dorodyawi no mgo karniru woy mgo baka, ka maambog no mgo nati to baka woy karniru; ian ka tibo no marodyow. In-oog dan to poghimatoy ka sikan di ka tibo no maotoy woy no ogkasamilian no mgo adyam, pighimatadyan dan ian.
10 No niglopow ka kinagian to Magboboot duon ki Samuel no kagi 11 “Nigmasakit ka goinawa ku su pighimu ku no hari si Saul, su nokoiniug on sikandin kanak, woy waro din toora ka mgo innangon ku.” Noipong si Samuel tongod to sikan, woy nigpangiak sikandin duon to Magboboot to tibo to sikan no maukilom. 12 Masoom pad to pogkapawo nighipanow si Samuel odyow to pogtomu ki Saul, di pignangonan sikandin to “Nighondio si Saul to Karmil. Nigpos-ok sikandin to tuus to kandin do no kabantug, woy nigparagas sikandin no nigtupang pohondio to Gilgal. 13 To poglopow ni Samuel kandin, nigkagi si Saul to “Ogkaboligan ka to Magboboot porom! Natood ku ka tibon mgo innangon to Magboboot.” 14 Di nignangon si Samuel to “Ko maugot sikan, nokoy naan ka pogkakagi to mgo karniru no duon to mgo talinga ku? Nokoy soini no pog-nga-nga to mgo baka no ogkarinog ku?” 15 Nigtabak si Saul to “Pig-aap sikandan to mgo sundau ligkat to pig-ugpaan to mgo kapunganan ni Amalik; ingkannugun dan ka dorodyawi no mgo karniru woy mgo baka odyow to pogpanubad duon to Magboboot no Igbudyag nu, di pigpanghimatadyan noy ian ka tibon duma.” 16 Nigkagi si Samuel duon ki Saul to “Hagtong ka! Ogpoitagaon ku sikoikow to innangon to Magboboot kanak ganna no maukilom.” No nigtabak si Saul to “No, nangoni a nu.” 17 Nigkagi si Samuel to “Agad no maintok ka nokani to pogpitow nu, nohimu ka no igbudyag to tibon mgo kapunganan ni Israil. Pig-indanan ka to Magboboot no hari to Israil. 18 Woy nigsugu sikandin koikow to poghipanow no nigkagi sikandin to ‘Hondio ka woy pang-awaa nu ka sikan no dorooti no koot-otawan no mgo kapunganan ni Amalik; mangadyowa nu sikandan taman to ogkoubus sikandan ogkangkammatoy.’ 19 Manio to waro ka nigpannalinga to Magboboot? Manio to pigtinagpaan nu ka mgo hinawi now, woy nighimu ka to maroot duon to pogpitow to Magboboot?” 20 Nigtabak si Saul to “Di, nigpannalinga a to Magboboot atag. Nighipanow a sumao to innangon to Magboboot kanak. Pigpanghimatadyan ku ka tibon mgo kapunganan ni Amalik, woy pig-aap ku ka hari dan no si Agag kai. 21 Nigpurut ka mgo sundau to mgo karniru woy baka ligkat to hinawi, ian ka dorodyawi no ingkannugun to Magboboot, odyow no igpanubad dan to Magboboot no Igbudyag nu duon to Gilgal.” 22 Di nigtabak si Samuel to “Naan nu buwa no madmarodyow to pogpitow to Magboboot ka pogtubad to mgo tutungonon no igtubad woy mgo igtaruwoy woy kono’n ka pogtood to innangon din? Madmarodyow pad to pogtubad ka pogtuman. Ka pogpannalinga madmarodyow pad to pogbogoy to tabo to mgo karniru. 23 Hoo su to pogpitow to Magboboot, ka pog-atu unawa to sao to pogpang-inso duon to mgo busow, woy ka pogparakol-dakol unawa to karootan to pogga-at to mgo inotowotow. No kuntoon, tongod su pigsamilian nu ka sugu to Magboboot, songo pigsamilian ka rin no hari.”
24 No nigkagi si Saul ki Samuel to “Nakasao a. Pigligal ku ka sugu to Magboboot woy ka koikow no innangon. Nahallok a to mgo otow, woy sikan ian no pigtuman ku ka noiniatan dan. 25 No kuntoon, ogpakoid-uon ku sikoikow no ogpoigu-on nu ka mgo sao ku, woy oglibong ka duma kanak odyow no ogpakasadyo a to Magboboot.” 26 Di nigtabak si Samuel to “Kono a oglibong duma koikow. Pigsamilian nu ka kinagian to Magboboot, woy pigsamilian ka to Magboboot no hari to Israil!” 27 To poglingi ni Samuel odyow to pog-awo, piggon-gonan ni Saul ka ilis to kinabo ni Samuel, woy napitas ka kinabo. 28 Nigkagi si Samuel kandin to “Songo pigpitas to Magboboot ka pogkahari to Israil ligkat to boad nu kuntoon no allow, woy inbogoy rin on to sagboka to mgo songo baoy nu – sagboka no otow no madmarodyow pad koikow. 29 Kono og-uubat ka Magboboot no ian ka kabantug to Israil, woy kono ogkohutuk ka kandin no nadoromdoman; hoo su kono’n otow sikandin no ogkohutuk ka kandin no pogdoromdom.” 30 Nigtabak si Saul to “Nakasao a. Di ogpamudyuon ku koikow no og-iloon a nu to tangkaan to mgo igbudyag to koot-otawan ku woy to tibon Israil. Ludyuri a nu ro kun odyow no ogpakasadyo a to Magboboot no Igbudyag nu.” 31 No nigduma si Samuel ki Saul, woy nigsadyo si Saul to Magboboot.
32 No nigkagi si Samuel to “Aapa now si Agag no hari to mgo kapunganan ni Amalik kai to kanak.” Woy nigdani si Agag kandin no maawang ka goinawa rin su nigdoromdom sikandin to “Warad on kamatadyon kuntoon.” 33 Di nigkagi si Samuel to “Unawa to nawaraan to anak ka duma no mgo boi pinabadyo to kampilan nu, songo ogkawaraan to anak ka inoy nu.” Woy pighimatadyan ni Samuel si Agag duon to tangkaan to Magboboot dio to Gilgal. 34 No nighipanow si Samuel pohondio to Rama, di nig-uli si Saul duon to ugpaan din to Gibaa. 35 Ligkat to sikan no allow, taman to kamatadyon din, waro nighutuk nighondio si Samuel ki Saul, agad no nigmasakit ka goinawa rin tongod kandin. Woy songo nigsondit ka Magboboot no nohimu rin si Saul no hari to Israil.