1 Samuel 16

Pig-indanan ni Samuel si David no Hari

¹ Nigkagi ka Magboboot ki Samuel to “Monu kaugoy no ogpandaawit ka tongod ki Saul, no pigsamilian kud on sikandin no hari to Israil? Sul-ugi nu ka sungay no sooranannu to lana, woy hipanow kad on. Igpa-aap ku sikoikow dio ki Isai to Bitlihim. Pig-aam ku ka sagboka no anak din no ogkohimu no hari.” ² Di nigtabak si Samuel to “Ogmonuon ku to poghimu to sikan? Ogdinog si Saul, woy oghimatadyan a rin.” Nigkagi ka Magboboot to “Aap ka to sagboka no nati no baka woy nangon ka to ‘Nighondii a odyow to pogpanubad duon to Magboboot.’ ³ Hinggata nu si Isai duon to pogpanubad, woy igpapitow ku koikow ka oghimuon nu. Bus-ugi nu to lana ka ignangon ku koikow no otow.” ⁴ No, pighimu ni Samuel ka innangon to Magboboot. To poglopow rin to Bitlihim, nigpangolkol to kahallok ka mgo igbudyag to lunsud pogtomu ran ki Samuel. Nig-inso sikandan to “Kahanong buwa ka tuud nu kanami?” ⁵ Nigtabak si Samuel to “Hoo, kahanong ian. Nighondii a odyow to pogpanubad duon to Magboboot. Ooga now ka mgo lawa now, woy dumai a now to pogpanubad.” No songo in-oog din si Isai woy ka mgo anak din, woy pighinggat din sikandan duon to pogpanubad.

⁶ To poglopow ran, nigkita si Samuel ki Iliab woy nigdoromdom sikandin to “Soini ian ka pig-aam to Magboboot.” ⁷ Di nignangon ka Magboboot ki Samuel to “Doka ogpitow to langlanguan din, woy to katangkawal din, su pigsamilian ku sikandin. Kono ogpitow ka Magboboot to ogpitawon to otow. Ogpitow ka otow duon to ogkakitaan to libuwasan di ka ogpitawon to Magboboot ian ka goinawa.” ⁸ No pig-umow ni Isai si Abinadab, woy inpatangko din sikandin ki Samuel. Di nigkagi si Samuel to “Songo waro pig-aam sikandin to Magboboot.” ⁹ No inpatangko ni Isai si Samma, di nigkagi si Samuel to “Soini rod, waro aama to Magboboot.” ¹⁰ Inpatangko ni Isai ka papitu no mgo anak din no lukos ki Samuel, di nignangon si Samuel kandin to “Waro na-aam to Magboboot to soini no mgo anak nu.” ¹¹ No nig-inso si Samuel ki Isai to “Waro buwa duma no mgo anak nu no lukos?” Nigtabak si Isai to “Duon dod ka kimud, di nigbantoy sikandin to mgo karniru.” Nignangon si Samuel to “Pohondiia now sikandin. Kono ki ogpakabunsudko kono pad oglopow sikandin.” ¹² No inpaangoy ni Isai sikandin. To poglopow rin, marodyow naan ka langlanguan woy lawa rin no kono’n maonsi. Nignangon ka Magboboot ki Samuel to “Hasindog ka woy bus-ugi nu sikandin to lana. Sikandin ka pig-aam ku.” ¹³ No nigpurut si Samuel to sungay no pigsooran to lana, woy inbus-ug din duon to uu ni David, dio to tangkaan to mgo kakoy rin. Ligkat to sikan no allow, pigsooran si David to Gimukud to Magboboot to kabogbogan. No nig-uli si Samuel duon to Rama.

Nigtarabau si David duon ki Saul

¹⁴ No kuntoon pig-ongkoran si Saul to Gimukud to Magboboot, woy pigsasow sikandin to busowno inpa-aap to Magboboot kandin. ¹⁵ Nignangon ka mgo sakop din to “Pitow ka, duon busow puun to Magboboot no nigsasow koikow. ¹⁶ Marodyow, Anggam, ko ogsugu ka to mgo suguonon nu to pogpamangho to otow no ogkatou to pogparaging to arpa.Ogparagingon din ko oglopow ka busow puun to Magboboot, woy ogmaawang man do ka goinawa nu.” ¹⁷ No nignangon si Saul duon to mgo sakup din to “Pamanghoi a now to otow no marodyow ogparaging, woy aapa now kai to kanak.” ¹⁸ Duon sagboka no suguonon no nigtabak to “Duon nakita ku no anak ni Isai to Bitlihim no ogkatou no ogparaging to arpa. Kono’n tabiow sikandin woy ogkatou to pogmangadyow. Marodyow sikandin ogkagi, woy marodyow pitawon. Woy songo nigduma ka Magboboot kandin.” ¹⁹ No nigpa-aap si Saul to mgo taagnangon pohondio ki Isai no nignangon to “Ipa-aap nu ka anak nu no si David kai to kanak puun to pogbantoy rin to mgo karniru.” ²⁰ No nigpurut si Isai to sagboka no asnu, woy pig-unturan din to pan, to laplap no sooranan to binu, woy sagboka no nati no kambing woy inpa-aap din duma to anak din no si David. ²¹ No niglopow si David ki Saul woy nigbunsud sikandin to pogga-at ki Saul. Narodyowan lagboy si Saul ki David, woy on si David no sagboka to mgo taag-aap to panganiban ni Saul. ²² No nigpa-aap si Saul to kinagian pohondio ki Isai no kagi “Pauguti nu no ogpalinggaat si David kai to kanak, su narodyowan a kandin.” ²³ Kara oglopow ka busow puun to Magboboot ki Saul, ogparagingon ni David ka arpa rin, woy ogmaawang man do ka goinawa ni Saul. Ogmadmarodyow ka oggoramon din ian, woy og-awo ka busow.