17
Si David woy si Goliat
1 No kuntoon, nighimpod ka mgo Filistihanon odyow to pogmangadyow woy niglimud-limud sikandan duon to Soko no duon to tano to Juda. Namos-ok sikandan to mgo tukbung dan duon to Ipis-Damim no duon to taliwaro to Soko woy to Asika. 2 Niglimud-limud si Saul woy ka mgo otow to Israil woy namos-ok sikandan to mgo tukbung dan duon to Aug to Ila, woy nigpa-adyad-adyad sikandan to mgo sundau ran to pogtangko to mgo Filistihanon. 3 Duon ka mgo Filistihanon to sagboka no bubungan woy duon ka mgo otow to Israil to limang no bubungan no duon ka aug to taliwaro. 4 Duon bagani no pighingaranan ki Goliat no matig Gat. Niglibuwas sikandin to pig-ugpaan to mgo Filistihanon. Songo dopa woy lalima no dangow ka katangkawal din. 5 Duon kuubow rin no brunsi, woy ka limbutung no kinabo din pighimu to brunsi unawa to ongil to isda no ka kabogati to sikan mgo 57 no kilu. 6 Songo duon brunsi no ig-atang to mgo paa rin, woy duon bubuntugoy no kommag din no brunsi no inbaba rin. 7 Ka dollog to pipilakoy no kommag din unawa karakol to suwoy to haboanan, woy ka kabogati to tampakan no putow to kommag din mgo papitu no kilu. Nighun-a kandin to poghipanow ka taag-aap to kaasag din. 8 Nighasindog si Goliat woy nig-umow sikandin duon to nig-adyad-adyad no mgo sundau to Israil to “Manio no oglibuwas kow no ogpa-adyad-adyad odyow to pogmangadyow? Sagboka a no Filistihanon, woy sikaniu mgo suguanon ni Saul. Aam kow to sagboka kaniu no ogpatupangon now kai to kanak. 9 Ko ogpaka-atu sikandin kanak no ogkamatoy a rin, ogkohimu koy no mgo suguanon now; di ko ogkaroog ku sikandin woy ogkamatoy ku sikandin, ogkohimu kow no mgo suguanon noy, woy ogpadiraom kow kanami.” 10 Nigkagi ka Filistihanon to “Kuntoon, oghanggaton ku ka mgo sundau to Israil! Bogadyi a to otow, woy ogmatob-tobokoy koy.” 11 To pogdinog ni Saul woy to mgo otow to Israil to innangon to Filistihanon, no-ook-ook sikandan, woy nanahallok lagboy.
12 No kuntoon, si David anak ni Isai no matig Bitlihim (no songo ogkohingaranan no Iprata) no duon to tano to Juda. Wawau ka mgo anak no lukos ni Isai, woy to pogkahari ni Saul, budyag on sikandin. 13 Nakaruma ka tatou no kakoy no anak ni Isai ki Saul to pogmangadyow. Ka panganoy ian si Iliab, ka igkorangob ian si Abinadab woy ka igkatou ian si Samma. 14 Si David ian ka kimud. Nigduma ka tatou no kakoy rin ki Saul, 15 di si David niglibong-libong ligkat ki Saul odyow to pogbantoy to mgo karniru to amoy rin duon to Bitlihim. 16 Sood to kohop-atan no allow, niglibuwas ka Filistihanon no si Goliat masoom woy maapun odyow to poghanggat to mgo sundau.
17 No kuntoon, nignangon si Isai duon to anak din no si David to “Aapa nu ka soini songo gantang no sinandag no trigu, woy ka soini no sampuu no dakol no pan duon to mgo kakoy nu. Og-agpas ka duon to pig-ugpaan dan. 18 Aap ka to soini no sampuu no kisuaduon to igbudyag to puntuk dan. Maan-maana nu ka pog-ugpo to mgo suod nu, woy uli ka no og-aap ka to igpamaugot dan. 19 Duon sikandan duma ki Saul woy to tibon mgo otow to Israil duon to Aug to Ila, no nig-atu to mgo Filistihanon.” 20 Masoom pad to pogkapawo, inpabantoy ni David ka mgo karniru rin to sagboka no taagbantoy, woy pighimpod din ka og-aapon din woy nighipanow sikandin, sumao to innangon ni Isai kandin. Niglopow sikandin duon to pig-ugpaan to mgo sundau to poghipanow ran on odyow to pogpa-adyad-adyad no nigbabansagon to pogpohinaat. 21 Nigpatang-tangkooy ian ka mgo otow to Israil woy ka mgo Filistihanon. 22 In-gaat ni David ka mgo pig-aap din duon to taagbantoy to mgo kaaglagan, woy nigpallaguy sikandin pohondio to pigsasindogan to mgo sundau, woy nigpakig-kita sikandin to mgo kakoy rin. 23 Tagood to nig-aaukuy sikandin kandan, niglibuwas si Goliat no bagani to mgo Filistihanon no matig Gat. Nigbabansagon sikandin to allow-allow no hanggat din, woy narinog ni David. 24 To pogkakita to mgo otow to Israil kandin, nigpanlaguy sikandan no nanahallok lagboy.
25 No kuntoon, nigmanangnangonoy ka mgo otow to Israil to ‘Pitowa now soini no otow no ungud oglibuwas odyow to poghanggat to Israil. Ogbogoy ka hari to dakol no saapi duon to otow no ogpakamatoy kandin. Songo igbogoy rin ka anak din no boi no og-asawoon to ogpakamatoy kandin woy songo konad ogbadyad to buhis ka lunggunan to amoy rin to Israil.” 26 Nig-inso si David to mgo otow no nighasindog marani kandin to “Nokoy ka igkabogoy to otow no ogpakamatoy to soini no Filistihanon odyow no ogka-awo ka soini no igkasipod to Israil? Hontow soini no waro matuli no Filistihanon no oghanggat to mgo sundau to Magboboot no Manokal?” 27 Nigtabak sikandan to innangon-nangon dan woy nignangon sikandan to “Sikan ian ka igbogoy to otow no ogpakamatoy kandin.” 28 To pogkarinog ni Iliab no kakoy rin no nig-aaukuy si David to mgo otow, nabou lagboy sikandin woy nig-inso sikandin to “Manio to nighondii ka? Hontow ka piggaatan nu to pila no mgo karniru nu duon to han-hanawan? Nataga a no ungud ka ogparakol-dakol, woy no maroot ka goinawa nu ladyun; nighondii ka ro odyow to pogpipitow to pogmangadyow.” 29 Nigkagi si David to “Nokoy ka pighimu ku kuntoon? Kono a buwa ogpakakagi?” 30 No nig-awo si David no nig-inso man do to loin no otow to sikan dod no inso, woy unawaro ka intabak to mgo otow kandin.
31 No, duon nakarinog to innangon ni David, woy pignangonan din si Saul, woy inpo-umow ni Saul si David. 32 Nigkagi si David ki Saul to “Kono ta porom ogpatawaron ka goinawa ta tongod to soini no Filistihanon. Koddi no suguanon nu ka oghondio to pog-atu kandin.” 33 Nigtabak si Saul to “Kono ka ogpakahondio to pog-atu to sikan no Filistihanon. Bato ka pad, woy sikandin naka-anad to pogmangadyow puun to baubato pad sikandin.” 34 Di nigtabak si David ki Saul to “Taagbantoy soini no suguanon nu to mgo karniru to amoy rin. Ko duon lionbwoy ko usucno oglopow no ogdawi to sagboka no karniru, 35 oggaponon ku sikan, woy ogbarasan ku no ogpangabangan ku ka karniru puun to bo-bo din. Ko og-atu ka lion woy ka usu kanak, ogsakawon ku ka sumpo din, woy ogtigbason ku no oghimatadyan ku sikandin. 36 Nakahimatoy soini no suguanon nu to lion woy to usu. Ogko-unawa soini no Filistihanon to kandan su pighanggat din ka mgo sundau to Magboboot no Manokal. 37 Ka Magboboot ian ka nigpangabang kanak ligkat to suu to lion woy to suu to usu, woy songo ogkapangabangan a rin ligkat to boad to soini no Filistihanon.” Nignangon si Saul ki David to “No, hipanow kad woy ogduma poron ka Magboboot koikow.” 38 No inpasau-ub ni Saul ki David ka kandin no kinabo. Inpasau-ub din ki David ka kinabo din no limbutung, woy ka brunsi no kuubow. 39 Nigsinikot si David to moirob din ampow to kinabo woy nig-ol-oog sikandin to poghip-hipanow to sikan, su waro pad sikandin naka-ol-oog to pogsau-ub to iing sikan. Nigkagi sikandin ki Saul to “Kono a ogpakahipanow to soini, su waro a ma-anad to sikan.” Woy pigluung din do.
40 No pig-aap din ka tukod din woy nighondio sikandin to bougan. Nig-aam sikandin to lalima no moinglis no mgo batu, woy intagu din to bulsa to insol-oy rin no kabil to taagbantoy. Nig-aap sikandin to lambuyugdno nigparani sikandin to Filistihanon. 41 Songo ungud nigparoog ki David ka Filistihanon no duon nig-aap to kaasag din to tangkaan din. 42 Nigpitow si Goliat ki David, woy nakita rin no bato pad si David no marodyow pitawon woy kono’n maonsi, woy pigsamilian din sikandin. 43 Nigkagi sikandin ki David to “Asu a buwa no tukod do ka ig-atu nu kanak?” Woy pigtungadyow ni Goliat si David pinabadyo to mgo ngaran to mgo tinuuhan din. 44 Kagi rin to “Dii kad, woy igsunggud ku ka saapu nu to mgo manuk-manuk to aw-awangan woy to mgo magintaunan!” 45 Nigkagi si David duon to Filistihanon to “Nig-atu ka kanak pinabadyo to kampilan woy mgo kommag, di og-atuon ku sikoikow pinabadyo to ngaran to Magboboot no Mabogbog to tibo, ka Tinuuhan to mgo sundau to Israil no pighubabo nu. 46 Kuntoon no allow, igbogoy to Magboboot sikoikow kai’t kanak. Ogkobarasan ku sikoikow woy ogkatamporan ku ka liog nu. Kuntoon igbogoy ku ka mgo lawa to mgo sundau no Filistihanon duon to mgo manuk-manuk to aw-awangan woy duon to mgo magintaunan odyow no ogkoonon dan, woy ogkataga ka tibon kalibutan no duon maugot no Tinuuhan to Israil. 47 Ogkataga ka tibon mgo otow kai no kono’n pinabadyo to kommag woy ko kampilan ka pogpangabang to Magboboot; hoo, su ka Magboboot ian ka ogpakaboot to pogkaroog to pogmangadyow woy igbogoy rin sikaniu tibo kai to mgo boad noy.”
48 To pogparani to Filistihanon ki David odyow to pog-atu kandin, nigpallaguy si David odyow to pogtomu kandin duon to mangadyowan. 49 No nigsikop si David to batu puun to kabil din, woy inlambuyug din, woy no-igu ka Filistihanon duon to bukod. Nakalobong ka batu duon to bukod ni Goliat, woy naka-usmod sikandin no naka-angkob duon to tano. 50 No naroog ni David ka Filistihanon pinabadyo to lambuyug woy batu ro; pighimatadyan ni David si Goliat no waro moirob no pig-aap din. 51 Nigpallaguy si David to longod ni Goliat, woy pighuabut din ka kampilan ni Goliat puun to tagub, woy takas to pighimatadyan din sikandin, pigtampod ni David ka liog ni Goliat pinabadyo to kampilan. To pogkakita to mgo Filistihanon no namatoy ka bagani ran, nigbatili sikandan no nigpanlaguy. 52 No nigpallaguy ka tibon mgo otow to Israil woy to Juda no nigbabansagon no niggapon to mgo Filistihanon taman to oatan to Gat woy taman to gomawan to Ikron. Nonakahay-ang ka mgo lawa to nanatigbas no mgo Filistihanon to daan to Saaraim taman to Gat woy to Ikron. 53 To poglibong to mgo otow to Israil ligkat to poggapon dan to mgo Filistihanon, pigpamurut dan ka noongkoran no mgo kaaglagan to mgo Filistihanon. 54 Pig-aap ni David ka uu to namatoy no Filistihanon pohondio to Yirusalim, woy insabuk din ka mgo panganiban ni Goliat to kandin do no tukbung. 55 To pogpitow ni Saul ki David no niglibuwas odyow to pog-atu to Filistihanon, nig-inso sikandin ki Abnir no igbudyag to mgo sundau rin to “Abnir, hontow’n anak ka sikan no baubato?” Nigtabak si Abnir to “Unawa to manokal ka pad, Hari, waro a mataga.” 56 Nignangon ka hari to “Maan-maana nu ko hontow’n anak soini no baubato.” 57 To poglibong ni David ligkat to poghimatoy to Filistihanon, naambagan sikandin ni Abnir, woy pig-aap sikandin to tangkaan ni Saul, no nigbitbit pad si David to uu ni Goliat. 58 Nig-inso si Saul kandin to “Hontow’n anak ka, Utu?” Nigtabak si David to “Anak a to suguanon nu no si Isai no matig Bitlihim.”