18
Nigtalikuron si Saul tongod ki David
1 Takas to nig-aaukuy si David ki Saul, nasagboka si Yunatan kandin to goinawa. Indakoli to goinawa ni Yunatan si David unawa to goinawa rin to kandin no lawa. 2 Ligkat to sikan no allow, pig-udyamu ni Saul si David, woy warad po-ulia si David dio to baoy to amoy rin. 3 Nangulibot si Yunatan ki David tongod to dakol no goinawa rin kandin. 4 Pigluung ni Yunatan ka sabinit woy ka kinabo din no tuus to pogkahari, woy inbogoy rin ki David. Songo inbogoy rin ka kampilan din, ka busug din woy ka hoon din. 5 Agad nokoy ka sugu ni Saul ki David, lagboy no natood ni David, woy sikan ian no nigboot si Saul no si David nohimu no matikang no igbudyag to mgo sundau. Narago ka mgo otow to sikan, woy songo narago ka mgo igbudyag to mgo sundau ni Saul.
6 To pog-uli to mgo otow takas to pighimatadyan ni David ka Filistihanon, nigmanlibuwas ka mgo boi to mgo lunsud to Israil, odyow to pogtomu ki Hari Saul pinabadyo to pog-uuranda woy pogsadyow. Nig-uuranda sikandan to mgo uranda to karago, woy niggigimbalawoy nigmanauroy sikandan. 7 To pogsadyow ran, nig-uuranda sikandan no nignangon to
“Nakahimatoy si Saul to mgo linibu, woy nakahimatoy si David to mgo tigsampuu no libu.”
8 Nabou lagboy si Saul to sikan; no-ulingol sikandin to uranda ran. Nigdoromdom sikandin to “Inpa-abin dan ki David ka tagsinampuu no libu, di mgo libu ro atag ka inpa-abin dan kanak. Ko sikan, inat kono'n maugoy no ogka-agow rin ka pogkahari ku!” 9 Ligkat to sikan no allow, nohimu no talikuron si Saul tongod ki David. 10 To pogkapawo, nigpalusud ka Magboboot to busowbdio ki Saul. Nigpanagna-tagna si Saul duon to baoy rin, tagood nigparaging si David to arpa rin, iing to taan no himuonon din. To sikan, duon kommag to boad ni Saul, 11 woy inbuntug din sikan no nignangon sikandin dio to goinawa rin to “Igdakosol ku si David duon to aabat.” Di kararuwa nigwoil si David odyow kono ogkasugat.
12 Nahallok si Saul ki David, su nigduma ka Magboboot ki David, di pig-ongkoran din si Saul atag. 13 No nigpapamariu si Saul ki David. Nigbogoy sikandin ki David to katongod to pog-aap to songo libu no mgo sundau, woy si David ian ka nig-aap kandan to pogmangadyow. 14 To tibo no pighimu ni David, nakaroog sikandin, su pigdumaan sikandin to Magboboot. 15 To pogkakita ni Saul no ungud ogpakaroog si David, nahallok si Saul kandin. 16 Di dakol ka goinawa to tibon mgo otow to Israil woy to Juda ki David, su pig-aap din sikandan to tibon pogmangadyow ran. 17 Nignangon si Saul ki David to “Soini ka panganoy ku no anak no boi no si Mirab. Igbogoy ku sikandin koikow no og-asawoon nu ko ogparagas ka to pogga-at kanak pinabadyo to kabuut nu no ogmangadyow ka to pigpapamangadyow to Magboboot.” Hoo su nignangon si Saul duon to goinawa rin to “Kono a og-atu kandin. Ka mgo Filistihanon do ka baagad to pog-atu kandin!” 18 Di nigtabak si David ki Saul to “Hontow a naan, woy nokoy ka lunggunan to amoy ku taliwaro to mgo puntuk to Israil? Kono a porom ogkohimu no maka-amung to hari.” 19 No sikan ian no to poglopow to allow to pogpangasawa porom ni David ki Mirab no anak ni Saul, inbogoy si Mirab duon ki Adriil no matig Mihola.
20 No kuntoon nigdakol ka goinawa ni Mikal no songo anak no boi ni Saul duon ki David. To pogkarinog ni Saul tongod to sikan, narago sikandin. 21 Nigdoromdom si Saul to “Igbogoy ku ka anak ku ki David, odyow no ogkalit-agan si David. Woy og-atu ka boad to mgo Filistihanon kandin.” No nignangon si Saul ki David to “Kuntoon duon man do allow no ogkohimu ka porom no maka-amung ku.” 22 No pigsugu ni Saul ka mgo sakup din to “Naas-naasi now si David to ‘Pitow ka, narodyowan ka hari koikow, woy songo ogkoiniat ka mgo sakup din koikow; marodyow ian ko ogkohimu ka no maka-amung din.’” 23 No sikan ian ka ingkakagi ran ki David, di nigtabak si David to “Naan now buwa no ma-agkap do no tiangonon ko ogkohimu ki no maka-amung to hari? Kono a no datu, woy maintok do ka noko-ila kanak.” 24 To pognangon to mgo suguanon ni Saul kandin to intabak ni David, 25 nigkagi si Saul to “Nangoni now si David to ‘Waro loin no igpoompukan ni Saul koikow ko kono’n ka intuli no laplap to songo gatus no Filistihanon no otow, odyow no ogkasulian din ka mgo usig din.’” Nigkagi si Saul to soini su nigdoromdom sikandin no ogkohimatadyan si David to mgo Filistihanon. 26 To pognangon to mgo suguanon to soini ki David, narago on si David no ogkohimu sikandin no maka-amung to hari. No to waro pad nigligad ka inkorow no mgo allow, 27 nighipanow si David duma to mgo sundau rin, woy nanghimatoy sikandan to daruwa no gatus no Filistihanon. Pig-aap din ka intuli dan no mgo laplap woy intaruwoy rin ka tibo duon to hari odyow no ogkohimu sikandin no maka-amung to hari. No inbogoy ni Saul ka anak din no si Mikal ki David no og-asawoon din. 28 To pogkakita ni Saul no nigduma ka Magboboot ki David, woy no songo nigdakol ka goinawa to anak din no si Mikal ki David, 29 nigdakol ka pogkahallok ni Saul ki David, woy in-usig ni Saul si David taman to kamatadyon din. 30 Nigparagas nigmangadyow ka mgo igbudyag to mgo Filistihanon, woy to pog-atu kandan, madmarodyow ladyun si David to duma no mgo sakup ni Saul, woy nigmabantug lagboy ka ngaran ni David.