19
Pighimatadyan Poron ni Saul si David
1 Pignangonan ni Saul si Yunatan woy ka tibon mgo suguanon din to poghimatoy ki David. Di marodyow ka goinawa ni Yunatan ki David, 2 woy pignangonan din sikandin to “Nigkoiniat ka amoy ku no si Saul to poghimatoy koikow. Bantoy ka asoom to masoom; hoos ka tagood no 3 oghondio a to kamot duma to amoy ku dio to marani koikow. Ogkagian ku sikandin tongod koikow woy ognangonan ku sikoikow ko nokoy ka tabak din.” 4 Nignangon-nangon si Yunatan to marodyow tongod ki David duon ki Saul no kagi rin to “Kono porom oghimu ka hari to maroot duon to suguanon din no si David. Waro maroot no pighimu rin koikow, marodyow atag ka niglopow koikow tongod to mgo pighimu rin. 5 Inbogoy ni David ka ukul din odyow to poghimatoy rin ki Goliat. Dakol ka kadoogan no inbogoy to Magboboot to Israil, woy narago ka to pogpitow nu to sikan. Manio naan no oghimu ka to maroot duon to otow iing ki David no waro sao koikow, no oghimatadyan nu sikandin to waro pugtian?” 6 Nigpamminog si Saul ki Yunatan woy nangulibot sikandin no kagi “Unawa to manokal ka Magboboot, kono ku ogpohimatadyan si David.” 7 No pig-umow ni Yunatan si David, woy pignangonan din sikandin to tibo no ingkakagi ran. Pig-aap din si David ki Saul, woy nigparagas si David to pogga-at ki Saul unawa to nokani.
8 No kuntoon duon man do minangadyawoy, woy nighipanow si David odyow to pog-atu to mgo Filistihanon. Mabuut lagboy sikandin to pogpanghimatoy, woy nigpanlaguy ka mgo Filistihanon to tangkaan din. 9 Di duon busow no inpalopow to Magboboot ki Saul tagood to pogpinpinnuu rin to baoy no niggogon-gon to kommag din. Tagood to nigparaging si David to arpa rin, 10 inbuntug ni Saul ka kommag din odyow no ogpakarakosol si David porom to aabat, di nakawoil si David woy ka aabat do ka nasugat to kommag ni Saul. To sikan no maukilom, nigpanlaguy on si David.
11 Nigpa-aap si Saul to mgo otow dio to baoy ni David odyow no ogkabantadyan dan woy odyow no ogkohimatadyan dan si David to pogkapawo. Di nigbohog ka asawa ni David no si Mikal kandin to “Ko kono ka ogpanlaguy kuntoon no maukilom, ogpohimatadyan ka kun asoom no allow.” 12 No pigtuntun ni Mikal si David dio to bintana, woy nigpallaguy sikandin no nakapanlaguy on. 13 No nigpurut si Mikal to inotowotow, woy insabuk din to hibatanan ni David. Pigtol-oban din to manggad woy pigsabukan din to bulbul to kambing ka uunanan. 14 To pogpa-aap ni Saul to mgo otow rin to pogpurut ki David, nignangon si Mikal to “Nigdarau sikandin.” 15 No nigpa-aap si Saul to mgo otow no oglibong ki David odyow to pogpitow kandin, woy pignangonan din sikandan to “Aapa now sikandin kai agad ko nighibat pad sikandin to hibatanan din, odyow no ogkohimatadyan ku sikandin.” 16 Di to pogsood to mgo otow, ka inotowotow naan do ka duon to hibatanan woy ka bulbul to kambing duon to uunanan. 17 Nig-inso si Saul ki Mikal to “Manio to piggawadyan a nu? Manio to inpohipanow nu ka usig ku odyow no ogpakapanlaguy sikandin?” Nigtabak si Mikal to “Pignangonan a rin to ‘Pauguti a nu to pogpanlaguy, odyow no kono a ogkapogos to poghimatoy koikow.’”
18 To pogpanlaguy ni David, nighondio sikandin ki Samuel no duon to Rama, woy pignangonan ni David sikandin to tibo no pighimu ni Saul kandin. No nighipanow si Samuel woy si David pohondio to Nayot woy dio sikandan nig-ugpo. 19 No duon nignangon ki Saul to “Duon si David to Nayot to Rama.” 20 No sikan ian no nigpa-aap si Saul to mgo otow odyow to pog-angoy ki David. Di to pogkakita ran to songo puntuk to mgo taagtagna no nigpanagna no duon si Samuel no nig-aap kandan, songo piglona-an to Gimukud to Magboboot ka mgo otow ni Saul, woy songo nigpanagna sikandan. 21 Nigdinog si Saul tongod to sikan, woy nigpa-aap sikandin to duma pad no mgo otow, di songo nigpanagna ka sikan no mgo otow. To igkatou nigpa-aap si Saul to mgo otow, woy songo nigpanagna sikandan. 22 To kaugadyan songo nighipanow si Saul pohondio to Rama. Nighondio sikandin to dakol no linsobuk no duon to Siku, woy nig-inso sikandin to “Hondoi si Samuel woy si David?” Nigtabak ka mgo otow to “Duon to Nayot to Rama.” 23 No nighondio si Saul to Nayot to Rama, di agad si Saul, songo piglona-an sikandin to Gimukud to Magboboot, woy nighipanow sikandin no nigpanagna taman to poglopow rin to Nayot. 24 Pigluung din ka mgo kinabo din woy songo nigpanagna sikandin to tangkaan ni Samuel. Nigpalinggaat sikandin to poghibat iing to sikan to tibon allow woy maukilom. Sikan ian ka pugtian no ognangon ka mgo otow to “Songo taagtagna buwa si Saul?”