20
Si David woy si Yunatan
1 No nigpanlaguy si David puun to Nayot to Rama woy nighondio sikandin ki Yunatan, woy nig-inso sikandin to “Nokoy ka pighimu ku? Nokoy ka sao ku? Nokoy ka ig-ogot to amoy nu kanak, no ogkoiniat sikandin to poghimatoy kanak?” 2 Nigtabak si Yunatan to “Aw ka ruon! Kono ka ogkamatoy! Pitow ka, waro oghimuon to amoy ku, agad ko dakol woy ko maintok no kono din ignangon panoy kanak. Manio no ighoos din soini kanak? Kono’n maugot!” 3 Di nigpamaugot pad si David woy nigkagi sikandin to “Nataga ka amoy nu no narodyowan ka to pogpitow nu kanak, woy nignangon sikandin to ‘Kono porom ogkataga si Yunatan tongod to soini su ogmasakit ka goinawa rin.’ Di unawa to manokal ka Magboboot woy songo manokal ka, sagboka ro no takang ka ogpaka-oot kanak to kamatadyon.” 4 Nignangon si Yunatan ki David to “Agad ko nokoy ka ogkoiniatan nu, oghimuon ku tongod koikow.” 5 No nignangon si David to “Pitow ka, asoom ian ka pogkoonan to pogsilo to buwan, woy ogkoon a porom duma to hari, di pauguti a nu bag to poghondio to kamot odyow to poghoos taman to mahapun to igkatou no allow. 6 Ko ogko-inu-inu ka to amoy nu no waro a duon, nangoni nu sikandin to ‘Nigbudyu si David kanak no ogpaugutan ku sikandin to pog-agpas dio to Bitlihim no puunan din, su duon tuid-tuid no tubad no igtubad to katibtibaan to lunggunan to ka-ap-apuan dan.’ 7 Ko ogtabak ka amoy nu to ‘No man,’ no waro naan igkasasow to soini no suguanon nu, di ko ogkabou sikandin atag, ogkataga ka no duon ian maroot no pogbabantak din kanak. 8 Woy tongod koikow, ogpamudyuon ku sikoikow to pogkoid-u kanak no suguanon nu. Hoo su nigpapang-pangulibotoy ki to tangkaan to Magboboot. Di ko duon sao no nakita nu koddi, no koikow ro ka oghimatoy kanak. Doka a nu ihatod to amoy nu.”
9 Nigtabak si Yunatan to “Kono ian! Ko duon naas-naas no narinog ku tongod to pogbabantak to amoy ku koikow, manio to kono ku ignangon koikow?” 10 Nig-inso si David to “Hontow ka ognangon kanak ko mabuut ka amoy nu to pogtabak koikow?” 11 No nigtabak si Yunatan to “Dii kad, oghondio ki pad to kamot.” Woy nigduma sikandan dio. 12 To dio sikandan, pignangonan si David ni Yunatan to “Pinabadyo to Magboboot to Israil, ogma-maanon ku ka amoy ku to kono pad og-iing soini ka allow to igkatou no allow kuntoon! Ko marodyow ka goinawa rin koikow, ogpa-aap a ian to otow to pogpoitaga koikow to sikan. 13 Di ko duon maroot no goinawa to amoy ku koikow, oglogparan a lagboy poron to Magboboot ko kono ku ipoitaga koikow, woy ogpohipanawon ku sikoikow to waro igkosasow nu. Ogduma porom ka Magboboot koikow unawa to pogduma rin to amoy ku. 14 Di ogkoid-uon a nu porom taman to katamanan unawa to koid-u to Magboboot tagood to manokal a pad, odyow no kono a ogkohimatadyan, 15 woy doka’g tampora ka koid-u nu to lunggunan ku, agad ko oglopow ka allow no ogkaawo ka tibon mgo usig nu, David, to ampow to kalibutan.” 16 No nangulibot si Yunatan ki David woy to lunggunan din no kagi “Ogbobootan porom to Magboboot ka tibon mgo usig ni David.” 17 Woy songo pigpohutuk ni Yunatan si David to inpangulibot din kandin tongod to dakol no goinawa rin, hoo, su dakol ka goinawa ni Yunatan ki David, unawa to goinawa rin to kandin no pogko-otow. 18 No nigkagi si Yunatan ki David to “Asoom ian ka pogkoonan to iam no buwan. Ogkasagman no waro ka, su waro ogpinnuu to pinnuuanan nu. 19 To igkatou no allow kuntoon, hondio ka to pighoosan nu nokani to binunsuran to soini no samuk, woy tagad ka to longod to batu to Isil. 20 Ogpapano a to tatou no tunud marani to sikan unawa to duon ogpanoon ku porom. 21 No ogpa-aap a to bato no lukos no ognangonan ku sikandin to ‘Puruta nu ka mgo inpano ku.’ Ko ognangonan ku sikandin to ‘Naligaran nud on ka mgo tunud ku; aapa nu kai,’ no oglibuwas ka, su unawa to manokal ka Magboboot, waro igkasasow nu. 22 Di ko ognangonan ku ka bato to ‘Pitowa nu, duon to kohuna-an nu ka mgo tunud ku,’ no, ogpanlaguy kad on, su inpa-awo kad to Magboboot. 23 Woy tongod to sikan no ingkakagi ta, doromdoma nu sikan, su ka Magboboot ian ka ogpakapamaugot to sikan taman to katamanan.”
24 No sikan ian no nighoos si David duon to kamot. To poglopow to pogkoonan to Iam no Buwan, nigpinnuu ka hari odyow to pogkoon. 25 Nigpinnuu sikandin to taan no pinnuuanan din to longod to aabat no ogtangko ki Yunatan. Nigpinnuu si Abnir topad ni Saul, di waro otow no nigpinnuu to pinnuuanan ni David. 26 Waro ingkagi ni Saul to sikan no allow, su nigdoromdom sikandin to “Duon buwa nabadyaan ni David no nohimu sikandin no maligsom to tangkaan to Magboboota– sikan do buwa ian.” 27 Di to pogkapawo to igkorangob no allow to buwan, songo waro otow to pinnuuanan ni David. No nig-inso si Saul to anak din no si Yunatan to “Manio to waro nakahondii to pogkoonan ka anak ni Isai, agad gabii woy kuntoon?” 28 Nigtabak si Yunatan to “Nigpamudyu si David kanak no ogpaugutan ku sikandin to poghondio to Bitlihim. 29 Nignangon sikandin to ‘Pauguti a nu bag to poghondio, su duon igpanubad to lunggunan noy duon to lunsud woy pigsugu a to kakoy ku to poghondio. Ko narago ka to pogpitow nu kanak, pauguti a nu to pogpakigkita to mgo kakoy ku.’ No sikan ian no waro sikandin nokohondii to koonanan nu, hari.” 30 No niglogdog ka kabou ni Saul ki Yunatan no kagi rin to “Anak ka to maroot no boi no ogsuwoy-suwoy! Naan nu no waro a mataga no pigpasiporan nu ka ngaran nu, woy pigpasiporan nu ka inoy nu pinabadyo to pogpasakup to anak ni Isai? 31 Tagood to manokal pad si David kai to ampow to kalibutan, kono ka ogkangaranan woy kono ogkarigon ka pogkahari nu. No kuntoon, ipa-angoy nu sikandin kai’t kanak su awos no ogkohimatadyan sikandin!” 32 Nig-inso si Yunatan to amoy rin to “Manio to ogpohimatadyan nu sikandin? Nokoy ka pighimu rin?” 33 Di inbuntug ni Saul ka kommag din ki Yunatan odyow no ogkamatoy porom. No natagaan on naan ni Yunatan no nigbabantak si Saul to poghimatoy ki David. 34 No nighasindog si Yunatan no nig-awo to koonanan no nabou lagboy. Waro sikandin nigkoon to sikan no igkorangob no allow to buwan su nigmasakit lagboy ka goinawa rin tongod to makasisipod no pog-otow-otow to amoy rin ki David.
35 Masoom pad to pogkapawo niglibuwas si Yunatan duon to kamot odyow to pogtomu ki David. Duon maintok no bato no lukos no pigduma rin 36 woy pignangonan din ka bato to “Pallaguy ka woy pamuruta nu ka mgo tunud no ipano ku.” Tagood to nigpallaguy ka bato, nigpano sikandin to tunud to kohuna-an to bato. 37 To poglopow to bato dio to pigdoogan to tunud ni Yunatan, nig-umow si Yunatan kandin to “Inat dio to kohuna-an pad koikow ka tunud.” 38 No nig-umow sikandin to “Agpas ka! Pallaguy! Doka’g sagdok!” Pigpurut to bato ka tunud woy niglibong sikandin to igbudyag din. 39 (Waro gindawanan to bato to soini tibo. Si Yunatan woy si David do ka nataga to kaogsaran.) 40 No inbogoy ni Yunatan ka busug woy tunud din duon to bato, woy pignangonan din ka bato to “Hondio ka. Aapa nu soini uli to lunsud.” 41 Takas to naka-awo ka bato, nighasindog si David ligkat to limang to batu, woy nig-unduk sikandin no niglangkob duon to tano to katatou dio to tangkaan ni Yunatan. Nigpahadharokoy woy nigsinogow sikandan, di si David ka dakol-dakol to pogsinogow. 42 Nignangon si Yunatan ki David to “Hipanow ka to maawang no goinawa, su nangulibot ki no ogpalinggaat ka pogpataausi ta to ngaran to Magboboot no nignangon ki no ‘Ka Magboboot ian ka nataga koikow woy kanak, woy to mgo tipouri nu woy mgo tipouri ku taman to katamanan.’” No nighipanow on si David, woy nig-uli si Yunatan duon to lunsud.