21
Si David Duon to Nob
1 Nighondio si David to Nob, duon to taagpanubad no si Ahimilik. Nangolkol to kahallok si Ahimilik to pogtomu kandin woy nig-inso sikandin to “Manio to nigpasagsagboka ka ro? Manio to waro duma nu?” 2 Nigtabak si David ki Ahimilik no taagpanubad to “Nigtugun ka hari kanak to oghimuon ku no kagi rin to ‘Doka ipoitaga ki agad hontow ka tuud nu woy ka innangon ku koikow.’ Moitongod to mgo otow ku, pignangonan ku sikandan ko hondoi sikandan ogtomu kanak. 3 No kuntoon, nokoy ka duon to koikow? Bogadyi a to lalima no malison no pan, woy ko agad nokoy no duon.” 4 Di nigtabak ka taagpanubad ki David to “Waro allow-allow no pan kai, di duon in-oog no pan kai no ogkapurut now ko waro makahulid to mgo boi ka mgo lukos now.” 5 Nigtabak si David to “Waro koy ian makadani to mgo boi, unawa to duma no poghipanow ku. In-oog ka mgo kaaglagan to mgo lukos, agad to mgo poghipanow noy no kono’n in-oog. Iam pad naan kuntoon!” 6 No inbogoy to taagpanubad ki David ka in-oog no pan, su waro loin no pan duon ko kono’n sikan no Pan to Tangkaan no pig-awo to tangkaan to Magboboot no pigliwanan to iam pad no pan dio to allow to pog-awo to taan.
7 No kuntoon duon sagboka no suguanon ni Saul dio to sikan no allow, su pighawiran sikandin to tangkaan to Magboboot; ka ngaran din ian si Doig no matig Idom, no igbudyag to mgo taagbantoy to mgo adyam ni Saul. 8 Nig-inso si David ki Ahimilik to “Waro buwa kommag woy ko kampilan kai? Waro a naka-aap to kampilan ku, woy agad nokoy no ig-atu, su pigdagosu a to hari to pogpohipanow rin kanak.” 9 Nigtabak ka taagpanubad to “Waro, ko kono’n ka kampilan do ni Goliat no Filistihanon no pighimatadyan nu duon to aug to Ila. Natongos to manggad sikan liu to ipod. Ko ogkoiniat ka to sikan, puruta nu, waro loin ian.” Nigtabak si David to “Sikan ka dorodyawi to tibo. Ibogoy nu kun koddi.”
Si David Duon to Gat
10 Nigpanlaguy si David ligkat ki Saul to sikan no allow, woy nigpa-aput sikandin ki Akis no hari to Gat. 11 Di pignangonan si Akis to mgo suguanon din to “Inat soini si David no hari dan. Sikandin ka pighingaranan dan to mgo uranda ran to pogsadyow no kagi ‘Nakahimatoy si Saul to mgo linibu, woy nakahimatoy si David to tagsinampuu no libu.’” 12 Insabuk ni David soini no kinagian duon to goinawa rin, woy nahallok lagboy sikandin ki Akis no hari to Gat. 13 No sikan ian no nigpatuu si David no na-angol sikandin; tagood to dio sikandin to kandan, nig-ugpo sikandin unawa to na-angol no nigbadlis-badlis sikandin to mgo lokob to gomawan to lunsud woy nigpatuligis sikandin to ngingi rin duon to sumpo din. 14 Nignangon si Akis duon to mgo suguanon din to “Pitowa now ka otow! Na-angol sikandin! Manio to pig-aap now kandin kai? 15 Naan now buwa no kono pad litos ka koon-ingan to mgo na-angol kai, no pighatoran a now pad to iing soini? Manio no ogsood soini no otow to baoy ku?”